Read pokoot WUWÖT 18 Bible Online

WUWÖT 18 - pokoot bible

WUWÖT 18

¹Kilïm Yetro kapikoyo Musa, nyo kile tïsin ompö Midyan, ngal cho kighchï Tororöt Musa nko pipö Israel nko otini kimïtï chane kïngetunö Misri.

²Kumïtï Yetro cheptanyi Sipora, koko Musa

³nko werkachi odeny. Kikuro akonga Kersyom,[8] ompöwölo kilö Musa, “Kalïkwan pïnotyon ompö koro pich walaka,” kekurö anka Elieser,[9] ompöwölo kilö Musa,

⁴“Ki kingörokintenyan Tororöt pö paponyan. Kisörunenanïn choko Parao.”

⁵Kumïtï Yetro koko Musa nko werkachi odeny kïpka surkwen wölo kimi kïmöngöy ato lekïto kutïng pö Tororöt.

⁶Kökikuyoktö kut Yetro wölo mi Musa lö, “Omïtunan korkengu nko werkachi kwodeny.”

⁷Kïwö Musa kïtaroch kapikoyenyi akukongköy. Kutakwes kegh akïpa kutang ema.

⁸Kïmwochï Musa kapikoyenyi ngal löwïr cho kighchï ECHOTYON Parao nko pipö Misri akwompö pipö Israel akïmwochï kömpölelut löwïr cho kinyorï ompö rutogh nko wölo kisörï chane ECHOTYON.

⁹Kïngarak Yetro otini kilïm ngal cho karamach cho kighchï ECHOTYON pipö Israel akïsörunö owesyo pipö Misri.

¹⁰Kïlö, “Nya kïkwolö ECHOTYON nyo kisörunenokwa owesyo pipö Misri nko Parao.

¹¹Onkïtön ye nyu lö wow ECHOTYON kïtïl tororötin walaka, ompöwölo kisörunö pipö Israel mori pipö Misri ato kichop kong chane.”

¹²Kwipï Yetro amöros nyo kïpelöy nko kitötogh wölo mi Tororöt, kungwïn Aron nko poyi Israel kwam makatyan nko kapikoyo Musa ompö tawu Tororöt.

¹³Kïtöpö Musa ngwïny asisto odeny atökurwokyï pich, kughyö chane kuwit nyinte kïngata tökwoghö ntökwimön.

¹⁴Nyini kisïwa apoytanyi löwïr cho kighchini Musa pich kïlö, “Ne nyï ighchinenyi pich? Ompö ne telïkunanyi kirwokin onkït, kïmi pïchï ghyongöy kuwitinyi kïngata tökwoghö ntökwimön?”

¹⁵Kïlenchï Musa, “Ompöwölo pkonöy pich wölo omitan kïyöröy machata Tororöt.

¹⁶Ato tïng chane ngölyon, kwipu wölo omitan, alïkunan mutinto ngal ompö kwenu chi nko chitö anka amwochan kinetut pö Tororöt nko kirurutkachi.”

¹⁷Kuyokyï Yetro lö, “Melö karam kïyï ighenyi.

¹⁸Ioghökenyi ompö pïchï pkonöy wölo imitenyi. Nïkis ighisyonï ompö nyi, memukenyinye onkït.

¹⁹Tera nyu orurïn, nya kïtöpö Tororöt nko nyi. Lïkuna nyo ighyongtechini pich ompö tawu Tororöt aipchï Tororöt ngalekwa.

²⁰Neta chane kirurut pö Tororöt aiporchï chane wölo töptoy nko ighisyö nyo mïchini kwigh.

²¹Kïla pich cho ngöghomöch ompö pïchï lapay, cho konyïtöy Tororöt akï cho kighönöy melö chengöy asoya, tönö chane kïlïkwï yetïntino pich 1,000 nko 100 nko 50 nko taman.

²²Lïku chane kirwokï cho pö pich ompö osis löwïr, wölo nya kwipï chane ngölyon nyo awes wölo imitenyi, kïmut chane nyo kwïskwïs. Ighöy nyoni nïkisyengu kïkwïskwïsit, ompöwölo chöghöy chane nko nyi.

²³Ato ighanyi lenyini mwoghöy Tororöt, melö ioghökenyi. Akïrotöy pïchï löwïr keston ompö kalya.”

²⁴Kïterchï Musa kapikoyenyi akwigh kïgh anka tïkwïl nyo kimwa.

²⁵Kïkïl pich cho ngöghomöch ompö Israel akutö kïlïkwï kintöghoghi pich 1,000 nko 100 nko 50 nko taman.

²⁶Kipöghisyö le kirwokï ompö pich osis löwïr, Kipchï Musa ngal cho owesöch, kïmut chane cho kwïskwïs cho kimuköy.

²⁷Kïpïstö Musa Yetro kïwö, kïmïla kutang korenyi.