Read pokoot 2 OTÖPTINO OSIS 3 Bible Online

2 OTÖPTINO OSIS 3 - pokoot bible

2 OTÖPTINO OSIS 3

¹Kïlenyona kutor Solomon kïtek Kö pö Tororöt ompö kutïng pö Moria nyo mi Yerusalem, wölo kiporchineghö kegh ECHOTYON Daudi paponyi, ato kikikuporï Daudi lö kïteköy, ato kitïgho paghechi Arauna nyo kile chi pö Yepusi.

²Kitor kïteksyö araweto odeny ompö könyi angwan nyo pö paytaghtanyi.

³Chï rïpöy kï pchörin cho kipöghisyeghö Solomon ompö teksyo Kö pö Tororöt. Kimiten 27 köghïntö nyo pö köyoni, kïlïkwï töpesïntanyi miten mut nko angwan.

⁴Kïlïkwï körköru nyo kimi köyoni tagh okumpö kukat, miten mut nko angwan le pöroyïnto kot nyinte, aki miten 54 kutok. Kikïmala koltin cho pïchighöch nïyetu okumpö ori.

⁵Kïtata köyoni wow saypras akemina koltin cho karamach akekörö keti sostin nko sïrïmtin.

⁶Kikïtïngönchï köyoni kemina köghïn cho kwerkwersot nyoman, kipkono koltinechoni Parpaim.

⁷Kiyenö koltin: keti kukot, nïyet nko köröweko kukoti Kö pö Tororöt* akwighchï nïyetwe kerupim.*

⁸Kitek Wölo Tïlil Tya,* kïkarkegh töpesïntanyi nko nyo pö kot nyay le miten mut nko angwan akekartegha nyu koltin cho pïchighöch cho kitöy nïkisyenyi tantin tömönut odeny.

⁹Kïlïkwï kramtin 570 cho pö koltin nïkisyeto mïsumaris. Kuyenö koltin kori cho mi parak.

¹⁰Kitö körkeyïntin odeny cho ki kigha ket cho pö kerupimtin Wölo Tïlil Tya* akïkartegha koltin.

¹¹Ki tapan tömönut odeny cho pö egh koghïnto kapepayi kerupimtinechoni, kitïng kapepye akonga tapan mut cho pö egh akïwetöy ntökïting nïyetuto kot, ki tapan mut cho pö egh kapepye anka akiswongöy kegh kapepokökwa.

¹²Kitïng kapepye nyo pö kerupimtö nyo pö odeny tapan mut cho pö egh, akïswongöy köyoni nayat kikörökegh kapepche nyinö anka tïkwïl, akïnömöy kegh walisay nko nyo pö kerupimtö nyo pö tagh.

¹³Kikoghöch kapepayi ko kerupimtine choni kitöy tapan cho le tömönut odeny cho pö egh, kighyongo kelyekwa akipörtoy köyay wow.

¹⁴Kinap chi kerupim ananka nyo kingïrta köyoni akukörö pörköy cho tuwöch cho nyörilöch nko cho orusöch nyo pïrir nko cho pïröch nko katani nyo pïchigh.

¹⁵Kikïtek köyoni wölnö ketang okumpö kukat pchörin odeny cho kitöy koghïntöngwa miten 15.5. Kimi tïkwïn cho tömpulöch parakuto pchörinechoni. Kitïngetö anka tïkwïl miten 2.2.

¹⁶Kwigh sïrïmtin akulokyï parakuto pchörinechoni le kari kat, kwigh ngat makumanka* taghoy 100 akïwoghchï sïrïmtinechay.

¹⁷Kipörtochï pchörinechay Kö pö Tororöt kukat, kipörtochï anka okumpö tagh, kutö anka okumpö löt. Kikurö nyinö kimi okumpö tagh Yakin, kïkurö nyinö kimi okumpö löt Poas.