Read pokoot 2 OTÖPTINO OSIS 31 Bible Online

2 OTÖPTINO OSIS 31 - pokoot bible

2 OTÖPTINO OSIS 31

¹Nyini kimuchö ngalechoni löwïr, kïpa pipö Israel löwïr cho kimi atoni kïtoyechï kanastina Yuda akusyewsyew pchörin cho kikigha köghïn akïtörotör körkeyïn pö Asyera* tororöt nyo le korka akïngany wölo kïsogho körkeyïntin akïngany ato kïpelo amöros ompö koro Yuda kïmïkul nko Penchamen nko ompö Epraim nko Manase tïkwïl, kïngany tökïtenö kïsïwa lö, kewonyö lökïr. Atolapay kïmïlisyö pipö Israel kanastinekwa kïwö chi anka tïkwïl kutang möngenyi.

²Kumurmuryö pöytoghintö Esekia tïsï nko pipö Lawi kïpegha wölo lata acheyu chi anka tïkwïl, kïlïkwï tïsï nko pipö Lawi cho pelöy amörostin akutötoy ropöwo kalya, kïpöghisyö akutö sörö ECHOTYON akïsal nyinte ompö kukotiko kanasyantenyi.

³Pasan cho kikonï pötoghintö ompö tïkuchi cho kitïng kï ki ropöw cho kïpelöy nko ropöw cho kïpelöy tökwoghö nko mönon nko ropöw cho kïpelöy ompö asispa Sapato* nko Ichon pö Relïn pö Arawa nko cho kikiporï lö, pö ichontin, le wölo kikikirta ompö kirurut pö ECHOTYON.

⁴Kïmwochï pöytoghintö Esekia pich cho kimöngöy Yerusalem, kïkonï kareranpa kïgh nyo mïchini ketö tïsï nko pipö Lawi, atökutötö kegh lasiny kwigh le wölo möktoy Kirurut pö ECHOTYON.

⁵Nyini kikïlïm ngölyontononi kighömï korononi, kïpasta pipö Israel ompö chongïn tïkwïn cho lata: poretayi akwa cho tïng kösïgh nko dipay* nko mwagh nko kumat nko tïkwïn walak löwïr cho pkono paren, akwipï ompö chongïn kareranpa taman cho pö tïkwïn löwïr.

⁶Kwipï pipö Israel nko pipö Yuda cho kimöngöy kanastina Yuda karenanpa taman nyo pö tïch nko kechir nko nyo pö tïkwïn cho kikisir aketïlilchï ECHOTYON Tororötïngwa, kwipï tïkuchoni kutïkumö.

⁷Kutor kïrat tïkuchoni kikitïkum ompö arawa sömök, akuwany ompö arawa mut nko odeny.

⁸Otini kingwïn pöytoghintö Esekia nko kintöghoghï kuros tïkuchoni kikitïkum kïsal ECHOTYON nko pikachi Israel.

⁹Kitep pöytoghintö tïsï nko pipö Lawi ngala tïkuchay kikitïkum.

¹⁰Kuyokyï Asaria Tïsin nyo Wow* nyo pö ara Sadok lö, “Kïngeta atanye kitor pich kwipï pasan kïpka Kö pö Tororöt kyomisyecha kïmïchecha kïmi ompö cho ngötu cho chang. Ompöwölo kisoyön ECHOTYON pikachi, atökunka nyï ngötunote omisyonï wow le nyï.”

¹¹Kïmwochï pöytoghintö Esekia chane kïtek töpoton Kö pö Tororöt ori, kïteksyö pïchay.

¹²Akwipï nyu pasankakwa cho kichömöy nko karerantina taman nko ropöw walaka. Kikuro yetïntöngwa nyo wow nyo kighyongchini pïchoni Konania chi pö Lawi, kïrïpöy werïngwa Syimey.

¹³Ketö ompö Yeiel nko Asasia nko Naat nko Asael nko Yerimot nko Yosapad nko Eliel nko Ismakia nko Maat nko Penaya kïlïkwï kighyongtoghï cho ngöroköy Konania nko werïngwa Syimey, kïle wölo kimwayta pöytoghintö Esekia nko Asaria yetïn nyo wow nyo pö Kö pö Tororöt.*

¹⁴Kighyongchini Kore wero Imna chi pö Lawi nyo kile ripinto kuka Kö pö Tororöt nyo mi okumpö kongasis ropöw cho kikïropchini Tororöt ompö chamat akïchaghta pasan cho kikïropchini ECHOTYON nko ropöw cho tïlilöch tya.

¹⁵Kirïpöy nyinte ompö: Eden nko Miniamin nko Yeswö nko Syemaya nko Amaria nko Syekania. Ki pipö man chane otini kimi kungöroköy Kore wero Imna ompö kanastina tïsï kïchöghchini werkökwa cho echön nko cho mïnkech omisyö kïpeghata kegh nko aperïtiskökwa,

¹⁶amelö kirïp lö, pö aranay nyï kï pö aranay nyinö, kinyorï monïngö cho le wor cho kitïng könyis sömök kutoch, akïnyorï pich löwïr kilït Kö pö Tororöt kïpöghisyö le wölo kilata acheytangwa ompö asis anka tïkwïl. Kïnyorï chi tïkwïl kïrïpata kegh nko wölo kipörtoy pösyö ompö aperïtïngwa.

¹⁷Kikiyit tïsï kïrïpata kegh nko ortïneko papotïnekwa, keyit pipö Lawi cho kitïng könyis tömönut odeny kutoch, kïrïpata kegh nko wölo kilata ighisyengwa nko aperïtiskökwa.

¹⁸Keyit tïsï nko monekwa cho mïnkech löwïr nko korukwa nko monïnge cho le wor nko tipi, kikiyit nyoryononi kïmïkul ompöwölo kighönote chane ompö ngala kitïlilöto kegh.

¹⁹Kikitö tïsï cho pö ara Aron cho kimöngöy kanastinekwa cho kitïng wölo kiyokwïyo kyak ompö sanypa kanastinechoni, kïchöghchï omisyö tïsin anka tïkwïl nyo le mïrön nko chi pö Lawi anka tïkwïl nyo kikirate kaynenyi.

²⁰Kigh pöytoghintö Esekia ompö Yuda kïmïkul nyo karam akï pö man akï cho ghönote ompö tawu ECHOTYON Tororötïnyi.

²¹Pöghisyö anka tïkwïl nyo kitor Esekia kwigh ompö ighisyo Kö pö Tororöt, kïrïp kegh nko wölo kilata kiyomisut nko kirurut, kïsagh akïpöghisyechï Tororötïnyi ompö mïkulöwunyi kïmïkul. Kïlenyona kulet nyo karam.