Read pokoot ESRA 9 Bible Online

ESRA 9 - pokoot bible

ESRA 9

¹Nyini kewanta kegh tïkuchï löwïr, kipkonchanïn kintöghoghï akïlö, “Melö kamala kegh pipö Israel nko tïsï nko pipö Lawi pipö punton ompö sïmnyontönengwa. Choni kï pipö Kanan nko Ititi nko Peris nko Yepusi nko Amon nko Moap nko Misri nko Amori.

²Kwip chane tipi pïchoni nyo kegh pipö Tororöt cho tïlilöch kukulkulyö kegh nko chane. Akï kintöghoghï nko kirwokot cho kenyorisyö tya.”

³Nyini kyalïman lenyoni apalpalan sïrokachu kuporï nyarïltanyan angaghan puto möt nko tamughye arönchan kegh.

⁴Atolapay otöpan ngwïny asönönön ntökïtenö ketötö ropöwo mönon. Kïghömïtyï kegh pich wölo omitan cho kyotyö ompö kïgh nyo kamwa Tororöt pö Israel ompö pïchay kimïlisyeghö pïnotön.

⁵Angetan sönönötenyan nko sïrochay kipolpolisyö, okïtïngön aghïtochï ewunechu ECHOTYON Tororötïnyu,

⁶alenchï, “We Tororötïnyu, ochan lalïyanate osyol tokochunyu kurosinyi, ompöwölo kitösisyö kïchangit ngokicha nyoman, teno ghöyityencha ngwïny nko yïm.

⁷Kïngata osiswo papotïnecha nko ye, kikelelacha nko pöytoghicho nko tïsicho aketönecha mori pöytoghi pipö punton akwompö ngokicha, keparecha akechengenecha tïku akerangecha kelïkuna pïnot, kenyerecha akeroröchecha ompö arasï nko nyete le ye.

⁸Wölo kesyonchechanyi ye, we ECHOTYON Tororötïnyo, ompö pöroyïnï tangogh nyo kepïswechanyi walaka ompö acha keperunenö sekeynön akemang wölo tïlil akïripote. Kighecha Tororötïnyo kesöpchenö kïrkegh kikïchicha sekey.

⁹Kikïchicha sekey, wölo melö kipïsyecha Tororötïnyo sekeynön. Kisyonchechanyi ompö tawu pöytoghinto Pasya nyo kichömwecha kesöpchenö atöketeka Kö pö Tororötïnyo* ngat akïkonecha kemanga koro Yudea nko Yerusalem nyo ripote.

¹⁰“Akï ye Tororötïnyo, kïlentecha ne ompö chï? Kikïpïstecha kirurutköku

¹¹cho kimwochinyi mötworiku werkoy lö, sïmnyon koronï owuchinekwa amïl, ompöwölo kinyïghit pipö punton sïmnyontengwa kïngata söröm ntökwit söröm.

¹²Kïlenyona motöp ntop kegh nko chane anta angarak chane kulet tagh akïmang ompö kalya atömanyïl owesöchitu atolapay am pöghisyo kor nyo tapïlïl apïsyï monekwo kïmïl kokay.

¹³Kïpkonchecha ye nyu choni ompö otöptinecha cho ghach nko ngokicha, wölo nyi Tororöt melö kimungechanyi le otini kimïchini, wölo kepïstechanyi kesöpchenö.

¹⁴Ato kïpenyacha ngat kirurutköku kep kegh nko pich cho le sïmnyon, inörekyinechanyi aiwangecha lömïs nyo melö mi chi ompö akong nyo chïwïtöy.

¹⁵Iponyi man, we ECHOTYON Tororöt pö Israel, wölo keghechanyi kesöpchenö, wölo rosa kakïngangtecha ye ngokicho ompö tawungu, ompöwölo melö mi chi nyo muköy ntökughyongö tawungu akwompö ngokï.”