Read pokoot 2 OTÖPTINO OSIS 33 Bible Online

2 OTÖPTINO OSIS 33 - pokoot bible

2 OTÖPTINO OSIS 33

¹Kilïkwï Manase pöytoghin ato kitïng könyis taman nko odeny, kïpayta könyis 55 ompö Yerusalem.

²Kigh Manase ngokï ompö tawu ECHOTYON, kïrïp otöptin cho ghach cho pö pipö punton cho kitulö ECHOTYON tawu pipö Israel.

³Kitek ngat Manase wölo kïsogho körkeyïntin cho kikikunyar paponyi Esekia. Kïwechï Manase kïtek ato kïpelo amöros kïsogho Paal,* akwigh körkeyïntino tororöt nyo le korka nyo kïkuro Asyera* kïkïtïngchï akïsagh kokelya yïm löwïr akï pöghisyechï.

⁴Kitek Manase ato kïpelo amöroso pipö punton Kö pö Tororöt, wölo kinya kïmwa ECHOTYON lö, “Kïsogho kaynenyan yi le Yerusalem kokay.”

⁵Kïtek Manase ompö Kö pö Tororöt ato kïpelo amörostino kokelya yïm löwïr.

⁶Akïpel werkachi kïlïkwï ropöw cho kïpelöy ompö mpöghoghyo wero Inom, akwigh ngala ngorsyewut nko chepsoköynön nko kirosata kwegh akïsor pich cho ngölonöy nko onyötöy nko ponï. Kigh ngokï cho chang ompö tawu ECHOTYON, kwigh nyinte kïnarek.

⁷Kutö körkeyïn nyo kigh nyinte Kö pö Tororöt,* wölo kimwochineghö Tororöt Daudi nko werïnyi Solomon lö, “Kyakïlan köyï nko Yerusalem ompö kwenu pipö Israel löwïr kïlïkwï wölo kïsoghonanïn kokay,

⁸amoyonenanye Israel koronï kyotönön papotïnekwa, ato cham kwigh tïkwïn löwïr cho kyomwochan chane, cho kikïkonï kuwerï Musa.”

⁹Kintöghoghchï Manase pipö Yuda nko möngi Yerusalem, tökwigh ngokï cho chang kïtïl punton cho kiwany ECHOTYON kïsïwïyi pipö Israel.

¹⁰Kingölonchï ECHOTYON Manase nko pikachi wölo matercha.

¹¹Kïpïsï ECHOTYON chane kighyongtoghi lïko pöytoghinto Asirya kïpka kukoda Manase kömöyi karïn akïrat kïrata sïrïmtino taghoy akuretö kutang Papilon.

¹²Otini kimi Manase nyarïl kwen, kïyar pöropcho ECHOTYON Tororötïnyi akïrïny kegh nyoman ompö tawu Tororöto papotïnechi.

¹³Nyini kisagh Manase, kïlïm Tororöt somötenyi nko sowutkachi akïpïsï nyinte kïmïla Yerusalem kïpayta ngat. Kïpköchï nyu Manase ompö atoni lö, ECHOTYON nyo le Tororöt.

¹⁴Nyini kimuchö ngalechoni, kïtas Manase kïtek kutok nayat nyo mi sanypa kanasyanta Daudi, okumpö ta nyo pö Kion, mpöghogh ori ntökwitïta Kuka Kaghagh akuwita Opel, akïtap kïkoghit tya, akïronkyï ngat kintöghoghi lïk kanastina Yuda löwïr cho kikïtek lasiny.

¹⁵Kunategha tororötino pipö punton nko körkeyïntin cho kimi Kö pö Tororöt akunategha ato kïpelo amöros löwïr, cho kitekyï nyinte kutïng pö Kö pö Tororöt nko Yerusalem akï wirta kïwirchï sanypa kanasyan.

¹⁶Kïpïstö ato kïpelo amöros pö ECHOTYON Atolapay kutöteghö atomi ropöwo pöghisyö nko cho kiyokyinegho sörö akï mwochï pipö Yuda kïpöghisyechï ECHOTYON Tororöt pö Israel.

¹⁷Kïrkegh kitökïmi pich kutötoy amörostin ompö wölo kïsogho körkeyïntin, kiropchini ECHOTYON Tororötïngwa onkït.

¹⁸Kirote nyu ighisyewut walak cho kigh pöytoghintö Manase nko saghatenyi ompö Tororötïnyi nko ngala werkoyon cho kimwochï nyinte ompö kaynata ECHOTYON Tororöt pö Israel, kitapu Otöptino pöytoghi Israel.

¹⁹Kïkany sowutkachi nko wölo kiterta Tororöt somötenyi nko ngokichi löwïr nko wölo kipïsteghtö kighanatenyi nko onkuninö kitekta wölo kïsogho körkeyïntin akupintit Asyera, tororöt nyo le korka nko körkeyïntin, atanya kitomönye kïrïny kegh Manase ompö tawu Tororöt, kukirote kitapu otöptino werkoy.

²⁰Kïrapas Manase, ketïpchï katanyi kuker werïnyi Amon kïpayta.

²¹Kipayta Amon ato kïtïng könyis 22, kïpayta könyis odeny ompö Yerusalem.

²²Kigh Amon ngokï ompö tawu ECHOTYON le kwanta, kitö ropöw körkeyïntin löwïr cho kigh paponyi Manase, akïpöghisyechï.

²³Kimarïngnye kegh Amon ompö tawu ECHOTYON le paponyi Manase, wölo kinget nyinte kïtas tagh kwigh ngokï tya.

²⁴Kïtat mötworichi kïpar nyinte, kïpörchï katanyi.

²⁵Wölo kïpar piko kore pïchoni löwïr kichomnyechï kïpar pöytoghin Amon akwigh pipö korononi Yosia wero Amon kïlïkwï pöytoghin kuker paponyi.