Read pokoot 2 OTÖPTINO OSIS 9 Bible Online

2 OTÖPTINO OSIS 9 - pokoot bible

2 OTÖPTINO OSIS 9

¹Otini kilïm pöytoghinto Syepa nyo kile korka ororyo Solomon kungwïn Yerusalem kïtyam nyinte ompö teput cho ongeröch, kingwïnöy kokononi nko söpïch nyo wow akirongu tamasay cho kikösönu tïkwïn cho ngutoy cho onyïn nko koltin cho chang nko koghïn cho pö olyot nyo wow. Otini kirel wölo mi Solomon kïmwochï ngal löwïr cho kitïng ompö mïkulöwunyi.

²Kuyokyï Solomon kokononi teputkachi löwïr, kimöminye teputyö nyo kipöl Solomon kuyokyï nyinte.

³Otini kiwany pöytoghinto Syepa kïghot ngöghomnyo Solomon, akïsïwa kö nyo kitek,

⁴nko omisyö nyo kipu mesenyi nko wölini kitöptoy pikachi cho lekïto nyinte wölo nko pöghisyeghtoy mötworichi cho pöghisyechini nyinte nko sïrokökwa nko amörostin cho kïpelöy cho kitötegho Kö pö Tororöt, kïtöngönchï nyoman.

⁵Kïlenchï kokononi pöytoghin, “Pö man ngaleku cho kyalïman korenyu kegh, kyalïman ighisyewutköku nko ngöghomnyengu.

⁶Wölo kimaghananye ngala pïchoni ntökïtenö angwïnan ante asïwegha konyichu. Mömwowanïnye chi nyo le ompö nïsu wowïnto ngöghomnyengu, tïlat ngaleku cho kyalïman kasïwan cho kyalïman.

⁷Tïng ngörekyö koruku akïtïng ngörekyö mötworiku cho ghyongo tawungu osis löwïr kïteröy ngöghomnyengu.

⁸Nya kusoyönö ECHOTYON Tororötïngu nyo kingörökyinyi akutöninyi ngacharunyi nyo pö paytagh, tepaytena ompö kaynenyi, ompöwölo kicham nyinte Israel, akukïmkimöy kokay. Keghinyi lïkuna pöytoghin ompö chane, ategha man.”

⁹Atolapay kutö pöytoghintononi le korka kingwïno Syepa pöytoghin Solomon koltin cho le kilen 4,000 nko tïku walak cho chang cho ngutoy cho onyïn nko köghïn cho pö olyot nyo wow. Kimöminye tïku walaka cho kingutoy cho onyïn le choni, kipchï kokononi kingwïno Syepa pöytoghin Solomon.

¹⁰Kwipï ngat mötwori Uram nko cho pö Solomon koltin kïpkana Opir nko keti alkum nko koghïn cho pö olyot nyo wow.

¹¹Kigh pöytoghintö ompö keti alkum wölo kïpustegho kepetöy Kö pö Tororöt* nko kö pö pöytoghin nko pïkantis cho pö tumï möminye akong ompö choni cho kikikesïwechï koro Yuda.

¹²Kutö pöytoghintö Solomon pöytoghinto Syepa kïgh anka tïkwïl nyo kipïrchini nko kïgh anka tïkwïl nyo kisom, kitö cho chang kïtïl cho kipchï pöytoghintononi le korka nyinte. Atolapay kïmïla pöytoghintonay le korka kutang korenyi nko mötworichi.

¹³Kinyoru pöytoghintö Solomon tantin 23 cho pö koltin ompö könyi anka tïkwïl.

¹⁴Kïsis surï cho kipu mïnchïrïs. Kipï pöytoghi Arapia löwïr nko kintöghoghi koros pö Israel silpa nko koltin kwipchï Solomon.

¹⁵Kwigh pöytoghintö Solomon longoy cho echön 200 kwigha koltin cho kikitany, kigha kilen sömök nko nïsï longoy aka tïkwïl,

¹⁶akwigha longokö walak 300. Kikïmina anka tïkwïl koltin kilen sömök akïrorchï löwïr Kö pö Wuw pö Lepanon.

¹⁷Kigh ngat pöytoghintö ngachar nyo wow nyo pö paytagh kwigha kela pelöw akuluma koltin cho pïchighöch.

¹⁸Kikighchï ngacharunoni koghïn cho le kïlontegho cho mut nko akonga nko ngacharu anka nyo kikönoghöy kelyon nyo kikigha koltin, nyo kikinomnyö nko ngacharu paytagh, kikighchï ngacharunoni onkunini nko onkunini wölo kikönoghöy ewun, akeghchï ngötuny odeny ompö patawu atoni kikönoghöy ewun.

¹⁹Kimi körkeyïntino ngötuny cho le taman nko odeny cho kikighchï söremwok pö wölay kïpustegho le mut nko akonga. Kimöminye nyo kikigh lenyoni ompö koros löwïr.

²⁰Mpalawis kikigha karïn löwïr cho kigheghsyegho pöytoghintö Solomon koltin, kikigha koltin karin löwïr cho kipö kö pö paytagh nyo kimi wuw pö Lepanon. Kilenye kwïle silpa ompö osiswo Solomon.

²¹Ompöwölo kitïng pöytoghintö melin cho kipetöy Tarsis nko mötwori Uram akipkono melinechoni Tarsis kïnyïl akonga ompö könyis sömök, kwipu koltin nko silpa nko kela pelöw nko tïkwïn cho lata möyosoy nko törit cho tïng sonkol cho pïchighöch.

²²Kïlenyona kitïlat pöytoghintö Solomon pöytoghi ngwïny kïmïkul ompö sïkönöt nko ngöghomnyö.

²³Kiyöröy pöytoghi ngwïny kïmïkul wölo mi Solomon atökïlïm ngöghomnyö nyo kitö Tororöt nyinte.

²⁴Kingwïnöy anka tïkwïl wölo mi Solomon nko ropöwo kari silpa nko koltin nko anankis nko kari lïk nko tïkwïn cho ngutoy cho onyïn nko angoletin nko sïkïröy. Kipkonöy kïnomnyö ompö köny anka tïkwïl.

²⁵Kitïng Solomon pighway 4,000 cho pö angoletin nko nkarinekwa nko mïrön 12,000 cho pegho angoletin, cho kitö kanastina nkaritin nko cho kimi wölo mi pöytoghintö ompö Yerusalem.

²⁶Kipayta Solomon pöytoghï löwïr kïngeta lalwa Yuparet ntökwit koro pipö Pilisti akïnam rotyo koro Misri.

²⁷Kigh pöytoghintö Solomon silpen kïnyam le koghïn ompö Yerusalem, akimi tarakit cho chang le makany pö Syepela.

²⁸Kikipï angoletino Solomon kïpkana Misri nko koroswe walak löwïr.

²⁹Kirote ighisyewut löwïr cho kigh pöytoghintö Solomon kïngata söröm nko söröm kitapu werkoyon Natan nko werkoynöno Aiya nyo pö Syilo nko kiporut pö Kirosinto Ido nyo kisïwa ngala Yeropoam wero Nepat?

³⁰Kipayta Solomon Israel kïmïkul ompö Yerusalem könyis tömönut angwan.

³¹Kïma Solomon aketïpchï kanasyanteto kwanta Daudi, kuker werïnyi Reopoam nyinte kïpayta.