Read pokoot ESRA 5 Bible Online

ESRA 5 - pokoot bible

ESRA 5

¹Kïngorsyö nyu Akay nko Sakaria wero Ido werkoyi pipö Yaudi cho mi koro Yuda nko Yerusalem ompö kaynata Tororöt pö Israel.

²Kïlenyona kutor Serupapel wero Syealtiel nko Yoswö wero Yosadak akïtek ngat Kö pö Tororöt* ompö Yerusalem akimi werkoyi Tororöt kungöroköy chane.

³Kïnyini kwitï yetïn nyo pö lalwa Yuparet okumpö ta nyo kïkuro Tatenay nko Syetar Posenay nko yetïntine walaka akïlenchï chane, “Ngo nyï kölenchokwa ateka Köyï pö Tororöt amin le nyï?”

⁴Akïtep[2] ngat lö, “Ompö ngo chï mi kiteksïyi?”

⁵Wölo kimi Tororöt nko poyi pipö Yaudi. Kimelö kimï kwida yetïntino Pasyan kïgh chane, wölo kikany ntökukirta palalyan kïwö wölo mi Daryas tökuyokyï chane kut.

⁶Achï nyu ngale cho kikirta Tetanay, yetïn pö okumpö ta nyo pö Yuparet nko Syetar Posenay nko yetïntin walaka kukirchï pöytoghin Daryas:

⁷“Ompö nyi, pöytoghin Daryas, ipayta ompö kalya.

⁸“Kikïpecha, we pöytoghin, koro Yuda, kepa keros Köyay pö Tororöt nyo wow kïmi keteko koghïn cho echön aketekchï pïrompur nïyetkachi. Mi pöghisyononi kuletöy tagh ompö ngöghomnyö nko tïnganat.

⁹“Atolapay ketepacha poyichoni lö, ‘Ngo nyï kölenchokwa ateka Köyï pö Tororöt amin le nyï?’

¹⁰Aketepacha tïkwïl kaynötut pö poyikwa tökemwowuchanyi.

¹¹“Kïlenchecha chane, ‘Kïchicha mötwori Tororöt nyo kigh yïm nko ngwïny akemicha keteköy köyay, kitek pöytoghinto Israel nyo awes könyisyok akïmin.

¹²Akwompöwölo kigh papotïnecha Tororöt pö yïm kïnarek, kutö nyinte chane mori Nepukadnesa pöytoghinto koro Papilonia, chi pö Papilonia kïpar Köyï pö Tororöt akïrang pikö kïlïkwï pïnot ompö koro Papilon.

¹³Kïlenyona ketïpï ato mi könyi tagh nyo pö Kores pöytoghinto Papilon, kïlö Sayras, “Mïchini ketek ngat Köyï pö Tororöt.”

¹⁴Keyokwï karichay pö koltin nko cho pö silpa cho kichenga Nepukadnesa Kö pö Tororöt ompö Yerusalem akwip kutö kö pö tororötïnyi ompö Papilon. Kichengwï tïkuchoni Sayras akutö chi nyo kïkuro Syespasar nyo kigh kïlïkwï yetïn pö Yuda

¹⁵akïlenchï nyinte, “Achï karichï ipö aiwö itö Kö pö Tororöt nyo mi Yerusalem aikany ketek Kö pö Tororöt otini kimi.”

¹⁶Kungwïn nyu Syespasar akutor kïtek Köyay pö Tororöt mi Yerusalem. Kïngata atoni nko ye tökemi keteköy akïtomönye kuwonyö.’

¹⁷“Kïlenyona ato sïwïyi pöytoghintö lö karam, ikany keyar ompö kitapun ompö Papilon ato mi ngölyon nyo kimwa Sayras lö, ‘Ateka ngat Köyï pö Tororöt ompö Yerusalem.’ Atolapay imwowecha ngölyon nyo imutenyi ompö ngalechï.”