Read pokoot ESTA 5 Bible Online

ESTA 5 - pokoot bible

ESTA 5

¹Otini kitïta asisto sömök nyo pö kïruratenyi kulach Esta sïrokachi cho pö paytagh akïwö kughyongö kiroryo kö pö paytagh, ato topönöy kegh nko ngacharu paytagh. Kimi pöytoghinto kïtöpo ngacharunyi pö paytagh kïpörtoy or.

²Nyini kisïwa pöytoghintö Esta kughyongo kiror, kïnyorï tokoch nyo karam ompö nyinte, kupara pöytoghintö Esta lïkïnyi nyo kikigha koltin. Atolapay kïrich Esta nyinte akïswany lïkïyay wölo le möt.

³Kïtep pöytoghintö Esta lö, “Imökenyi ne nya Esta? Mwowanïn kini imökenyi atokonïn, kïrkegh kö kareranto pöyunötenyan.”

⁴Kuyokyï lö, “Ato ichömenyi, we pöytoghin, ingwïn nko Aman atalïkuna toyechan asisete ompö omisyö nyo kawunyi.”

⁵Kïmwatïta pöytoghintö kekurï Aman lawel kungwïn atökïlïkwï chane toyo Esta. Kïwö nyu pöytoghintö nko Aman kwam omisyö Esta.

⁶Akwotini kimi chane kïgheghöy dipay,* kïtep pöytoghintö Esta lö, “Mwowanïn kïgh nyo imökenyi tokonïn. Akï ne nyini kesomenyi? Okoninyi kïrkegh kö kareranto pöyunötenyan.”

⁷Kuyokyï Esta lö, somötenyan

⁸“Ato konyorwan chömchin ompö pöytoghin, akwoto kesïwenyi pöytoghintö lö, karam konaninyi kini osoman, omökan apkanakwa nko Aman ngat olïkune toyechan asïyech ompö omisyö anka nyo oghwokwa. Atoni nyu ato omwowunyi kini omökan.”

⁹Kïwö nyu Aman asisoni ompö ngörekyö nko turönöt. Wölo nyini kisöchï Mordekay otini le ara pöytoghin akïsïwa lö melö kingetyï nyinte anta porchï konyït otini kiweröy, kïnarek nyoman Aman akwompö nyinte.

¹⁰Wölo kïpïr kegh Aman akïwö katanyi. Atolapay kïkur kongotichi kïpa katanyi kïmi nko korkenyi Seres.

¹¹Atolapay kumorchï nyinte chane wölo teno sïkönötenyi nko wölo kiteno werkachi nko wölo kitotegha nyinte pöytoghintö kïsïch ngachar nyo pö parak nko wölo pïchighta nyinte ompö pöytoghin kïtïl yetïntine walaka löwïr,

¹²atolapay kïlö, “Kegh Esta koko pöytoghin omisyö nyo kökurchï pöytoghin nko ani kïpoto akemïlonchocha wölini ngat asïyech.

¹³Wölo melö kïgh nyoni ompö ani ato tosöchinan Mordekay, chichinö pö Yaudi kïtöpo kuka pöytoghin.”

¹⁴Kïlenyona kïlenchï korkenyi nko kongotichi löwïr, “Kanya kegh ket nyo kiketïtoy nyo ngata koghïntanyi miten 22 atemwochinö pöytoghin asïyech kuwusö Mordekay ketoni atape nyu nko pöytoghin ama omisyö ompö ngörekyö.” Kïsïwa Aman lö, kinonut nyoni nyo karam, kïlenyona kïmwatïta kegh ketay kiketo pich.