Read pokoot 2 OTÖPTINO OSIS 6 Bible Online

2 OTÖPTINO OSIS 6 - pokoot bible

2 OTÖPTINO OSIS 6

¹Atolapay kïsagh Solomon lö, “ECHOTYON kikïlanyi manga wölo tuw lö, mïs.

²Kotekunyi ye nyu kö nyo töror nyo imöngenyi kokay.”

³Atolapay kïwaghaka pöytoghintö Solomon kïtopön tuyo pipö Israel cho kighyongöy akusoyön.

⁴Kïlö, “Nya kïsala ECHOTYON Tororöt pö Israel nyo ompö owesyenyi, kikupuntö ayomistanyi nyo kiyomis paponyan Daudi, kïlenchï,

⁵‘Melö mi kanasyanta anka tïkwïl nyo kyakïlan ompö koro Israel kïmïkul nyo kiteköy kö nyo kïsoghenanïn amakïlanye chi anka tïkwïl kïpayta chane kïngata atanye kyomïtunonan pikachu koro Misri.

⁶Wölo kakïlan ye nyu Yerusalem kïlïkwï wölo kïsoghenanïn, akïl Daudi kïpayta pikachu.’

⁷“Kimi kïpsach paponyan Daudi kïtekyï kö ECHOTYON Tororöt pö Israel.

⁸Wölo kïlenchï ECHOTYON nyinte, ‘Karam nyoman nananyi ompö mïkulöwungu lö, oteköy kö nyo kïsoghenanïn.’

⁹Wölo mönyinye nyo iteköy köyoni, tekwanïn werïngu nyo ngwïno portöngu wölo kïsoghenanïn.

¹⁰Köpïntö ye nyu ngölyonto ECHOTYON nyo kimwa ompöwölo kakeran paponyu otöpö ngacharu paytaghpa pipö Israel, le wölo kiyomis ECHOTYON akyatekan Kö pö ECHOTYON Tororöt pö Israel kö nyo kïsogho nyinte,

¹¹Kyotönön oripö Köyoni Santuku Muma,* mi ori Muma nyo kyam ECHOTYON nko pipö Israel.”

¹²Atolapay kïwö Solomon kughyongö tawu ato kïpelo amöros pö ECHOTYON kïsïwïyi nyoryogh pö pipö Israel kïmïkul akïsyol ewunechi.

¹³Kimi ato syolote nyo kigh Solomon kwigha kari taghoy cho pïröch nyo kile miten 2.2 koghïntanyi nko töpesïntanyi, aki miten 1.3 kutok. Kitö ato le kwen akïlany akughyongö paraku kïyoni atolapay kïkïtïng akïsyol ewunechi kïpa yïm ompö tawu nyoryogh pö pipö Israel kïmïkul.

¹⁴Akïlö, “We ECHOTYON Tororöt pö Israel, möminye tororöt anka nyo mi yïm anta ngwïny nyo latanyi! Iripenyi muma* nyo kyamanyi nko piköku, aiporchini chomnyogh nyo möngötönye chane cho rïpöy kirurutköku ompö mïkuliskökwa kïmïkul.

¹⁵Kiripönyi kiyomisötengu nyo kimwochinyi paponyan Daudi. Köpïntö ngölyon anka tïkwïl nyo kimwochinyi nyinte asete.

¹⁶Kïlenyona we ECHOTYON Tororöt pö Israel ipuntechï mötworintengu paponyan Daudi kiyomisötengu nyo kimwaghanyi lö, ‘Möngetonye konyi ngacharu paytagh ompö Israel ato kïr werkachi otöptinekwa kïnam kirurutköchan le wölo kiriptenyi ompö tawunyan.’

¹⁷Kïlenyona ye nyu, we ECHOTYON Tororöt pö Israel, ikany kïpïntö ngölyontengu nyo kiyomisönyi mötworintengu Daudi.

¹⁸“Wölo, ekumuköy nyoman Tororöt kïmang nko ptangengmöt ompö ngwïnyï? Rose ompö lö mömïchininyinye yïmö anta yïm wölnö imöngenyi, tya nyu köyï katekan nyo mukinyi?

¹⁹Wölo iterchï mötworintengu saghatenyi nko somötenyi we ECHOTYON Tororötïnyu ailïm möchutkachi nko sowut cho soghöy mötworintengu asete ompö tawungu.

²⁰Irip köyï pöghet nko nangat, otete kiyomisönyi lö, otöni kaynenyu, iter saghat nyo soghöy mötworintengu ato pöru oteteyi.

²¹Iter sowutko mötworintengu nko cho pö piköku Israel, ato soghöy kïpöru yeteyi o teranyi ompö yïm wölini le möngengu, akwotini kelïmanyi ilöstoghchï.

²²“Atö lelchï chi pöröryenyi akemwochï nyinte kwam muma, akungwïn kuwalwal ompö tawu ato kïpelo amörostöngu ompö Köyï.

²³Teranyi ompö yïm aigh, airwokyï mötworiku. Tönö chi sitenyi kïrïp kegh nko lelutyenyi, ipïstö nyinö puryö lelut kïwö nyo karam, kïrïp kegh nko mantanyi.

²⁴“Ato rïnta pung piköku pö Israel ompöwölo kegh ngokï akïpka chane kughewï wölo imitenyi akïkur kaynengu ompö saghat akïkurinyi ompö köyetenyï.

²⁵Iter ompö yïm, ailasta ngoki piköku Israel aimïtï chane ngat kïpka kor nyo kiyomisyinyi chane nko kukötinekwa.

²⁶“Ato pech korö akupot ilat ompöwölo keghunyi piköku ngokï, akïkötö ngokikwa akïpka chane wölo imitenyi ompö rïngata kegh ompö köyete kïsogheninyi,

²⁷iter ompö yïm, ailöstoghchï mötworiku ngokikwa nko piköku pipö Israel, inetenyi chane or nyo karam kïpestegha, airopönchï koronete le nyengu kitönönyi piköku kïlïkwï mïlatengwa.

²⁸“Ato ngwïn kömöy kor anta sömew nyo gha anta pech anta cheptayta anta ngwïn talamnya anta ptölök anta pokyï pung piköku itï sömewö anta kichïr ompö kwenungwa,

²⁹saghat anta somöt anka tïkwïl nyo ngwïno chi kegh anta nyo ngwïno pipö Israel löwïr, kunkït chi tïkwïl nyarïltanyi nko kisusutyenyi akïsyol ewunekwa kïpörï köyï pö saghat,

³⁰itera ompö yïm wöloni imöngöy, ailöstoghchï, aighchï löwïr cho inkïtönyi kïrïp kegh nko wölo lata otöptinekwa (ompöwölo nyi onkït nyo inkït mïkulöwu ptangengmöt).

³¹Atökumï chane kïkonyïtinyi akïrïp ortïneku osis löwïr cho tenö cho möngöy kor nyo kitönönyi papotïnecha.

³²“Kïkany ato ngwïn pïnotyonto kor nyo melö pö piköku Israel, ngwïna wölo low ompöwölo kalïm ororyö nyo pö kaynengu nko ighisyewutköku cho echön nko ewungu nyo awes, ato kingwïn kïsagh kïpörï köyï,

³³atera nyinte aighchï kïgh nyo tepinyi atökunkïtunyi pich löwïr cho pö ngwïny, akïkonyïtinyi kïle ato ighöy piköku cho pö Israel, ntökunkïtï lö, köyï katekan kï wölo kïkwoleninyi.

³⁴“Ato set piköku kïpa kïporyö nko pungkökwa kïrïp kegh nko wölo kemwochintenyi akïsaghinyi chane kïpöru kanasyantanete kikïlanyi nko köyï kyotekunyi,

³⁵iter nyu ompö yïm sowutkökwa nko somutkökwa aitö chane owesyö kïrïnta pungkökwa.

³⁶“Akï ato ighwunyi ngokï, ompöwölo möminye chi nyo meghöynye ngokï, ainarekanyi aipïsyinyi chane pungkökwa, kïnam akïrang kïpa kor nyo low anta nyo lekït,

³⁷kïkany ato nonsyö ompö mïkuliskökwa ompö korononi kikïrongchï chane, akïkötö akïlokyinyi ompö wöloni kikïröngchï lö, kikeghacha ngokï kikepotyecha, kikeghacha ghöyityö.

³⁸Ato kötö chane ompö mïkulögh nko söpontöngwa kïmïkul ompö korononi kikïrang chane, wöloni kikimït kïlïkwï sekey, akïsagh kïpörtoy korengwa nyo kitönönyi kukötinekwa kanasyan nyo kikïlanyi nko kö nyo kyotekunyi,

³⁹iter nyu sowutkökwa nko somutkökwa ompö yïm wöloni le möngengu, ingarak chane ailöstoghchï piköku cho ighwunyi ngokï.

⁴⁰“Ye nyu we Tororötïnyu, nya kïyotisyö konyiku akïter yitiku saghat ompö yeteyi.

⁴¹Ngeta ye nyu, we ECHOTYON, aiwö wölo imungo, nyi nko Santuku Muma, nyoni kï macheypa owesyengu. Nya kulach tïsiku sörunöt, we ECHOTYON Tororöt, aikany kïngörekyö cho ghöninyi ompö köromnyengu.

⁴²We ECHOTYON Tororöt, metagh nyinte nyo kiyilanyi. Nane chomnyengu nyo mewonyotnye nyo kichamanyi Daudi mötworintengu.”