Read pokoot NEEMIA 5 Bible Online

NEEMIA 5 - pokoot bible

NEEMIA 5

¹Atolapay kwitï ngwïrngwïrönöto mïrön nko korukwa nyo akwompö pikökwa chini pö Yaudi.

²Kïlö walaka, “Anyï pöroyöch acha korïn kïmökecha omisyö nyo kïnömo monechï.”

³Kïlentöy walaka, “Kakitötecha parenicho nko pareni sapipun nko koricho tökenyorunö omisyö ompö kömöy.”

⁴Kïlö walaka, “Kakïpösönöcha ropïyen tökekwaghteghena suru pöytoghin ompö parenicho nko pareni sapipun.

⁵Kïchï so melö akonga kisönköcha nko chikwa? Anta mökörönye kegh so monekwa nko chicha? Akwanyï kakighacha monecho kïlïkwï sekey. Akikyaltecha tipicho walaka kïlïkwï sekey. Kikewongucha, ompöwölo kicheng pich walaka pareni nko pareni sapipun.”

⁶Otini kyalïman lokekwa anarekan nyoman

⁷anonsyan, atolapay orwokyan chönökopïr nko yetïntin alenchan chane, “Ompö ne tomökekwa opïre werkökwo?” Atolapay okurön pich kïpka kïsïwa ngalechï

⁸alenchan, “Kikimïtucha werköcho cho pö Yaudi cho kikyolchï pipö punton, angetakwa ye nyu agh pikökwo Yaudi kwolwokwa kegh ngat?” Kïsisyö lasay.

⁹Kïlenyona olenchan chane, “Melö karam kïyï kaghakwa, nyo kötö otïpïyokwa ompö techata Tororötïnyo atömömïnech pungköcho.

¹⁰Akwanyï opösönchinan ante tïkwïl nko werköcha nko mötworichan chane ropïyen nko omisyö, kïlenyona kepïstenö tösunötonï.

¹¹Ayodena ye nyu parenichoni nko pareni sapipun nko pareni arol nko kori nko ropïyenikwa nko paghe nko dipay* nko mwowöyi cho kyachengekwa chane!”

¹²Kïlö nyu chane, “Owöy, kiyodonecha tïkuchoni amelö tökeghokecha chane ngat. Kighecha lenyoni kemwanyi.” Okurön tïsï kïpka kwomchï muma chane kwigh lenyini kamwa lö kighöy.

¹³Atolapay apartan sïrenyu alan, “Puchtoy Tororöt chi le nyï ompö konyi nko ompö ighisyenyi nyo melö ripöy kiwalwalatanï. Kïlenyona kïpörtoy nyinte akupotyeghö tïkwïn löwïr.” Kïlö pich löwïr cho kimi atoni, “Amen!”* Akïkwol ECHOTYON. Kwigh nyu pich lenyini kiwalwal.

¹⁴Kyochan pröyönto pöytoghin ompö koro Yuda ompö könyi taman nko odeny kïngata könyi 32 nyo pö paytaghpa Artakerkes. Amelö kyachengan werköcha omisyö nyo kitökonu pich le omisyo pröyönto pöytoghin.

¹⁵Kitö pröyöntino pöytoghin cho pö tagh pich nïkisyö, ompöwölo kichenga pich omisyö nko dipay nko ropïyeni silpa cho le tömönut angwan, kitö nïkisyö tïkwïl pich ompö chini le mötworikwa. Wölo melö kyaghan lenyoni, ompöwölo kyowöghan Tororöt.

¹⁶Kyoghyongtechan ighisyo nayat amolanye omököy par akïghömïtï kegh mötworichan löwïr akïpöghisyö.

¹⁷Kyomisyan nko pich cho le 150, pipö Yaudi nko kintöghoghikwa, kïsis pipö punton cho kiwitecha cho kipkonchinecha.

¹⁸Kikyomecha ompö asis akonga egh nko kechir mut nko akonga nko kokorochöy cho chang nko dipay cho kigheghöy kïnyïl akonga ompö osis taman. Akï ompö choni löwïr melö kyachengan omisyö nyo kikonu pich le omisyo pröyönto pöytoghin, ompöwölo kitïng pïchï nïkisïn nyo wow.

¹⁹Osoghinyi, we Tororötïnyu lö, inanante ompö pöghisyewut löwïr cho kyoghchan pïchï.