Read pokoot 2 OTÖPTINO OSIS 8 Bible Online

2 OTÖPTINO OSIS 8 - pokoot bible

2 OTÖPTINO OSIS 8

¹Otini kiwonyö könyiswö cho le tömönut odeny, cho kiteka Solomon Kö pö Tororöt nko konyi kegh.

²Kïtek Solomon kanastin cho kikikutö Uram nyinte, akutö pipö Israel kïmang.

³Kïset Solomon kïwö Amat Sopa, akïrïnta

⁴akïtek kanasyanta Tadmor ompö surkwen nko kanastin löwïr cho kïrorchini tïkwïn ompö Amat.

⁵Kitek tïkwïl Pet Oron nyo toka nko Pet Oron nyo porö, kanastin cho kikiwak, cho kitïng nïyet nko kukot nko köröwe,

⁶nko Paalat nko kanastinechï pö kaplawach löwïr cho kitïng töpoton nko cho pö nkarinechi nko kanastin cho pö pich cho ipöy angoletinechi nko kïgh anka tïkwïl nyo kimököy Solomon kïteköy ompö Yerusalem nko ompö Lepanon nko ompö kor löwïr wölo kitöy paytaghtanyi.

⁷Pich löwïr nyu cho kidong cho melö ki pö pipö Israel pipö Ititi nko Amori nko Peris nko Ipiti nko Yepusi.

⁸Kigh Solomon monïngo pïchoni kidong korononi cho kimaparcha pipö Israel kïkwöghchï nyinte surï, atökïlenye nyoni nko nyete le ye.

⁹Wölo meghnye Solomon pipö Israel kïlïkwï sekeykachi. Kilïkwï chane pich cho pö lïk nko yetïntino pich cho setöy lïkos nko cho kisetöy pich cho ipöy angoletin kïpa poryot nko cho kipöy angoletine.

¹⁰Kitïng Solomon kirwokot cho kintöghoghchïn pich cho kile 250.

¹¹Kiwuwï nyu Solomon chepö Parao kuwuwunö kanasyanta Daudi kungwïn kïmang kö nyo kitekyï nyinte, ompöwölo kimwa lö, “Mömöngönye korkenyan kö pö Daudi pöytoghinto Israel ompöwölo tïlil wop anka tïkwïl wölo mi Santuku Muma* ECHOTYON.”

¹²Atolapay kïropchï Solomon ECHOTYON ropöw cho kïpelöy ompö ato kïpelo amöros nyo kitekyï körkör tagh ompö tawu Kö pö Tororöt.*

¹³Kipel amörostin kïrïp kegh nko Kirurut pö Musa ompö asis anka tïkwïl nyo tïlil, choni kï: Sapatotin* nko Ichontino Relïn pö Arawa nko ichontin sömök cho echön, choni kï: Ichon pö Makatin cho puryö Mumar nko Ichon pö Ilö nko Ichon pö Tunkun.

¹⁴Kitat wölo ightoy tïsï ighisyengwa le wölo kidoy paponyi Daudi, kutö pipö Lawi pöghisyengwa nyo pö sölut nko kintaghoghat ompö tawu tïsï kïrïp kegh nko ighisyo asis anka tïkwïl, kuyomis ripi kukot kwigh pöghisyengwa lasiny ompö kukat anka tïkwïl, ompöwölo lenye nyoni wölo kiyomistö chi pö Tororöt Daudi.

¹⁵Amöpïstöcha ngala pöytoghin cho kitötyï tïsï nko pipö Lawi kïrïp kegh nko ngölyon anka tïkwïl anta kïrïp kegh nko ngala kaplawachtin.

¹⁶Kïlenyona kegh ighisyö löwïr nyo pö Solomon kïngeta otini kikïparta pölöwo Kö pö ECHOTYON Tororöt ntökïtenö kewany, kuwonyö nyu ighisyo Kö pö Tororöt.

¹⁷Atolapay kïwö Solomon kutang Esyonkeper akurel Elot, cho mi sörömu nanam nyo mi koro Edom.

¹⁸Kiyoktö Uram mötworichi kwipchï Solomon melin nko pich cho kinkït akinaghta ngala nanam, kïpa ntö kurel Opir, kimi nko mötwori Solomon. Kwipunö wöloni koltin cho le tantin taman nko mut kwipchï Solomon pöytoghin.