Read pokoot ESRA 4 Bible Online

ESRA 4 - pokoot bible

ESRA 4

¹Nyini kilïm pung pö pipö Yuda nko cho pö Penchamen lö kitek tïkay kipkana pïnotön Kö pö ECHOTYON Tororöt pö Israel,

²kïpa kïnyorï Serupapel nko poyi ortïn akïlenchï, “Akanya keteksyenöcha nko akwa ompöwölo kïsoghecha Tororötïnkwa lenyini osoghekwa akikitönöcha amörostin nyinte kïngata osiswo Esaradon pöytoghinto Asirya nyo kimïtwecha wölete.”

³Wölo kïlenchï Serupapel nko Yoswö nko poyi ortïn chane, “Melö kïtïngecha kïgh akwa ompö teksyo Kö pö Tororötïncha,* kïtekyinecha achane ECHOTYON Tororötïncha lenyini kamwa Sayras pöytoghinto Pasya.”

⁴Atolapay kwigh piko korononi pipö Yuda kïmeghö mutïnö akuwöghisyö kïteksyö.

⁵Atolapay kïwïkyï soch kusus chane. Kigh lenyoni kïnomnyö ompö osiswo Sayras pöytoghinto Pasya ntökutomï paytaghpa Daryas.

⁶Kukir palalyan pung kusitakïn pich cho kimöngöy koro Yuda nko kanasyanta Yerusalem otini kitor Aasuero kïpayta.

⁷Kikir palalyan tïkwïl Pislam nko Mitredat nko Tapeel nko söpïchtöngwa kukirchï Artakerkes pöytoghinto Pasya. Kikikira palalyante ngala Aram akewaghach.

⁸Kikir palalyan Reum nyo kile yetïn pö lïk nko kikirin Syimsyay, kukirchï Artakerkes kusitakïn pipö Yerusalem lö,

⁹“Kakikiracha palalyantanï, Reum nyo le yetïn pö lïk nko Syimsyay kikirin nko söpïchtöncha nko kirwokï nko echot nko wowïntin nko pipö Pasya cho kipkana Erek nko Papilon nko Susa ompö koro Elam

¹⁰nko pïchay löwïr kiwuwunö Osnapar nyo awes akutö kïmang kanasyanta Samaria nko kore löwïr ntökïnam lalwa Yuparet okumpö ta.”

¹¹Chï kï ngal cho kikikir ompö palalyan, “Ompö Artakerkes pöytoghin, taka takwes. Kïchicha mötworiku cho kïpkono lalwa Yuparet okumpö ta.

¹²Nkïtunö ye we pöytoghin lö, kipkana pipö Yaudi wöloni imitenyi akïmöngisyö wöl akïtek ngat Yerusalem kanasyantanay le penyin akï mwokïyon. Karich ye kuwany nïyetkö.

¹³Nyo nkïtunö ye, we pöytoghin, lö nyini kateka ngat kanasyantanï nko nïyetkachi kï melö tökïkwöghöy pïchï surï, kwapta nyu mïloto ropïyeni pöytoghin.

¹⁴Ompöwölo kikyamacha muma kekonyïtö pöyunötengu, kï melö kïchömecha kerose kerotinyi, kïlenyona nka nyï kakïmwowucha nyi, we pöytoghin,

¹⁵atemwatïtena keyar ngal cho mi kitapuna papotïneku atesïwena lö penyin kanasyantanoni nyo kisus echot nko pöytoghï kïngeta köny, nka nyoni kikïpar kïlïkwï kïratyan.

¹⁶Kïlenyona kïmwowucha nyi lö nyini kateka ngat kanasyantanï nko nïyetkachi, kïmelö tepöytonenyi koronï mi lalwa Yuparet okumpö ta.”

¹⁷Kïlenyona kukirta pöytoghintö palalyan lö, “Ompö, Reum yetïn pö lïk nko Syimsyay kikirin nko söpïchtönkwa cho möngöy Samaria nko pich löwïr cho möngöy lalwa Yuparet antakwagh okumpö ta. Takwes akwa löwïr.

¹⁸Kakisomönwanïn palalyantanay kyoyokwanïkwa.

¹⁹Akamwatïtan keyar ompö kitapun ngala kanasyantanï akikenyorï lö kimelö kikonyïtöy Yerusalem pöytoghï akitïng penyï nko kisurï.

²⁰Kikïpayta pöytoghï walaka cho owesöch korononi mi lalwa Yuparet okumpö ta akikwöghchï surï.

²¹Kïlenyona kamwaghan ye lö, omwochinö pïchona kïpïstö kïtek kanasyantanï ngat, ntökïtenö kungwïna ngölyon wölo omitan.

²²Agha ngalechï lawel tomökunyara pöyunötenyan.”

²³Kïlenyona nyini kikisomönchï Reum nko Syimsyay nko söpïchtöngwa palalyanta pöytoghin Artakerkes, kïpa lawel Yerusalem wölo mi pipö Yaudi akïpa kïyon chane ompö kat kïpïstö teksyö.

²⁴Kepïstö nyu tekata Kö pö Tororöt ompö Yerusalem ntökuwer könyiswö odeny ompö paytaghpa Daryas pöytoghinto Pasya.