Read pokoot NEEMIA 7 Bible Online

NEEMIA 7 - pokoot bible

NEEMIA 7

¹Kïkany kiteka nayatunay apörtochan kukoti, akïlan ripi kukot nko tumï nko pipö Lawi.

²Otönön werïncha Anani nko Anania nyo le wowïn pö lïk kughyongchï Yerusalem, ompöwölo kikonyïtöy Ananiya Tororöt kïtïl pikö walaka.

³Atolapay olenchan chane, “Makany keyat ortïna Yerusalem tökwoghö ntökïtenö kïpusï asis, atolapay kekar akemör nangat otini tökeruyö. Ikïl ripi ompö pïchini möngöy Yerusalem, kïrip anka tïkwïl kukat nyo mi konyi kamas.”

⁴Ki pöro kanasyanta Yerusalem. Wölo ki ngörï pich cho kimöngöy ori aki ngörï korïn cho kikïtek.

⁵Wölo kighanïn Tororöt aghamïtan chönökopïr nko yetïntin nko pich löwïr tökekir kïpegha ortïnekwa. Onyorwan kitapï nyo kimi kaynötut pö ortïna pïchay kinya kïmïlisyö.

⁶Achï pïchay kipkana koro Papilon cho kirang Nepukadnesa pöytoghinto Papilon le ratan. Kimïlisyö Yerusalem nko Yuda akïwö chi tïkwïl kanasyantenyi.

⁷Kintöghoghikwa kï: Serupapel nko Yoswö nko Neemia nko Asaria nko Raamiya nko Naamani nko Mordekay nko Pilsyan nko Misperet nko Pikpay nko Neum nko Paana.

⁸Achï pïpö artïna Israel cho kimïlisyeghö pïnotön: Paros: 2,172 Syepatia: 372 Ara: 652 Paat Moap (monïngo Yeswö nko Yoap): 2,818 Elam: 1,254 Satu: 845 Sakay: 760 Pinuy: 648 Pepay: 628 Askad: 2,322 Adonikam: 667 Pikpay: 2,067 Adin: 655 Ater (nyo kikuro Esekia): 98 Asyum: 328 Pesay: 324 Arip: 112 Kipyon: 93

²⁶Kimïlisyeghö pïchï tïkwïl cho kimöngöy papotïnekwa kanastinechï: Petleem nko Netopa: 188 Anatot: 128 Pet Asmapet: 42 Kiryat Yearim nko Kepira nko Peerot: 743 Rama nko Kepa: 621 Mikmas: 122 Petel nko Ai: 123 Nepo anka: 52 Elam anka: 1,254 Arim: 320 Yeriko: 345 Lod nko Adid nko Ono: 721 Sena: 3,930

³⁹Achï kaynötut pö pipö artïna tïsï cho kimïlisyeghö pïnotön: Yedaya (monïngo Yeswö): 973 Imer: 1,052 Pasyur: 1,247 Arim: 1,017

⁴³Achï pipö artïna Lawi cho kimïlisyeghö pïnotön: Yeswö nko Kadmiel (monïngo Odapiya): 74 Tumi Kö pö Tororöt* (monïngo Asap): 148 Ripi Kö pö Tororöt (monïngo Syalum nko Ater nko Talmon nko Akup nko Atita nko Syopay): 138

⁴⁶Achï kï pipö artïna mötwori Kö pö Tororöt cho kimïlisyeghö pïnotön: Siya nko Asupa nko Tapaot Keros nko Siya nko Padon Lepana nko Akapa nko Syalmay Anan nko Kidel nko Kaar Reaya nko Resin nko Nekoda Kasam nko Usa nko Pasea Pesay nko Meunim nko Nepusyesim Pakpuk nko Akupa nko Arur Paslit nko Meida nko Arsya Parkos nko Sisera nko Tema Nesiya nko Atipa.

⁵⁷Achï pipö artïna mötwori Solomon cho kimïlisyeghö pïnotön: Sotay nko Soperet nko Perida Yaala nko Darkon nko Kidel Syepatia nko Atil Pokeret Asepayim nko Amon

⁶⁰Pich löwïr cho kimïlisyeghö pïnotön cho pö monïngo mötwori Kö pö Tororöt nko mötwori Solomon kï 392.

⁶¹Kipka pïchï le 642 cho pö ara Delaya nko Topiya nko Nekoda. Kipkana chane kanastina Tel Mela nko Tel Arsya nko Kerup nko Adon nko Imer, wölo melö mi kïgh nyo kiporu lö pipö Israel chane.

⁶³Monïngo tïsï cho melö kirumï arengwa kï: Opaya nko Akos nko Parsilay (nyo kip korkenyi ompö tipi Parsilay nyo pö Kiliad, akekurteghö kaynatengwa.)

⁶⁴Kimelö kikïcham chane kïlïkwa tïsï ompöwölo melö kirumï arengwa ompö kitapun.

⁶⁵Kïlenchï pröyönto pöytoghin ompö pipö Yaudi chane, “Melö omekwa omisyewut cho kïropchini Tororöt ntökïtenö kïrumï tïsin nyo pöghisyegho Urim nko Tumim.”*

⁶⁶Pich löwïr cho kimïlisyeghö pïnotön: 42,360 Mötworikwa cho le mïrön nko kor: 7,337 Tumï cho le mïrön nko kor: 245 Angoletin: 736 Nyumpun:* 245 Tamasay: 435 Sïkïröy: 6,720

⁷⁰Kikonï pich cho chang tïkwïn cho kikïteka Kö pö Tororöt: pröyönto pöytoghin — kilen 8 cho pö koltin tïwanay cho pö ichon 50 sïro pö tïsï 530 Poyi ortïn — kilen 168 cho pö koltin kilen 1,250 cho pö silpa pikö walaka löwïr — kilen 168 cho pö koltin kilen 140 cho pö silpa sïro pö tïsï 67

⁷³Kïmang tïsï nko pipö Lawi nko ripi Kö pö Tororöt nko tumï nko pich walaka nko mötwori Kö pö Tororöt nko pipö Israel löwïr kanastina koro Yuda. Kökimöngisyö pipö Israel löwïr kanastinekwa arawa mut nko odeny.