Read pokoot 2 OTÖPTINO OSIS 26 Bible Online

2 OTÖPTINO OSIS 26 - pokoot bible

2 OTÖPTINO OSIS 26

¹Atolapay kïnget pipö Yuda kïmïkul akwigh Usya nyo kitïng könyis 16 kïlïkwï pöytoghin kuker kwanta.

²Otini kirapas Amasya, kïtek Usya Elot, akuyoda kïwö Yuda.

³Kitïng Usia könyis 16 otini kikighöy nyinte kïlïkwï pöytoghin, kïpayta könyis 52 ompö Yerusalem. Kipö kame Yerusalem, akikuro Yekolya.

⁴Kigh Usya nyo karam ompö tawu ECHOTYON le paponyi Amasya.

⁵Kikil kegh nyoman Usya kïrïp Tororöt otinö kitökïsöpöy Sakaria nyo kinetöy nyinte kughan akïrip ngala Tororöt. Ompö osiswechoni kighönöy Tororöt, kiperur Tororöt nyinte nyoman.

⁶Kïset Usya kïwö kïpar kegh nko pipö Pilisti. Kurutö nïyetwo Kat nko Yapne nko nyo pö Asdod, akïtek kanastin Asdod kïghömï nko woptino koro Pilisti löwïr.

⁷Kwigh Tororöt Usya kïrïnta pipö Pilisti nko Marapun cho kimöngöy Kurpal akïrïnta tïkwïl pipö Meun.

⁸Kikwöghchï pipö Amon Usia surï, kwororit nyinte nyoman kïlït koro Misri, ompöwölo kinyorï owesyö nyo wöw nyoman.

⁹Kïtek ngat Usia teksyewut cho koghöch ompö Yerusalem kitek Kuka Luch nko Kuka Mpöghogh nko wölo tönkwïlegho nayat akuwach lasiny.

¹⁰Kïtek teksyewutkö walak cho koghöch surkwen, akïpal kori pöghon cho chang ompöwölo kitïng kyak cho chang cho kyoketïyi komos pö Syepela nko wölo le tömköy. Kitïng ngorï cho kiripöy keti sapipun ompö komos nko ompöwölo le tömkö akï akwagh, ompöwölo kichömöy ngorsyö nyoman.

¹¹Kitïng Usia pipö lïk cho kinkït poryot akimi kïpsach kïset kïrïpata kegh nko wölo kikïchaghta ompö kiyitötengwa nyo kiyit kikirintö Yeiel nko Maaseya nyo kile kintöghoghinte. Kintöghoghchini Anania pïchoni löwïr nyo kile akonga nyo pö rïpi pöytoghin.

¹²Kighyongchini lïkononi kayworöktinö cho le 2,600.

¹³Kimi lïkononi pich cho le 307,500, cho kikinet poryot lasiny. Kiporyot chane ompö nyïkanat nko sirmoy nyo wow, atökumï kungarak pöytoghin kïyon pungkachi.

¹⁴Kïropchï Usia pïchoni pö lïk, longoy nko ngötwö nko kopïyeni möt cho pö karïn, sïro cho pö karïn cho kikipuro takat, kïwantin nko koti nko köghïn cho kikïwirtegho pörköy.

¹⁵Kwigh karïn ompö Yerusalem cho kigh tïngon cho chïreröch atökewutïteghö kotï akewirtegha köghin cho echön ompö teksyewut cho koghöch nko ompö lukway kwororit nyoman akwawesit ompöwölo kimi ECHOTYON nko nyinte.

¹⁶Otini kyawesit Usya, kïmen akwigh sölwontön nyo kinyar nyinte. Kighchï ECHOTYON Tororötïnyi nyo gha. Kilït Kö pö Tororöt* akïpel tïkwïn cho ngutöy cho onyïn ompö ato kïpelo amöros.

¹⁷Kïlït Asaria tïsin Kö pö Tororöt nko tïsi ECHOTYON walak 80 cho le nyökon kïrïp Usya.

¹⁸Kipechï kïmir pöytoghin Usia akïlenchï nyinte, “Melö könyi Usia nyo ipelchini ECHOTYON tïkwïn cho ngutoy cho onyïn mi ara Aron nyo pö tïsï, chane cho kikisoyönchï kïpel tïkwïn cho ngutoy cho onyïn. Weghenö ye Tïlil ompöwölo keghchinyi ECHOTYON nyo gha, möminye konyït nyo nyorunonyi wölo mi ECHOTYON.”

¹⁹Kusïnyara Usia akinömöy tör nyo kïkönöstegho tïkwïn cho ngutoy cho onyïn kïlentöy tokönöstö. Wölo nyini kisïnyorchï tïsï kïghyagha sömewo psenkwet tokochunyi kïsïwïyi tïsï ompö Kö pö Tororöt ompö kamasu ato kïpelo amöros.

²⁰Kïchïrïm Asaria Tïsin nyo Wow* nko tïsi walak otini kisïwa lö, kinam nyinte psenkwet tokoch. Kukukugh chane nyinte kïweghö otini kïnget nyinte tïkwïl lawel ompöwölo kikikutö ECHOTYON nyinte sitöt.

²¹Kyam psenkwet pöytoghin Usia ntökïtenö kïma. Kimöngöy nyinte konyi onkït ompöwölo kitïng psenkwet amelö kitökechömchï kïwö kïlït Kö pö Tororöt. Kiripöy Yotam koto paponyi Usia akïpöytoy piko kore.

²²Kikir werkoyontö Isaya wero Amos ighisyewut walak cho kigh pöytoghintö Usia kïngeta söröm nko söröm nyo pö paytaghtanyi.

²³ Kïrapas Usia, ketïpchï wölo kikïtïpchini pöytoghï, ompöwölo kilö kinam psenkwet, kuker werïnyi Yotam nyinte kïlïkwï pöytoghin.