Read pokoot 2 OTÖPTINO OSIS 29 Bible Online

2 OTÖPTINO OSIS 29 - pokoot bible

2 OTÖPTINO OSIS 29

¹Kilïkwï Esekia pöytoghin ato kïtïng könyis 25, kïpayta könyis 29 ompö Yerusalem. Ki chepö Sakaria kame akikuro kaynenyi Apiya.

²Kigh Esekia nyo karam ompö tawu ECHOTYON le kukötanyi Daudi.

³Kiyat pöytoghintö Esekia kukoti Kö pö Tororöt akwigh wölo kinyorisyö ompö arawanini pö tagh nko könyinini pö tagh kilïkwï nyinte pöytoghin.

⁴Kïkur tïsï nko pipö Lawi akïghömïtyï Kö pö Tororöt okumpö kongasis,

⁵akïlenchï chane, “Atere akwa pipö Lawi, otïlilö kegh atïlil koto ECHOTYON Tororöto papotïnekwo, anategha kïgh nyo le Sïmnyon ompö wölay tïlil.

⁶“Ompöwölo kilel papotïnecho akwigh ngokï ompö tawu ECHOTYON Tororötïnyo, kipïstö chane nyinte, akïkany kuros konyikwa kareran, akïpörtochï pötogh möngo Tororöt.

⁷Kikar ngat kukoti wölo kïlïto, akumis tatïne, amapelcha tïkwïn cho ngutoy cho onyïn anta pel ropöw ompö wölay tïlil kïpelchï Tororöt pö Israel.

⁸“Nkanyï könörekyï ECHOTYON Yuda nko Yerusalem, akwigh chane ketïrtur aketöngönchï, akenyer le wölo orostenekwa ompö konyikwo.

⁹Kiwany ngot papotïnecho akerang monecho cho le wor nko tipi nko korucho kïpa kïlïkwï ratan ompö paraku ngalechete.

¹⁰Oyöran ye nyu omöy muma* nko ECHOTYON Tororöt pö Israel atömanyïl kuyoda nörekyenyi nyo körom kïweghö wölo kïmitecha.

¹¹Werkachu magh kegh alïkwï soson, ompöwölo kikïlakwa ECHOTYON oghyongenö tawunyi apöghisyechï nyinte alïkwï mötworichi, apelchï nyinte tïkwïn cho ngutoy cho onyïn.”

¹²Achï pipö Lawi cho kimi atoni: Ara Koat: Maat wero Amasay nko Yoel wero Asaria Ara Merari: Kis wero Apdi nko Asaria wero Yealelel Ara Kersyon: Yoa wero Sima nko Eden wero Yoa Ara Elisapan: Syimri nko Yeuel Ara Asap: Sakaria nko Mataniya Ara Eman: Yeuel nko Syimey Ara Yedutun: Syemaya nko Usiel

¹⁵Pïchete cho kighamït werkökwa cho le pipö Lawi akutïlil kegh akïpa kïtïs Kö pö Tororöt kïrïp kegh nko ngala ECHOTYON cho kimwochï pöytoghintö chane.

¹⁶Kïlït tïsï ori Kö pö Tororöt kïpa kïtïs, akuritï sany tïkwïn löwïr cho kile sïmnyon cho kinyorchï Kö pö Tororöt, kurityï sanypa Kö pö Tororöt wölo kikiwach. Atolapay kïpka pipö Lawi kuwikö atoni kïlït kiror akïpa kïwirchï mpöghoghyo Kidron.

¹⁷Kitor kutïlil asisto tagh nyo pö arawa tagh, ato wonyö kïpa kïlïtöy kö nyo mi ato kïlïto Kö pö Tororöt ompö asisto mu nko sömök. Kwanyïnit Kö pö Tororöt osis mut nko sömök akuwany ompö asisto taman nko akonga nyo pö arawa tagh.

¹⁸Atolapay kïpa wölo mi pöytoghintö Esekia akïlenchï, “Kiketïlilöcha Kö pö Tororöt kïmïkul nko ato kïpelo amöros nko karin löwïr cho kïpöghisyegho, aketïlil mesa makatyanta kiporut nko karin löwïr cho kïpöghisyegho.

¹⁹Aketïlil karïn löwïr cho kichengwï pöytoghintö Aas atanya kipïstö ECHOTYON, aketönöcha tawu ato kïpelo amöros.”

²⁰Kïnget pöytoghintö Esekia tökwoghö akïghamït yetïntino kanasyan akïwö nko chane kutang Kö pö Tororöt.

²¹Kïrang kir mut nko odeny nko mökol mut nko odeny nko wara kechir mut nko odeny nko kwöghe mut nko odeny cho kimwat ngoki ka pöytoghin nko pipö Yuda akutïlil Kö pö Tororöt. Kïmwochï tïsï kïropta choni löwïr ompö ato kïpelo amöros.

²²Kïyeng kiruchay, atolapay kïcheng tïsï kisönkö akwisö ato kïpelo amöros, kïyeng mökolkö akwisö kisönkö ataye kïpelo amöros akïyeng wareko kechir akwisö kisönkö ato kïpelo amöros.

²³Kerongwï kwöghechay kïmwöto ngokï kïpka tawu pöytoghin nko pipö Yuda, Atolapay kukana chane löwïr kwöghechoni morikwa.

²⁴Kïnömï tïsï kwöghechay akïyeng akwigh kïlïkwï ropöwo ngokï akwisö kisönkö ato kïpelo amöros, atökïkarta pipö Israel löwïr. Ompöwölo kimwa pöytoghintö lö, kïroptoy amöros nyo kïpelöy, akeropta nyo pö ngokï, nyo pö pipö Israel löwïr.

²⁵Kutö pöytoghintö Esekia pipö Lawi Kö pö Tororöt kïtïpï cho kitïng tïkwïn cho töpölöl cho ato kirapa kusilyö nko cho kitïng pïkantis nko cho kitïng pkurerun, kïrïpata kegh nko ngölyonto Daudi nko nyo pö Kad nyo kile ngorinto ngala pöytoghin nko nyo pö werkoyon Natan. Ompöwölo kingwïna ngölyontononi ECHOTYON kuwerï werkoykachi.

²⁶Kïnam pipö Lawi karïn cho kïpöghisyegho Daudi kïtumo, kïnam tïsï kontinekwa.

²⁷Kïmwatïta pöytoghintö Esekia keropta ropöwon nyo kïpelöy ompö ato kïpelo amöros, nyini kikitor keropta ropöwontonay kïpelöy, kutor tïkwïl tum nyo kïsölo ECHOTYON nko kontin nko karichay kipöghisyegho Daudi pöytoghinto Israel kïtumo.

²⁸Kïpechï nyoryonay kïmïkul kïsölisyö akïtum tumï kurur, kïkut pipö kontin kontinekwa kughum, kwigh lenyoni tökïtenö kuwonyö ropöwontonay kikïpelöy.

²⁹Nyini kimuchö ropöwontonay kïkïtïng pöytoghintö Esekia nko nyorye kïmïkul kïsal ECHOTYON.

³⁰Atolapay kïmwochï pöytoghintö Esekia nko yetïntine walak pipö Lawi kïsala ECHOTYON tum pö pöytoghin Daudi nyo kimïn nko nyo pö ngorin Asap, kïtum tum pö sölut ompö ngörekyö, kungïrukisyö akïsölisyö.

³¹Atolapay kïlenchï pöytoghintö Esekia pich, “Arikuna ye nyu opunö amörostin nko ropöw cho kïmwogho sörö kïpka Kö pö Tororöt, ompöwölo kyotïlilökwa kegh.” Kwipï nyoryonay amörostin nko ropöw cho kïmwogho sörö, akwipï pich löwïr cho kicham kwigh lenyoni ropöwekwa cho kïpelöy.

³²Kïlïkwï ropöw cho kïpelöy cho kikonï pich, kir 70 nko mökol 100 nko wara kechir 200. Ropöwechete löwïr kikïpelöy kï ropöwo ECHOTYON.

³³Kilïkwï tïpö amöros cho kikïmolchï yona löwïr eghin 600 nko kechir 3,000.

³⁴Wölo kïngörïngit tïsï nyoman tömökumïcha kïyeng ropöwechoni kipelöy. Otini kitö keköngöy tïsi walak kutïlil kegh kïpka werkökwa pipö Lawi kungarak chane tökïtenö kuwonyö pöghisyononi. Kichömöy kutïlilöy kegh pipö Lawi kïtïl tïsi walaka.

³⁵Paraku chongïn pö ropöwechoni kikïpelöy, kimi tïkwïl ropöwo sunet cho kikitötoy le ropöwo kalya. Akimi ropöw cho kïgheghöy ompö ropöwechoni kipelöy. Kïlenyona kïwö ighisyo Kö pö Tororöt kutang wölanye kimi tagh.

³⁶Kïngarak pöytoghintö Esekia nko pich löwïr ompö ngölyontononi kigh Tororöt kwighchï pikachi, ompöwölo kimir chane ngölyontononi.