Read pokoot ESRA 6 Bible Online

ESRA 6 - pokoot bible

ESRA 6

¹Kïlenyona nyu kïmwatïta Daryas pöytoghintö keyar ngalechï ompö kö nyo kïrorchini kitapun koro Papilonia.

²Kenyorï palalyan ompö kanasyanta Ekpatana nyo mi koro Mede nyo kikir lö,

³“Kimwatïta Sayras ompö könyi tagh nyo pö paytaghtanyi ketek ngat Kö pö Tororöt* ompö Yerusalem ato kitötegho ropöw nko amörostin cho kipelöy. Koghïntanyi kutoch nko töpesïntanyi kï miten 27.

⁴Kïteko nïyetkö koghïn kuwit sömök aketö pïrompur kuwit akonga. Akïghoktoy kaplawachpa pöytoghin.

⁵Akany keyoda kari koltin nko cho pö silpa kutang Kö pö Tororöt ompö Yerusalem, chay kip Nepukadnesa Papilon.”

⁶Atolapay kuyoktö Daryas palalyantanï lentöy, “Ompö Tatenay yetïn pö lalwa Yuparet okumpö ta nko Syetar Posenay nko yetïntine walaka ompö korononi. “Amala kegh ighisyo Kö pö Tororöt

⁷apïstö yetïn pö koro Yuda nko poyi pipö Yaudi kïtek ngat Kö pö Tororöt otini kimi tagh.

⁸Kïlenyona omökan angarakakwa chane ompö teksyononi pö Kö pö Tororöt. Kïghokchini chane panini ompö kaplawachpa pöytoghin ompö surï cho kïkwögho lalwa Yuparet okumpö ta.

⁹Atolapay otö kïgh anka tïkwïl nyo chopöy chane, ato kö ngartin anta mökol anta kechir cho pö amörostin cho kïpelöy ketoni Tororöt pö yïm. Otötö pagh nko partin nko dipay* nko mwaghpa orolwö le otini mököy tïsï ompö Yerusalem kïtenö osis.

¹⁰Tökutötö amörostin cho chömöy Tororöt pö yïm, akïsoghchï pöytoghin nko werkachi.

¹¹Omwoghan ye nyu lö chi anka tïkwïl nyo wöghököy ngölyontonï, kengongöy ket pö konyi akepara nyinte kurel akenyar kot.

¹²Nya kïrïnta Tororöt nyï kacham kaynenyi kïtöpö Yerusalem pöytoghin anka tïkwïl anta pich cho lentöy kïwöghököy ngölyontonï anta cho lentöy kinyoröy Köyï pö Tororöt ompö Yerusalem. Ani Daryas nyo kamwagh. Agh lenyoni ompö chïreryö.”

¹³Kïlenyona kwigh Tatenay yetïn pö lalwa Yuparet okumpö ta nko Syetar Posenay nko yetïntin walaka lenyini kimwa Daryas pöytoghintö.

¹⁴Kitas tagh nko teksyö poyi pipö Yaudi akuchïchimöy chane werkoyon Akay nko Sakaria wero Ido. Kuwany köyay lenyini kimwa Tororöt pö Israel akïmwa Sayras nko Daryas nko Artakerkes cho kile pöytoghi Pasya.

¹⁵Kuwonyö nyu Köyay pö Tororöt asispa sömök arawa Adar* könyi mut nko akonga nyo pö paytaghpa Daryas.

¹⁶Kïngörekyö nyu pipö Israel löwïr cho le tïsï nko pipö Lawi nko pïnotkö löwïr cho kimïlisyö. Atolapay kutïlil köyay pö Tororöt ompö ngörekyö.

¹⁷Otini kitïlil köyay pö Tororöt, kutötö eghin 100 nko mökol 200 nko wara kechir 400 le amörostin nko kwöghe taman nko odeny cho pö ropöwo ngokï, kïrïp kegh nko ortïna pipö Israel.

¹⁸Atolapay ketötyï tïsï nko pipö Lawi ighisyewutkökwa cho ighöy ompö Kö pö Tororöt ompö Yerusalem le otini kikikir ompö kitapu Musa.

¹⁹Kwam nyu pïnotï Ichon pö Pasaka ompö asispa taman nko angwan nyo pö arawa tagh.

²⁰Kutïlil kegh tïsï nko pipö Lawi löwïr, kïlenyona kïpörchï chane wawa kech nyo pö Pasaka pïnotchay kimïlisyö nko tïsï nko achane kegh.

²¹Kyam pipö Israel cho kimïlisyeghö pïnotön nko anka tïkwïl nyo kipïstö tororötino pipö korononi atökïsagh ECHOTYON Tororöt pö Israel.

²²Atolapay kwam Ichon pö Makatin cho puryö Mumar osis mut nko odeny ompö ngörekyö, ompöwölo kegh ECHOTYON chane kïngörekyö akwigh mïkulöwu pöytoghinto Asirya kïcham kungarak chane ompö teksyo Kö pö Tororöt pö Israel.