Read pokoot 2 OTÖPTINO OSIS 34 Bible Online

2 OTÖPTINO OSIS 34 - pokoot bible

2 OTÖPTINO OSIS 34

¹ Kitor Yoas kïpayta ato kïtïng könyis mut nko sömök akipayta könyis 31 ompö Yerusalem.

²Kigh nyinte nyo karam ompö tawu ECHOTYON akïrïp ortïn löwïr cho pö paponyi Daudi, amamastanye kutang ewu tagh anta ewu löt.

³Ompö könyi mut nko sömök nyo pö paytagh tanyi ato kitökïkarachïnin kutor kïyar kïsagh Tororöto paponyi Daudi, akïnyini kirel könyito taman nko odeny, kutor kunategha wölo kïsogho körkeyïntin ompö Yuda nko Yerusalem. Kinategha wölo kïsogho körkeyïn nyo kïkuro Asyera* nko körkeyïntine walak cho kikipat nko cho kikitany.

⁴Kïngany pich ato kïpelo amörostino Paal* ompö tawunyi akurul ato kïpelo tïkwïn cho ngutoy cho onyïn cho lekïtöch. Kïtörotör körkeyïntino Asyera nko körkeyïntine walak löwïr cho kikipat nko cho kikitany kïlïkwï syawsyaw akïtïghotïgh kïlïkwï terïtyon akïlösyï pïrïmpoti pich cho kipelchini körkeyïntinechoni amörostin.

⁵Kïpel koyo tïsi körkeyïntinechoni ompö ato pelo amörostinekwa akutïlil Yuda nko Yerusalem.

⁶Akutïlil kanastine walak cho pö Manase nko Epraim nko Simion, ntökwit Naptali nko rotyotïnekwa löwïr.

⁷Kïngwïs nököghoni amörostin akunyaknyak körkeyïntino Asyera tororöt nyo le korka nko körkeyïntine walak kïlïkwï pïsya, akïtörotör nököghon löwïr cho kikïpelo amörostin ompö koro Israel kïmïkul. Atolapay kïmïla kutang Yerusalem.

⁸Ompö könyi 18 nyo pö paytaghtanyi, otini kikikutïlil kore nko Kö pö Tororöt.* Kïyonta Syapan wero Asalia nko Maaseya kighyongtoghinto kanasyan nko Yoa wero Yoaas nyo le kikirin kïpa kwigh koto ECHOTYON Tororötïnyi kïkaramit.

⁹Kïpa wölo mi Ilkia Tïsin nyo Wow* kutötö ropïyen cho kikikepï Kö pö Tororöt cho kikwagh pipö Lawi cho kiripöy kukat akïkwagha pipö kanasyanta Manase nko Epraim akïkwagha ngötunön pö Israel löwïr nko Yuda löwïr nko Penchamen nko möngi Yerusalem.

¹⁰Kutötö ropïyeni kutö pich cho kighyongchini ngala teksyo Kö pö Tororöt nko pich cho kighöy ighisyo Kö pö Tororöt kwigha köyoni wölo kinyara akwigh kïköchï le ato kimi tagh.

¹¹Kutö ropïyeni pich cho kile tïngon ompö ighata ngöcher nko pich cho kinkït kïteksïyi, kwala köghïn cho kikïngwïl nko pautin cho kinomnyegho nko pïrompur cho kiteko wölo kipïstö pöytoghi Yuda kunyara.

¹²Kwigh pïchoni ighisyononi ompö man, akighyongtoy chane ompö Yaat nko Opadia pipö Lawi cho pö ara Merari nko Sakaria nko Mesyulam cho pö ara Koat. Kighyongtö pipö Lawi löwïr cho kile pïti pïkantis

¹³pich cho kikösönöy tïkwïn akïchöghchï chi anka tïkwïl nyo kighöy ighisyö anka tïkwïl. Kimi pipö Lawi walak cho kile kikirï nko yetïntin nko ripi kukat.

¹⁴Otini kikïchengu ropïyenichay kikipï Kö pö Tororöt, kïnyorï tïsin Ilkia kitapu Kirurut pö ECHOTYON nyay kikïkonï kuwerï Musa.

¹⁵Kïlenchï Ilkia kikirin Syapan, “Konyorwan kitapu Kirurut onyorchï Kö pö Tororöt.” Atolapay kutötö Ilkia kitapu kutö Syapan.

¹⁶Kwipchï Syapan kitapunay pöytoghin akïmwochï lö, “Mi mötworiku kwighöy tïkwïn löwïr cho kitönönyi chane kwigh.

¹⁷Kikïchengwï ropïyenichay löwïr kikïnyorchï Kö pö Tororöt akikutötö kutö mori kighyongtoghï nko pipö ighisyö.”

¹⁸Atolapay kïlenchï kikirintö Syapan pöytoghin, “Kokonanïn Ilkia tïsin kitapï.” Akusomön Syapan kusomönö tawu pöytoghin.

¹⁹Nyini kilïm pöytoghintö ngala kirurut kesomönöy, kïpalpal sïrokachi,

²⁰atolapay kïmwochï Ilkia nko Aikam wero Syapan nko Apdon wero Mika nko Syapan kikirin nko Asaya mötworinto pöytoghin lö,

²¹“Ape atepunö ECHOTYON kïmwowanïn nko pich cho kidong koro Israel nko Yuda paraku ngala kitapunï kökïnyorï, kinörekyecha ECHOTYON nyoman ompöwölo marïpnye papotïnecho ngölyonto ECHOTYON, ameghcha kïrïp kegh wölnö kikikirta ompö kitapunï.”

²²Kïwö Ilkia nko pich cho kiyoktö pöytoghintö wölo mi korka nyo le werkoyon nyo kïkuro Ulda koko Syalum wero Tokat wero Asra, ripinto wölo kitöni sïro cho kïpöghisyegho ompö Kö pö Tororöt (kimöngöy kokononi Yerusalem okuntö nyo pö odeny) kïmwochï kokononi ngal cho kighisyö.

²³Kïlenchï kokonay pïchay, mwoghöy ECHOTYON Tororöt pö Israel lö, “Omwochinö chichona keyokwokwa wölo omitan lö,

²⁴mwoghöy ECHOTYON lö, ‘Oyonchinan kïgh nyo gha Yerusalem nko pich cho möngöy wöloni, pkonöy chïputchay löwïr kikikirchi kitapunay kikisomönö tawu pöytoghinto Yuda.

²⁵Ompöwölo kipïstanïn akïpelchï amöros tororötin walak, atökwighanïn onörekyan ighisyewut löwïr cho igho chane morikwa omïlchinan nörekyenyan yi, amöminye chi nyo muköy tökïnuk.

²⁶Wölo omwochinekwa pöytoghinto Yuda nyo keyokwokwa lö, mwoghöy ECHOTYON Tororöt pö Israel lö, kïrïp kegh nko ngalechay kelïmanyi,

²⁷akïnyorï mïkulöwungu lastagh, aipönyi kegh ngwïny ompö tawunyan aipalpal sïroköku ailoka tawunyan kyalïminyi.

²⁸Otinö kachengan söpengu le ato kyachengan cho pö papotïneku kerorchinyi pïrïmpengu ompö kalya amösïwïyinye konyiku ghöyityö löwïr nyo opchinan Yerusalem nko pich cho möngöy ori.’ ” Kïlenyona kwipï pïchay lökoyechay kwïpchï pöytoghin.

²⁹Atolapay kïkurtö pöytoghintö kïkur poyi Yuda nko cho pö Yerusalem.

³⁰Kïpusta pöytoghintö kutang Kö pö Tororöt nko mïrön pö Yuda löwïr nko möngi Yerusalem nko tïsï nko pipö Lawi nko pich löwïr cho echön nko cho mïnkech, akusomönö ngala kitapunay pö muma kikïnyorchï Kö pö Tororöt kïlïmöy chane.

³¹Atolapay kughyongö pöytoghintö wölo ghyongo pöytoghï akwama muma tawu ECHOTYON kïrïp ECHOTYON kïrip kirurutkachi nko mwowutkachi nko kikirutkachi ompö mïkulöwunyi löwïr nko ompö söpenyi löwïr, kwigh ngala muma cho kikikirchï kitapunï.

³²Atolapay kwigh pipö Yerusalem nko cho pö Penchamen cho kimi atoni kuyomis lö, kïripöy mumanoni. Kwigh nyu möngi Yerusalem le wölo mwoytoy muma Tororöto papotïnekwa.

³³Kunategha nyu Yosia tïkwïn löwïr ompö wölo kimöngöy pipö Israel, akwigh pich löwïr cho kimi Israel kïpöghisyechï ECHOTYON Tororötïngwa. Möpïstönye pich kïrïp ECHOTYON Tororöt pö papotïnekwa ompö osiswo pöytoghin Yoasiya löwïr.