Read pokoot 2 OTÖPTINO OSIS 35 Bible Online

2 OTÖPTINO OSIS 35 - pokoot bible

2 OTÖPTINO OSIS 35

¹Kwam Yosia Ichon pö Pasaka ECHOTYON ompö kanasyanta Yerusalem kïpar wawa kech nyo kyomo Pasaka ompö asis nyo pö taman nko angwan nyo pö arawa akonga.

²Kïkïl tïsï akuporchï wölo mïchini kwighta ighisyengwa akukil chane ompö ighisyo Kö pö Tororöt.

³Kïlenchï pipö Lawi cho kinet pipö Israel löwïr nko cho kitïlilchï kegh ECHOTYON, “Otönö Santukunay pö Muma* tïlil köyay kitek Solomon wero Daudi, pöytoghinto Israel.

⁴Agha kegh kïrïp kegh nko koriko papotïnekwo, kïrïp kegh nko ortïnekwa le wölo kimwowuntö Daudi pöytoghinto Israel nko wölo kimwowuntö werïnyi Solomon.

⁵Oghyongenö wölo tïlil kïrïp kegh nko wölo kipöghisyeghtoy kintöghoghi ortïneko papotïnekwo atangaraka werkökwo, akany kïmi pich ompö kö anka tïkwïl nyo ghyongtoy pipö Lawi.

⁶Am Pasaka atïlil kegh, aghchï werkökwo amöros kïrïp kegh nko ngölyonto ECHOTYON nyo kimwowï Musa.”

⁷Kutö Yosia pich cho kimi atoni wara kechir nko wara ngöror cho le 30,000 nko eghin 3,000 kwama Ichon pö Pasaka, kipkana kyakichoni löwïr pighu pöytoghin.

⁸Kïpasta yetïntinechï tïkwïl tïkukwa ompö chomnyengwa kegh kutö pich nko tïsï nko pipö Lawi cho lenye ompö Ilkia, Sakaria nko Yeiel cho kighechön ompö Kö pö Tororöt.* Kinget Kö pö Tororöt cho echön kutö tïsï ropöw cho kyama Ichon pö Pasaka wara kechir nko wara ngaror 2,600 nko eghin 300.

⁹Kutötö tïkukwa tïkwïl Konania nko werkökwa ompö Syemaya nko Netanel. Kutötö Asyapia nko Yeiel nko Yosapad yetïntino pipö Lawi ropöwo Ichon pö Pasaka, kutö pipö Lawi, wara kechir nko wara ngaror 5,000 nko eghin 500.

¹⁰Nyini kimuchö tötut pö Ichon pö Pasaka kughyongö tïsï adekelyengwa akughyongö pipö Lawi nyingwa, le wölo lata ngölyonto pöytoghin.

¹¹Kïyeng warechay pö kechir pö Ichon pö Pasaka, atolapay kïcheng tïsï kisönko warechoni akwistö, aki pipö Lawi cho kiyengsyö.

¹²Kusir ropöwechay kïpelöy atö kïchaghta kïpeghategha kegh nko wölo kitöntoy koriko papotïnekwa pikökwa ropöw kïropchï ECHOTYON le wölo kikikirta ompö kitapu Musa. Kïropta lenyoni eghin tïkwïl.

¹³Kewatan wara kechir cho pö Ichon pö Pasaka kewatana ma le wölo kikïmwayta lö, mïchini kepelöy akeghogha ropöw cho tïlilöch tören nko wolinköntin nko kerontin, akesït lawel kepa kechaghta kechöghchï pich cho kimöpöghisïyicha ompö atoni.

¹⁴Nyini kyam pich omisyö kuwonyö, kwigh kegh ompöwölo kimi tïsï cho pö ara Aron kwighöy ighisyö nyo nïkis nyo kiroptoy ropöw cho kïpelöy ntökïtuwit. Kïlenyona kwighchï kegh pipö Lawi omisyö nko tïsi ara Aron.

¹⁵Kimi tumï cho pö ara Asap kumpuröy adekelyengwa kïrïpata kegh nko ngölyonto pöytoghin Daudi nko Asap nko Eman nko Yedutun ngorinto pöytoghin, akimi ripi kukat kughyongo kukat anka tïkwïl amöminye chi nyo kipïstö acheytanyi, ompöwölo kighchï werkökwa pipö Lawi chane omisyö.

¹⁶Kikigh ighisyo ECHOTYON löwïr asisoni tökyam Ichon pö Pasaka akeropta ropöw cho kïpelöy keroptegha ato kïpelo amöros pö ECHOTYON, le wölo kimwowuntö pöytoghintö Yosia.

¹⁷Kwam pipö Israel cho kimi atoni asisoni Pasaka akwam Ichon pö Makatin cho puryö Mumar osis mut nko odeny.

¹⁸Möminye Pasaka nyo lenye nyoni nyo kikyam ompö koro Israel kïngata osiswo werkoyon Samwel, amömicha pöytoghi Israel cho kigh Pasaka nyo lenye nyo kigh Yosia nko tïsï nko pipö Lawi nko pipö Yuda löwïr nko Israel cho kimi atoni nko möngi Yerusalem löwïr.

¹⁹Kikigh Pasaka nete ompö könyi 18 nyo pö paytaghpa Yosia.

²⁰Nyini kigh Yosia ngalechï löwïr kimuchö ompö Kö pö Tororöt, kïsetï Neko pöytoghinto Misri kïwö kïpar Karkemis wölo lekïto lalwa Yuparet kïnget Yosia kïwö kïpar kegh nko nyinte.

²¹Wölo kutötö Neko kut kutö Yosia lö, “Melö kangwïnan oporyö nko nyi pöytoghinto Yuda, melö kangwïnan osetyinyi, wölo pungköchan cho omitan oporsot tïkwïl, akömwowanïn Tororöt lö, igha lawel. Chïchïkena mepökek Tororöt nyo mi nko ani tömenyarïn.”

²²Wölo machamnye Yosia kïpïstö nyinte, kïwaghach kegh kïlïkwï chi anka lö tömenkïtï Neko otinö porsot tïkwïl. Malïmnye Yosia ngala Neko cho kipkono wölo mi Tororöt wölo kïlït poryot ompö ompölyonto Mekido.

²³Kïwut pipö kotï pöytoghin Yosia ompö atoni kïlenchï Yosia mötworichi, “Amïtante owan kikewutanïn kunyara.”

²⁴Kïsïtunö Mötworichi nkari akumïta nkari anka kutang Yerusalem. Kïma Yosia ketïpchï wölo kikïtïpchï papotïnechi. Kïlokyö pipö Yuda löwïr nko cho pö Yerusalem ompö Yosia.

²⁵Kimïn werkoyonta Yeremia tum nyo pö lok paraku megha Yosia. Tumöy tumï löwïr cho le mïrön nko cho le kor, tumwöy cho ngölono Yosia tökwompö nyete le ye akegh kïlïkwï osïl pö pipö Israel, akukirote ompö kitapu tumwöyi lok.

²⁶Kirote ighisyewut walak cho kigh pöytoghintö Yosia nko tïkwïn cho karamach cho kigh kïrïp kegh nko kirurut pö ECHOTYON,

²⁷nko ighisyewutkachi cho pö tagh nko cho pö löt, kï kikikirchï kitapu pöytoghi Israel nko Yuda.