Read pokoot WUWÖT 16 Bible Online

WUWÖT 16 - pokoot bible

WUWÖT 16

¹Kïpegha Elim pipö Israel ntökwit surkwen pö Sin nyo mi kwenu Elim nko Sinay. Ki asisto taman nko mut nyo pö arawa odeny nyoni kïngata otini kiwuwunö chane koro Misri.

²Kïngwïrngwïronchï söpïch pö pipö Israel Musa nko Aron ompö surkwen,

³akïlenchï, “Kitö ngwangwa kïpörchecha ECHOTYON koro Misri. Otini kikïtöpisocha atolekïtö töreni pany akyam makatin ntökepïghyö, ompöwölo kemïtwechanyi kepkana surkwen atetïghenö pïchï löwïr kömöy.”

⁴Kïlenchï ECHOTYON Musa, “Oropönwokwa makatin kïpkana yïm akïkwöghöy pich cho mïchini asis akonga, atö atyaman chane lö, ekïrïpöy chane kirurutköchan nya anta ewo.

⁵Kwöghöy chane ompö asispa mut nko akonga, kïnyïl odeny ompö chay kö kwöghöy su.”

⁶Kïlenchï Musa nko Aron pipö Israel löwïr, “Onkïtunekwa asïna lö kïchï ECHOTYON nyay kimïtunenokwa koro Misri,

⁷osïwïyekwa asïyech tökwoghö ororyo ECHOTYON, ompöwölo kalïm ngwïrngwïrönötenkwa. Ompöwölo kïchicha ngo tökeghe lenyoni?”

⁸Kïlö Musa, “Kökonekwa ECHOTYON peny nyo omekwa asïna nko makatyan nyo omekwa tökwoghö ntopïghyö, ompöwölo kalïm nyinte ngwïrngwïrönötenkwa. Ngwïrngwïrönötenkwa melö ompö acha wölo ompö ECHOTYON.”

⁹Kïlenchï Musa Aron, “Mwochinö söpïch pö pipö Israel lö, ‘Apkana atolekïtö ECHOTYON, kakïlïm ngwïrngwïrönötenkwa.’ ”

¹⁰Akï otini kingölonchini Aron söpïch pö pipö Israel, kuros okumpö surkwen. Kïsïwa ororyo ECHOTYON nyo kingwïno polta.

¹¹Kïlenchï ECHOTYON Musa,

¹²“Kalïman ngwïrngwïrönöto pipö Israel, mwochinö chane lö, ‘Omekwa peny nangat, amakwa tökwoghö makatin, atonkïtunökwa lö ochan ECHOTYON Tororötïnkwa.’ ”

¹³Ato le mönon kïpka alurïtinö kulum wölo kimöngöy chane. Tökwoghö kïnyïghï röyöntö ngwïny.

¹⁴Kïkany kuwonyö röyöntö ompö ngwïny kïrumunö tïkwïn surkwen cho mïnkech cho lata pöwöy.

¹⁵Otini kisïwa pipö Israel, kïtep kegh lö, “Ne kitö nyï?” Ompöwölo kimenkïtcha lö ki ne. Kïlenchï Musa chane, “Omisyö nyo kökonokwa ECHOTYON atama.

¹⁶Kamwa ECHOTYON lö, ‘Pimo chi anka tïkwïl köröp ompö akwa kïrïp kegh nko pich cho tïng ompö katanyi.’ ”

¹⁷Kwigh lenyoni pipö Israel. Kicheng walaka cho chang kïcheng walaka cho ngörï.

¹⁸Wölo otini kipima chane köröp, nyinte nyo kicheng cho chang kimönyorïnye cho kitïl akï nyinte nyo kicheng cho ngörï kimörörchïnye. Kicheng chi anka tïkwïl cho tenö cho kimuköy kwam.

¹⁹Kïlenchï Musa chane, “Mopïstö tïkuchoni ntökwit tökwoghö.”

²⁰Wölo kimöterchïcha Musa. Kïror walaka ntökwit tökwoghö, kuyin nkut akïnïnö, kïnyölechï Musa chane.

²¹Kïkwagh chane osis löwïr cho tenö cho kyomöy, wölo otini kila asis kunyit.

²²Ato mi asispa mut nko akonga, kïcheng cho pö asis akonga kïnyïl odeny, köröpon odeny. Otini kipka kintöghoghi söpïch pö pipö Israel kïngalan nko Musa,

²³kïlenchï Musa chane, “Kamwa ECHOTYON lö, ‘Asïyech kï asispa kimïny, asispa Sapato,* asis nyo tïlil nyo pö ECHOTYON. Pela nyo kepelöy, ighogh nyo keghoghöy, löwïr cho köngötï otö kamas ntökwit tökwoghö.’ ”

²⁴Kïror ntökwit tökwoghö lenyini kimwochï Musa chane. Melö kinïnö amelö kiyin nkut.

²⁵Kïlö Musa, “Ama asete, ompöwölo asete kï asispa Sapato nyo pö ECHOTYON. Melö onyorchinekwa omisyö asete sany.

²⁶Okwöghekwa ompö osis mut nko akonga, wölo ompö asispa mut nko odeny, nyoni kï asispa Sapato, möminye kïgh nyo onyorunekwa.”

²⁷Kïpa pich asispa mut nko odeny lö tökekwagha omisyö, wölo kimönyorïcha.

²⁸Kïlenchï ECHOTYON Musa, “Töghöy piköku nko oyï kïrïpöy ngalechan nko kirurutköchan?

²⁹Kökonokwa ECHOTYON asispa Sapato, akökonokwa ompö asispa mut nko akonga omisyö nyo pö osis odeny, nya kïtöpö chi anka tïkwïl otini kömi, mömïchininye kïweghö chi anka tïkwïl otini kömi asisoni.”

³⁰Kumuny pïchay asispa mut nko odeny.

³¹Kïkurö pipö Israel kaynenyi mana.[6] Ki karkegh nko kösïghyonto mosyon nyo rel, karkegh onyïnienyi nko makatin cho mïnkech cho kakigha kumat.

³²Kïlö Musa, “Kamwa ECHOTYON lö, ‘Arora köröp akonga nyo pö omisyononi ompö pïnwöyikwa löwïr, atökïsïwa makatyan nyo kyapaghenokwa ompö surkwen, otini kyamïtunenekwa koro Misri.’ ”

³³Kïlenchï Musa Aron, “Chenga alepït ainyïghit mana cho pö köröp aitö tawu ECHOTYON, tökeror ompö pïnwöyikwa löwïr.”

³⁴Kutö Aron tawu Santuku Muma* atökeror lenyini kimwochï ECHOTYON Musa.

³⁵Kwam pipö Israel mana ompö könyis tömönut angwan, ntökwit rotyot nyo pö koro Kanan.

³⁶Kipimtoy pich osiswechoni kïgh nyo kïkuro omer nyo pö liten tömönut odeny.