Read pokoot 2 OTÖPTINO OSIS 32 Bible Online

2 OTÖPTINO OSIS 32 - pokoot bible

2 OTÖPTINO OSIS 32

¹Otini kimuchö ngalechoni nko ighisyewutchoni kigh Pöytoghintö Esekia ompö kighanat kungwïn Senakerip pöytoghinto Asirya kupokyï Yuda akurik nïyetwo kanastin cho koghöch kuwit kunonöy lö, onömöy akïpörï kanastinechoni kïlïkwï chechi.

²Nyini kisöwï Esekia lö, kikïsetï Senakerip akïtïng keröt kïpar Yerusalem,

³kïtat nko pikachi cho echön nko nyökonkachi cho pö lïk kïtïp konyi pöghon löwïr cho mi sanypa kanasyan, kïcham pïchoni akungarak pöytoghin.

⁴Kïghamïtï kegh pich cho chang nyoman akïtïp kori pöghon löwïr nko lalwa nyo kiyintoy kuwer kor kwen, atolapay kïlö, “Pö ne kïnyorï pöytoghi Asirya pöghechï möngörï?”

⁵Kutor Esekia ighisyö ompö sirmoy kïtek nïyet löwïr cho kikirulyö, akïtek korïn cho koghöch cho kïmörörisyegho parakuto nïyetwechoni, kïtek nayatu anka okumpö sany. Atolapay kïtek lasiny wölo kikuro Milo ompö kanasyanta Daudi. Kwigh ngat kari lïk nko longoy cho chang.

⁶Kutö kiseti lïk kïtat pich akïrongwï kïpka tömkö nyo mi kuka kanasyan. Kïcher chane kïlenchï.

⁷“Onyökönitu, aghyongtö nyoman. Mowöghisyö amakany kïmeghyok mutïnö ompö pöytoghinto Asirya nko lïkenyi nyï wow le nyï, ompöwölo mi akong nyo wow tya nko acha kïtïl nyo pö pöytoghinto Asirya.

⁸Lïko ptangengmöt lïkenyi. Wölo ngörokecha ECHOTYON Tororötïnyo akïporyewecha nyinte.” Kïnyökönitu pich ompö ngala Esekia pöytoghinto Yuda.

⁹Otini kimuchö ngalechoni kïyonta pikachi Senakerip pöytoghinto Asirya nyo kimi kuriköy Lakis nko lïkenyi kïmïkul, kïpa Yerusalem wölo mi Esekia pöytoghinto Yuda nko pipö Yuda kïmïkul cho kimi Yerusalem, kïmwochï lö,

¹⁰“Kölö Senakerip pöytoghinto Asirya, ‘Ne nyï itwoytonenyi kegh nya, nyï keghinyi ghyongtenö kirikatanï mi Yerusalem?

¹¹“ ‘Mi Esekia kïlïsokwa atökwighekwa omeghyenö ompö kömöy nko maral otinö mi kïmwowekwa lö, “Ewo, sörwecha ECHOTYON Tororötïnyo ompö mori pöytoghinto Asirya.”

¹²Esekia nyinte nyo kinyar wölo kïsogho ECHOTYON nko atay kïpelo amörostin, akïmwochï pipö Yuda nko Yerusalem lö, “Osoghonekwa tawu ato kïpelo amöros akonga kwïle, apelokwa atoni amörostinekwo.”

¹³Kitö monkïtökwanye kïgh nyo kyaghan nko papotïnechu keghchï piko koroswe walak löwïr? Kimï so tororötino piko koroswechoni kïsörunö chane morichan?

¹⁴Tororöt ne nyo pö koroswechï kipar papotïnecha nyo kimï tökïsörunö pikachi morichan, le otï olentekwa ewo muköy tororötïnkwa kïsörwekwa ompö morichan?

¹⁵Lentöy ye nyu, mopïsï Esekia kïlïsak amakany kuwengak aripa ngalechi, amaghan nyinte ompöwölo möminye tororöt nyo pö kor anka tïkwïl anta pöytoghin nyo kikumï kïsörunö pikachi morichan, anta sörunö moriko papotïnechan. Muköy nyu lö ne Tororötï le nyinkwa tökïsörwokwa ompö morichan.’ ”

¹⁶Kïtas pikachi tïkwïl kïngalana nyo gha ECHOTYON Tororöt nko mötworintenyi Esekia.

¹⁷Kukir palaltin kumwa akïsas ECHOTYON Tororöt pö Israel, akïngalana nyo gha kïmwa lö, “Le ato kimemïcha tororötino koros kïsörunö pikökwa morichan, kïmemukönye nyu Tororöt nyo pö Esekia kïsöruno pikachi ewunyan.”

¹⁸Kuteghyö ompö ngala pipö Yuda kïmwochï pipö Yerusalem cho kimi nayat kwotyeghö akwigh chane kïmïghyö akïlentöy tökenama kanasyante ompö kwïskïsïn.

¹⁹Kïngalana Tororöt pö Yerusalem kumustö tororötin cho kigh ptangengmöt ompö ngwïny.

²⁰Kïsagh Esekia nko werkoyon Isaya wero Amos, kïlokyö ompö ngalechoni kilïm.

²¹Kïyonta ECHOTYON malaykayan kïtïw nyökon pö lïk löwïr nko kighyongtoghi nko yetïntin cho kimi möngo pöytoghinto Asirya. Kïmïla pöytoghinto Asirya ompö arasï kïwö korenyi. Akwotini kïwö kïlït koto tororötïnyi, kïsöpchï werkachi walak kïpara rotwo chok.

²²Kïsörï ECHOTYON Esekia nko pipö Yerusalem kïpkana mori Senakerip pöytoghinto Asirya nko pungkachi löwïr, akutö nyinte payasat.

²³Kwipchï pich cho chang ECHOTYON ropöw ompö Yerusalem, akwipchï Esekia pöytoghinto Yuda tïkwïn cho pïchighöch, tökïtenö kïrumtö nyinte ompö koros walak kutorö atoni kutang tagh.

²⁴Kïkasa Esekia ompö osiswechoni tökïrich kïma. Kïsagh Echotyo, kïterchï ECHOTYON nyinte somötenyi, akutö nyinte kiporunöt.

²⁵Wölo metönye Esekia ECHOTYON sörö ompö ngal cho karamach cho kikighchï nyinte ompöwölo kikwol kegh. Kïnyorï nyinte sitöt akïnyorï pipö Yuda nko pipö Yerusalem.

²⁶Wölo kïpïstö Esekia kwolöto kegh, akwigh lenyoni tïkwïl möngi Yerusalem, melö kitökïnyorï nyu chane sito ECHOTYON ompö osiswo Esekia.

²⁷Kitïng Esekia sïkönöt nyo wow nyoman nko konyït akirorchï kegh kaplawachtin cho pö silpa nko cho pö koltin nko cho pö köghïn cho pïchighöch nko cho pö tïkwïn cho ngutoy cho onyïn nko cho pö longoy nko cho pö karï walak löwïr cho pö olyot nyo wow.

²⁸Kïtek töpoton cho kïrorchini pagh nko dipay* nko mwowöy, akulukata pighywayi tïch nko cho pö kechir.

²⁹Kiyörchï kegh ngat kanastin akitïng ocheywo kechir cho chang nko cho pö tïch, ompöwölo kitö Tororöt nyinte kïnyorï tïkwïn cho chang.

³⁰Esekia nete nyay kikar pögho lalwa nyo ngeto Kion kipa kïröyto okumpö kongasis pö kanasyanta Daudi. Kulet tagh nyo karam Esekia ompö ighisyewut kachi löwïr.

³¹Otini kiyokwï pöytoghi Papilon pich kïpka kïtep nyinte ngala töngöchin nyo kigha ompö korononi, kïpïstö Tororöt nyinte onkït kïkarkar atökunkïtï kïgh anka tïkwïl nyo mi mïkulöwunyi.

³²Kirote nyu ighisyewut walak cho kigh pöytoghintö Esekia nko tïkwïn cho karamach cho kigh nyinte ompö sïwïyaghpa werkoyon Isaya wero Amos, kitapu pöytoghi Yuda nko Israel.

³³Kirapas Esekia, ketïpchï nyinte pïrïmpoti werpö Daudi wölo le are kunto. Kuporchï konyït nyo wow pipö Yuda nko möngi Yerusalem asisini kirapas nyinte. Kuker werïnyi Manase kïpayta.