Read pokoot 2 OTÖPTINO OSIS 36 Bible Online

2 OTÖPTINO OSIS 36 - pokoot bible

2 OTÖPTINO OSIS 36

¹Kwigh piko kore Yoaas wero Yosia kïlïkwï pöytoghin kuker paponyi ompö Yerusalem.

²Kitor Yoaas kipayta ato kïngeto könyis 23 kïpayta aro sömök ompö Yerusalem.

³Kungwïn pöytoghinto Misri kïnam Yoaas akunategha ompö Yerusalem, akwigh koro Yuda kïkwagh surï kilen 3,400 cho pö silpa nko kilen 34 cho pö koltin.

⁴Kwigh pöytoghinto Misri Elyakim werto ompö Yoaas kïlïkwï pöytoghinto Yuda, akïwaghach kaynenyi kïkurö Yeoyakim, wölo kuretö Neko Yoaas, werto ompö Eliyakim kïwö Misri.

⁵Kïtor Yeoyakim kïpayta ato kitïng könyis 25 kïpayta könyis taman nko akonga ompö Yerusalem. Kigh nyinte ngokï ompö tawu ECHOTYON Tororötïnyi.

⁶ Kungwïn Nepukadnesa pöytoghinto Papilon kupokyï Yuda atolapay kïnam Yeoyakim akïrata sïrïmtin akuretö kutang Papilon.

⁷Kurit Nepukadnesa kari Kö pö Tororöt walak kutang Papilon akïwö kutö konyi nyo pö paytagh ompö Papilon.

⁸Kirote ighisyewut walak cho kigh pöytoghintö Yeoyakim kïmi nko ngokichi nko tïkwïn walak cho ghach kitapu pöytoghi Israel nko Yuda. Kuker werïnyi Yeoyakin kïpayta.

⁹Kitor Yeoyakin kïpayta ato kitïng könyis mut nko sömök. Kïpayta aro sömök nko osis taman ompö Yerusalem. Kigh nyinte ngokï ompö tawu ECHOTYON.

¹⁰Nyini kiwonyö könyï, kuyoktö Nepukadnesa pich kïpa kurewï Yeoyakin kungwïn kerötyï Papilon nko kari Kö pö Tororöt cho pö olyot nyo wow, akwigh Sedekia werto ompö Yeoyakin kïpayta Yuda nko Yerusalem.

¹¹Kitor Sedekia kïpayta kïtïng könyis 21 kïpayta könyis taman nko akonga ompö Yerusalem.

¹²Kigh Sedekia ngokï ompö tawu ECHOTYON, amaternye ngala werkoyon Yeremia nyo kimwowu ngal cho pkono wölo mi Tororöt.

¹³Kitighintönchï Sedekia pöytoghin Nepukadnesa nyo kikikwigh Sedekia kwam muma lö, oteköy ompö kaynata Tororöt. Kïna kat Sedekia, akwigh mïkulöwunyi kwaghïghit amachamnye kïwaghaka wölo mi ECHOTYON Tororöt pö Israel.

¹⁴Kwigh tïsï tïkwïl cho kile kintöghoghï nko pikö walak ngokï cho kighöy pipö punton nyo kimöminye chi nyonikïny nyo kitïngeto kighanat ompö Tororöt. Kisïmnyon Kö pö Tororöt nyo kitïlilchï kegh ompö Yerusalem.

¹⁵Kuyoktö ECHOTYON Tororöto papotïnekwa mötworichi wölo mi chane kïnomnyö ompöwölo kisyonchini pikachi nko konyi pö saghat.

¹⁶Wölo kitas tagh kïpeny mötwori Tororöt, pirönö ngala Tororöt akïngem werkoykachi, tökïtenö kïnyölechï ECHOTYON pikachi tömökïminye wölo chïwïto.

¹⁷Kïlenyona kïyonchï ECHOTYON chane pöytoghinto Papilonia kungwïn kïpara chok chumwakökwa ompö cho kömi wölo tïlil. Kimötïngnye kisyonöt ompö karöchïnin anta työ, anta mïrön anta nyo kiyosit kitö chane löwïr mori pöytoghinto Papilon.

¹⁸Kurit kari Kö pö Tororöt löwïr cho echön nko cho mïnkech nko tïpö Kö pö Tororöt cho pö olyot nyo wow nko cho pö pöytoghin nko rïpaniskachi. Kurit tïkuchete löwïr kïpa Papilon.

¹⁹Kïpel Kö pö Tororöt akurultö nïyetwo Yerusalem akïpela ma kori pöytoghin cho pö paytagh akunyar kari löwïr cho pö olyot nyo wow.

²⁰Kïnam pich löwïr cho kichïwïtyeghö ngot akïrang kïpa Papilon kïlïkwï mötworichi nko cho pö werkachi tökïtenö kwit kitoröto paytaghpa Pasya.

²¹Kïpïntö nyu ngölyonto ECHOTYON nyo kimwa kuwerï werkoyon Yeremia lö, kïpïstoy koronï kïtöpö möngorönye chi, akwosiswechoni löwïr töpo kumungöy, kïmi kupuntoy könyis 70.

²²Kigh ECHOTYON Sayras pöytoghinto Pasya ompö könyito tagh nyo pö paytaghtanyi kïmwatïta akukirchï paytaghtanyi kïmïkul ngalechï. Kïpïntö nyu ngölyonto ECHOTYON nyo kimwa kuwerï kutï Yeremia. Kikir lö:

²³Mwoghöy Sayras pöytoghinto Pasya lö, “Kikonanïn ECHOTYON Tororöt apayta ngwïny kïmïkul akïmwowanïn atekyï nyinte kö ompö Yerusalem nyo mi koro Yuda. Ye nyu chi löwïr nyo ichï chi pö ECHOTYON kïtöpö ECHOTYON Tororötïnyi nko nyinte, akany kïwö.”