Read pokoot WUWÖT 1 Bible Online

WUWÖT 1 - pokoot bible

WUWÖT 1

¹Chï kï kaynötut pö pipö Israel cho kipa koro Misri nko Yakopo, chi nko monechi:

²Rupen nko Simion nko Lawi nko Yuda

³nko Isakar nko Saplon nko Penchamen

⁴nko Dan nko Naptali nko Kad nko Asyer.

⁵Yiyo Yakopo lapay kï 70. Akökiwö Yosep Misri.

⁶Kïrapas Yosep nko werkökwa löwïr nko pïnoni lömïs.

⁷Kïtösisyö pipö Israel ntökïghömï koronay akwowesöchitu.

⁸Kïpusï pöytoghintö anka ompö koro Misri nyo kimenkïtnye Yosep.

⁹Kïlenchï pikachi, “Arose lö kichangit pïchï pö Israel akïtïng owesyö kïtïlecha.

¹⁰Apkana kechïrerchinö chane atömötösisyö ngat, tömötöp ntökïnomnyö nko pungköcho tongwïn poryot akïporyeghenech akïwï.”

¹¹Kïlenyona kutö chane kighyongteghï parakungwa kuchop kong ompö ighisyeghut cho nïkisöch akïtekyï Parao töpoton ompö kanastina Pitom nko Rameses.

¹²Wölo otini kitas tagh kuchop kong chane, kïtösisyö kïyiyö akïyasta. Kulilisyö tya pipö Misri ompö pipö Israel.

¹³Kutö pipö Misri pipö Israel kwigh ighisyö le sekey.

¹⁴Akwigh otöptöngwa kïngwanit ompö ighisyö nyo awes nyo pö teksyö nko ighisyö anka tïkwïl nyo kimi paren. Melö kisyonchï chi chane.

¹⁵Kïlenyona kïngalan pöytoghinto Misri nko kamatïna echeni pipö Eprania, kikïkuro anka Syipra kekurö anka Pua.

¹⁶Kïlenchï, “Otini olusyokwa koru Eprania, asïwekwa lö köyï nyo le weri otïgh, wölo ato yï cheptö opïstö.”

¹⁷Wölo kikonyït kamatichay pö echen Tororöt, akimökwighcha lenyini kimwochï pöytoghinto Misri chane, wölo kïpïstö monïng cho le wor kïsöpchö.

¹⁸Kïkur pöytoghinto Misri kamatichay pö echen akïlenchï, “Ompö ne taghakwa le nyï, otï topïstenökwa monïng cho le wor kïsöpchö?”

¹⁹Kuyokyï kamatichay pö echen Parao lö, “Ompöwölo melö lata koru Eprania cho pö Misri, owesöch akïlusyïyi kïtomö kwit kama echö wölo mi chane.”

²⁰Kwighchï Tororöt kamatichay pö echen nyo karam. Kïchangit pïchay akïtasa owesyengwa.

²¹Ompöwölo kikonyït kamatichay pö echen Tororöt kusoyön nyinte chane kïsïch monïng.

²²Kïlenchï Parao pikachi, “Monïng anka tïkwïl nyo le weri nyo kökïyï ompö pipö Eprania owirchï lalwa Nile, wölo opïstokwa tipïn löwïr kïsöpchö.”