Read pokoot WUWÖT 14 Bible Online

WUWÖT 14 - pokoot bible

WUWÖT 14

¹Kïlenchï ECHOTYON Musa,

²“Mwochinö pipö Israel kïmïlisyö akumungö tawu Pi Ayirot, kwenu Mikdol nko Nanam nyo Pïrir, ompö tawu Paal Sepon.

³Ompöwölo nonöy Parao lö, nyoru pipö Israel, kömpölelyö ompö or akupotyechï surkwen.

⁴Oghan möt pö Parao kwaghïghit, tökïrïpekwa tonyorchan ororyö wölo mi Parao nko pikachi löwïr cho pö lïk, atökunkïtï pipö Misri lö ochan ECHOTYON.” Kwigh chane lenyoni.

⁵Otini kikïmwochï pöytoghinto Misri lö kikïryagh pïchay, kïwaghach Parao kinonutkachi nko cho pö mötworichi ompö pïchay akïlö, “Ne nyï kakighacha tökepïstenö pipö Israel cho köpöghisyeghwecha?”

⁶Kïnap nkarinechi nko pikachi pö lïk.

⁷Atolapay kïcheng nkaritin cho le 600 cho kikïkïl nko nkaritine walaka löwïr cho pö koro Misri kïmi nko yetïntinekwa.

⁸Kwigh ECHOTYON möt pö Parao kwaghïghit, kïrïp chane pipö Israel cho kipetöy ompö nyakanat.[3]

⁹Kïrïpa pipö Misri chane angoletin nko nkarino Parao nko pikachi pö angoletin nko lïkenyi, kïnyorchï chane Nanam nyo Pïrir, ato lekïto Pi Ayirot tawu Paal Sepon.

¹⁰Otini kilekïtit Parao, kïlö pipö Israel kiros kïsïwa lö, kimi pipö Misri kïrïpu chane, kimïghyö nyoman akïlokyï ECHOTYON.

¹¹Kïlenchï chane Musa, “Kimömicha so pïrïmpotï koro Misri nka nyï kemïtwechanyi kewonyechinö surkwen? Keghwechanyi ne temïtwecha kepkanena koro Misri?

¹²Nyete nyay kimwowuchanyi ompö koro Misri lö, ‘Pïstecha kepöghisyechinö pipö Misri.’ Kitö ngwangwa kepöghisyechinöcha pipö Misri kïtïl kewonyechinöcha surkwen.”

¹³Kïlenchï Musa pïchay, “Mowöghisyö, achïchïma atasïwena sörunöto ECHOTYON nyo ighwokwa asete, ompöwölo pipö Misri cho osïwïyekwa asete, kïmelö tosïwïyekwa ngat.

¹⁴Poryewokwa ECHOTYON, osisyenökwa pat.”

¹⁵Kïlenchï ECHOTYON Musa, “Ompö ne telokyinaninyi? Mwochinö pipö Israel kïpa tagh.

¹⁶Syolö lïkïngu aighïtochï ewungu nanam aingotyö pöghe, atökuwer pipö Israel wölo tïyame.

¹⁷Oghan mötöwo pipö Misri kwoghïghitu atökïpa kïrïp chane, tonyorchan ororyö Parao nko pikachi löwïr nko nkaritine nko pikachi pö angoletin.

¹⁸Otini karïntan Parao nko nkarinechi nko pikachi pö angoletin anyorwan ororyö, kunkïtï nyu pipö Misri lö ochan ECHOTYON.”

¹⁹Kïmïla malaykayantanay kintöghoghchini pipö Israel kïwö lötungwa akïwö pchöri poltonay kimi tawungwa kutang lötungwa

²⁰akughyongö kwenu pipö Misri nko pipö Israel. Kimito polta nko tuwïn ompö pipö Misri kïlöpo wölo mi pipö Israel[4] akimarikcha kegh chane.

²¹Kughïtochï Musa ewunyi nanam. Kïyumtö ECHOTYON pögh nangat ompö yomöt nyo awes nyo kïngwïna kongasis, kwigh nanam kïlïkwï kor nyo tïyame akïchagh kegh pögh.

²²Kuwer pipö Israel nanam kwen wölo tïyame, kïlïkwï pögh nayat ompö ewu tagh nko ewu löt ompö chane.

²³Kïrïp pipö Misri akïpa ntökwit nanam kwen nko angoletino Parao nko nkaritinechi nko pikachi pö angoletin.

²⁴Nyini le kiwasan kurosunö ECHOTYON pchörinay pö ma nko nyo pö polta kuros pipö Misri, akwigh chane kïkwongkwongisyö.

²⁵Kïnam norayonta kelyo nkarinekwa atökïnïkisyï chane kïpa. Kïlö pipö Misri, “Keryöghenö Israel, ompöwölo mi ECHOTYON kïporyechini chane atökïparecha.”

²⁶Kïlenchï ECHOTYON Musa, “Ghïtochinö ewungu nanam, atökulum pögh pipö Misri, akulum nkarinekwa nko pikökwa pö angoletin.”

²⁷Kughïtochï Musa ewunyi nanamnay, otini kile tökwoghö kïmïlisyö pöghechay le atay kömi osis. Kïryagh pipö Misri, wölo kïyumchï ECHOTYON chane nanam kwen.

²⁸Kïmïlisyö pöghechay akulum nkaritine nko pipö angoletin nko lïke kïmïkul nyo pö Parao nyo kirïp chane ntökwit nanam ori. Möminye ompö akong nyo kingötï.

²⁹Wölo kuwer pïchay pö Israel kor nyo tïyame ompö nanamnay, kïlïkwï pöghechay nayat ompö ewu tagh nko ewu löt ompö chane.

³⁰Kïlenyona kïsörunö ECHOTYON pipö Israel mori pipö Misri. Kïsïwa Israel chane kimeghö ompö nanam kamas.

³¹Kïsïwa Israel ighisyö nyo wow nyo kigh ECHOTYON ompö pipö Misri, kïkonyït pich ECHOTYON nko mötworintenyi Musa.