Read pokoot ESTA 3 Bible Online

ESTA 3 - pokoot bible

ESTA 3

¹Nyini kimuchö ngalechoni, kutotegha pöytoghintö Aman wero Amedata nyo kipö ara Akak nyo kipö pich cho kile pung pö pipö Yaudi. Kitörorit Aman nyoman ntökïlïkwï nyo pö odeny ompö paytaghpa Aasuero.

²Kïmwochï pöytoghintö wowïntinechi löwïr cho kipöghisïyi ompö korenyi kïmïkul kïkonyït Aman akïkïtïngchï nyinte. Kwigh chane löwïr lenyini kimwa pöytoghintö kïpoto Mordekay onkït nyo kitagh kïkïtïng akikonyït.

³Kïtep kighyongtoghi walaka Mordekay cho kipöghisïyi ompö ara ka pöytoghin lö, “Ompö ne tesasanyi ngölyonto pöytoghin.”

⁴Kïsagh nyinte kïtenö osis kïcham, wölo kïtagh Mordekay kïterchï chane. Atolapay kïmwochï wowïntinechay lö, “Ochan chi pö Yaudi amomukanye okïtïnchini Aman.” Kïpa nyu kïmwochï Aman ngalechoni akimi kïtöngönchini lö, ekwighchini ne nyinte Mordekay.

⁵Kïnarek Aman otini kisïwa lö, melö kikïtïnchï Mordekay nyinte amökonyïtnye.

⁶Wölo otini kinkïtï lö, kitö chi pö Yaudi Mordekay, kunan lö, ketïgh Mordekay okït kïmengörokönye kïgh. Kïlenyona kïyar or nyo tïgho pipö Mordekay, pipö Yaudi löwïr ompö pöyunöto Aasuero kïmïkul.

⁷Ato mi könyi taman nko odeny nyo pö paytaghpa pöytoghin Aasuero ompö arawa tagh, nyoni kï arawa nyo kïkuro Nisan, kïmwatïta Aman kepïr kuren (cho kikuro chane “Purim”) atökenkïtï arawe nko asista nyo mïchini kenama nyinte. Kechomnyechï lö lïku arawa taman nko odeny asispa, taman nko sömök, nyoni kï arawa Adar.*

⁸Kïlenyona kïmwochï Aman pöytoghin lö, “Mito pikö walaka cho kimöngisyö kïghömï koros löwïr ompö pöyunötengu kïmïkul. Rïpöy chane otöptin cho sisinchö nko cho pö pich walaka. Amelö choni opïn, melö tïngö chane kïgh kirurut pö paytaghtangu, nyo melö mïchini emïkukönchinenyi chane.

⁹Nyo ato ichömenyi, imwatïta kepar chane löwïr. Ato ighanyi lenyoni, otïngetan man nyo okïniniot lö omukan okonu kilen cho tïlöy 340,000 cho pö silpa cho kïrorchini kaplawachpa pöytoghin.”

¹⁰Kilenyona kïngwïs pöytoghintö kaymorïs ompö ewunyi nyo kile macheypa paytagtanyi, akutö punyonto pipö Yaudi nyo kïkuro Aman wero Amedata, nyo kipö ara Akak.

¹¹Kïmwochï pöytoghintö Aman lö, “Kakekoninyi ropïyen nko pikö tïkwïl, idena chane wölo keda.”

¹²Kïlenyona otini kitïta asisto taman nko sömök nyo pö arawa tagh, kïkur Aman kikiri pöytoghin akwigh chane kukir palaltin cho kikikirchï ngal cho kimwowu nyinte akewaghach ompö kutïwa pich löwïr cho kipö pöyunöt, ompö or nyo kikïpöghisyegho osiswechoni atökepchï yetïntin löwïr nko pöytoghï cho kipöytoy anka tïkwïl nko chönökopïrtin löwïr. Kikir palaltinechoni ompö kaynata pöytoghin Aasuero akïtökönö kaymorïsyenyi kuporï lö kïcham nyinte.

¹³Kikipö palaltinechoni ewuno pich cho kile kighyongtoghï kïghömï koros löwïr cho pö pöytoghin kemwatïta kewany pipö Yaudi lömïs ompö asis akonga akwasisoni kï asispa taman nko sömök nyo pö arawa Adar. Kïpöröy asisoni pipö Yaudi löwïr cho mïnkech nko poy, kor nko monïng. Kïmutö chane kotwon kïpuryö kisyonöt akeritö chane tïkukwa kïlïkwï pöröw.

¹⁴Kikïmwochï pich löwïr cho pö koros ngalechoni kikikir ompö kokwotïn atökwigh kegh chane ompö asisoni.

¹⁵Kïpa nyaparen lawel lenyini kimwa pöytoghin, kimwatïtegha Susa kanasyan nyo wow. Kïpa nyu ngalechay kïghömï koros. Kumpur pöytoghintö ngwïny nko Aman akïgheghsyö kimi pipö kanasyanta Susa mighöt.