Read pokoot 2 OTÖPTINO OSIS 28 Bible Online

2 OTÖPTINO OSIS 28 - pokoot bible

2 OTÖPTINO OSIS 28

¹Kikigh Aas kïlïkwï pöytoghin ato kitïng könyis tömönut odeny, kipayta könyis 16 ompö Yerusalem, ameghnye nyo karam ompö tawu ECHOTYON le kukötanyi Daudi,

²kirïp atöptino pöytoghi Israel, kipel karïn akutang körkeyïntin cho pö Paal.*

³Kipel Aas tïkwïn cho ngutoy nyo karam kïlïkwï körös ompö mpöghoghyo wero Inom, akïpe werkachi kïlïkwï amöros, kïrïp kegh nko takal cho kighöy pipö punton cho kiyona ECHOTYON kwenu pipö Israel.

⁴Kitötö ropöw Aas akïpel tïkwïn cho ngutoy cho onyïn ompö wölo kïsogho körkeyïntin nko kutïngkot nko ghïtwöyi ket cho nyorilöch kiwuryegho.

⁵Kïlenyona kïpïstö ECHOTYON Tororötïnyi Aas kïpïsï pöytoghinto Sirya kunor, akïnam pikachi cho chang akuretö kutang Damaska. Kikïpïsï ngat Aas kunor pöytoghinto Israel, akepara pikachi cho chang nyoman.

⁶Kipar Peka wero Remalia asis akonga mïrön pö lïk cho le nyökon 120,000 cho pö koro Yuda ompöwölo kipïstö chane ECHOTYON Tororöto papotïnekwa.

⁷Kïpar Sikri nyakana Israel Maaseya wero pöytoghin akïpar Asrikam kighyongtoghinto kö pö soch akïpar Elkana chi nyo kirïpöy pöytoghin ompö wowïn.

⁸Kinam pipö Israel kïrat werkökwa cho le 200,000, kïmi korï nko karachïna nko tipïn akusup pörunön cho chang akurit kutang Samaria.

⁹Kimito werkoyonto ECHOTYON nyo kimöngöy Samaria nyo kikuro Oded, kiwö nyinte kïtarok lïk nyo kirotu kungwïnöy Samaria akïlenchï, “Kinörekyï ECHOTYON Tororöt papotïnekwa pipö Yuda nkanyoni ketö chane morikwa wölo kongïrökwa chane ompö kililat ntökwit ngölyontononi wölnö le yïm.

¹⁰Akwanyï ye omitekwa oyöre oghe mïrön nko koru Yuda nko Yerusalem kïlïkwï sekeyikwa. Ayo kötö monkïtökwanye so tïkwïl lö, otïngkwa ngokï cho kyoghchikwa ECHOTYON Tororöt.

¹¹Ye atera ngalechan, ayodena tupchenikwo chï kyanamakwa arongwï ompöwölo kingwïnchokwa nörekyo ECHOTYON nyo körom.”

¹²Kïnget kintöghoghi pipö Epraim walak, ompö Asaria wero Yoanan nko Perekia wero Mesyilemot nko Yeiskia wero Syalum nko Amasa wero Aadlay, kïsyölchï pich cho kimïlisyegho pörsyö,

¹³kïlenchï chane, “Mörongwï mampustinechï kïpka yi, omitekwa ato lenyoni oghöy kïgh nyo ighöy kenyorunöcha ngal cho ghach ompö tawu ECHOTYON akïtas ngokicha nko lelutköcha, wow ghöyityencha tya akïmi sitöt nyo ngwan Israel.”

¹⁴Kïlenyona kïpïstö pïchay pö lïk mampustinechay nko pörunön cho kiritu kïpïsï tawu kintöghoghï nko nyorye kïmïkul.

¹⁵Kïnget pïchay kinya kekur kaynötut kïchengwï tïkuchay kikïpörï akulokyï sïro mampustin löwïr cho kïchïrutöch nko kweghkö, akutö omisyö nko tïkwïn cho kïgheghöy akuyila mwagh, akïkasana sïkïröy walak cho kimemuköcha kïpa. Kumït mampustinechoni löwïr kutang Yeriko, kanasyan nyo mi keti sostin, wölo mi pikökwa. Atolapay kïmïlisyö kïpa Samaria.

¹⁶Kiyonta pöytoghintö Aas pich osiswechoni kïpa kïmwochï pöytoghinto Asirya kungarak nyinte,

¹⁷ompöwölo kikipka pipö Edom ngat kupokyï kïpar akïrïnta pipö Yuda akïnam pich kïrat kïlïkwï mampustin.

¹⁸Kupokyï pipö Pilisti tïkwïl kïpar kanastina Syepela, Nekep* nyo mi koro Yuda, akikïcheng Pet Syemes nko Ayalon nko Kederot nko Soko nko Kestoni, Timna nko Kestoni nko Kimso nko kestoni akwigh wöloni kïlïkwï möngengwa.

¹⁹Kimul ECHOTYON pipö Yuda owesyö ompöwölo kighchï nyo gha pikachi Aas pöytoghinto Israel ompö Yuda, akïtighintöchï ECHOTYON.

²⁰Kïlenyona kungwïn Tilkat Pilneser pöytoghinto Asirya kupokyï nyinte akunyaril kong nyo kitö ngöroköy.

²¹Kichenga Aas karïn Kö pö Tororöt nko kö pö soch nko kori pöytoghï akïropchï pöytoghinto Asirya, wölo möminye kïgh nyonikïny nyo kingarak tïkuchoni.

²²Kitas tagh kwigh nyo gha tya pöytoghintö Aas ompö tawu ECHOTYON kïrkegh kitïng nyarïl nyo wow.

²³Kyomchï tororötino Damaska cho kirïnta nyinte amöros, ompöwölo kinan lö, “Mi tororötino pöytoghi Sirya kungöroköy chane, kïlenyona omchinan amöros atökungarakan tïkwïl.” Wölo kwipchï ngalechoni nyinte nyarïl nko Israel kïmïkul.

²⁴Kïghamït Aas tïku Kö pö Tororöt* akïtörotör tïkuchoni kïlïkwï mïnchïran akïkar kukoti Kö pö Tororöt kïtekyï kegh ato kïpelo amörostin ompö Yerusalem kïmïkul.

²⁵Kïtekyï kanasyan anka tïkwïl nyo mi koro Yuda wölo kïsogho körkeyïntin, kïlenyona kwigh ECHOTYON Tororöto papotïnechi kïnarek.

²⁶Ighisyewut pö Aas walak kïngata cho tagh ntökï cho pö löt nko otöptinechi löwïr cho pö otini kipöytoy, kukirote ompö kitapu pöytoghi Yuda nko cho pö Israel.

²⁷Kirapas nyu Aas, ketïpchï kanasyanta Yerusalem ompö wölo melö kikïtïpchï wölo kikïtïpchini pöytoghi Israel. Kïpayta Esekia werïnyi kuker nyinte.