Read pokoot WUWÖT 15 Bible Online

WUWÖT 15 - pokoot bible

WUWÖT 15

¹Kïtumchï Musa nko pipö Israel ECHOTYON lö, “Otumchinan ECHOTYON, ompö ororyo rïntaghtanyi, nyo köwirchï nanam angoletin nko ipikwa.

²Okwolan ECHOTYON nyo le owesyenyan akï sörunötenyan. Nyinte kï Tororötïnyan nyo okwolan, Tororöt pö paponyan, otöroran nyinte tya.

³“Chi pö poryot, ECHOTYON nyo awes, kaynenyi kï ECHOTYON.

⁴Köwirchï nanam nkarino Parao nko lïkenyi. Kuchut pögho Nanam nyo Pïrir yetïntine cho köromöch.

⁵Kilum chane puseryonta, kilït chane pögh le koghïn.

⁶“Awes ewungu nyo pö tagh, we ECHOTYON, purpuro ngwïny pungkachi.

⁷Irïntonyi punköku ompö owesyeto ororyengu, iyontonyi nörekyengu kïpel chane le sus.

⁸Kikutanyi pögho nanam kïpa pögh yïm, kughyö puseryonta le kutïng, kïnomnyö pögh lö kïng ompö kwenu nanam.

⁹Kïlö punyon, ‘Orïpan, odolöy chane, achaghachaghan pöröwe, kïpïghyö nyu muyenyan. Ongwïsunan chokenyan aparan chane.’

¹⁰Kikutïtenyi pipö Misri kulum nanam, kïtïp pögh chane lenyini.

¹¹“ECHOTYON, ngo nyo lata nyi ompö kwenu tororötin? Ngo nyo lata nyi nyo ichï wow ompö tïlilyö? Ngo nyo kiwöghöy ompö ighisyeghut cho echön nko cho pö töngönchin le nyi?

¹²Kighïtenyi ewungu nyo pö tagh, kïnyïkwïda ngwïnya pungköcha.

¹³Kintöghoghchinyi piköku cho kisörunyi lenyini kiyomisönyi, kiripönyi chane ompö owesyengu ntökwit korengu nyo tïlil.

¹⁴Kilïm puntonï akïpotonchö, kïnyorï pipö Pilisti ngwonïn.

¹⁵Kyam nyarïl kirwokoti Edom, köpotonchö kintöghoghi Moap, kömeghö mutïnö pipö Kanan.

¹⁶Köchïnchï chane nyarïl nko mïghö, kösisyö chane le muntïruch otini kisïwa owesyengu, we ECHOTYON, ntökïtenö kuwer piköku chay kisörunenyi sekeynön.

¹⁷Imïtunyi chane aikany kïmang kutïngtöngu, we ECHOTYON, wölo kekïlanyi kïlïkwï möngengu, kongu nyo tïlil nyo kitekenyi moriku.

¹⁸Pöytoy ECHOTYON kokay nko kokay.”

¹⁹Otini kilït angoletino Parao nanam nko nkarinechi nko ipi, kuyokyï ECHOTYON pöghechay nanam kulum chane, wölo kuwer pipö Israel wölo tïyame ompö kwenu nanam.

²⁰Kïcheng Miriam chepto ompö Aron nyo kile werkoyon kwïrkwïris. Akïcheng korï walaka löwïr kwïrkwïriskökwa akïrïp nyinte akïnyolöy.

²¹Kïlenchï Miriam chane, “Otumchinö ECHOTYON, ompöwölo karïnta ompö ororyenyi, köwirchï nanam angoletine nko ipi.”

²²Kuntöghoghchï Musa pipö Israel kïngata Nanam nyo Pïrir ntökwit surkwen pö Syur. Kïpa chane osis sömök ompö surkwen amönyorïcha pögh.

²³Otini kit Mara, kimemïcha kïgha pögho Mara ompöwölo kingwonöch. Kïlenyona kekurö atoni Mara.[5]

²⁴Kingwïrngwïronchï pïchay Musa akïtep lö, “Kïgheghecha ne?”

²⁵Kïrirchï Musa ECHOTYON, kuporchï ECHOTYON nyinte ket, kïwirchï ketay pögh, kwonyïnitu pöghechay. Kutö ECHOTYON kirurut akïtyama chane atoni.

²⁶Akïlö, “Ato aterakwa nyoman kuti ECHOTYON Tororötïnkwa, aghakwa man ompö tawunyi aripökwa kirurutkachi löwïr, kïmömicha sömewut cho nömokwa cho lata cho kyotönön pipö Misri, ompöwölo ochan ECHOTYON, kisopintenkwa.”

²⁷Kwit chane Elim, wölo kimi kori pöghon cho le taman nko odeny nko keti sos cho le 70. Kïmang chane atoni le sörömu pögh.