Read pokoot WUWÖT 19 Bible Online

WUWÖT 19 - pokoot bible

WUWÖT 19

¹Kit pipö Israel surkwen pö Sinay arawa nyo pö sömök kïngata asisini kingetunö koro Misri.

²Otini kingeta chane Repidim, kutang surkwen pö Sinay akïmang atoni tawu kutïng.

³Kïwö Musa kïpus kutïng wölo mi Tororöt. Kïkur ECHOTYON nyinte ompö kutïng akïlenchï, “Mwochinö kö pö Yakopo, pipö Israel lö,

⁴‘Kasïwekwa kïgh nyo koghchan pipö Misri apunenokwa köpepoy le sich nyo ipöy warechi apkanakwa wölo omitan.

⁵Ato okonyïtanïkwa lasiny arip mumenyan. Olïkukwa piköcha kegh kïtïl pipö punton löwïr, kïrkegh kö nyinyan ngwïnya kïmïkul,

⁶pich cho kikengot kïpöghisyeghwanïn akï pipö punton akonga cho tïlilöch.’ Imwochinenyi pipö Israel ngalechï.”

⁷Kïmïla Musa akïkur poyi pipö Israel akimwatïta ngal löwïr cho kimwochï ECHOTYON.

⁸Kïcham pïchay löwïr lö, “Kighecha kïgh anka tïkwïl nyo kamwa ECHOTYON.” Kwip Musa wöghökutyengwa wölo mi ECHOTYON.

⁹Kïlenchï ECHOTYON Musa, “Ongwïnchininyi ompö polta nyo tuw, atökïlïm pich tongölonan nko nyi, atökughaninyi kokay.” Kïmwochï Musa ECHOTYON ngal cho kimwa pich.

¹⁰Kïlenchï ECHOTYON Musa, “Wïyö wölo mi pich aitïlil chane asete nko asïyech. Nya kuwun chane sïrokökwa,

¹¹akïtïpï kïpsach asispa sömök, ompöwölo ngwïnöy ECHOTYON kïrökuno kutïng pö Sinay ompö tawu pich lapay.

¹²Aitö rotyot kuwit kutïng ailenchï pich, ‘Orip kegh mapus kutïng anta arik chini le kelyechi. Chi anka tïkwïl nyo riköy kutïng ketïghöy kïma.

¹³Kïwiro koghïn anta kïwutö kotï. Möminye ewï nyo swongöy nyinte. Ato kö pich anta kyak, mökïpïsininye kïsöp.’ Wölo ato kïkut konti kuyo makal, muköy chane nyu kïpusöy kutïng.”

¹⁴Kïrökunö Musa kutïng kungwïn wölo mi pich, akïlenchï otïlilö kegh, kuwun chane sïrokökwa.

¹⁵Kïlenchï Musa pich, “Otïpinö kïpsach ompö asispa sömök. Amerik chi korka.”

¹⁶ Kimito kutïng tïlötö nko kiryalat tökwoghö ompö asispa sömök, akulum polta nyo tuw nko chöghöto kontï nyo kichögh tya. Kïpotan chi anka tïkwïl nyo kimi möngot.

¹⁷Kumïta Musa pich möngot atökïnyoryö nko Tororöt, kughyongö chane ngwïnyi kutïng.

¹⁸Kulum ighöt kutïng pö Sinay, ompöwölo kirökyï ECHOTYON ompö ma. Kïpusta ighenyi parak nyo lata nyo pö ma nyo wow, kurïngring kutïngay tya.

¹⁹Kitasa tya chöghöto kontï. Kïngalan Musa, kuyokyï Tororöt ompö tïlöt.

²⁰Kïrökyï ECHOTYON kutïng pö Sinay parak akïkur Musa kïwö wölini. Kïpusta Musa parak.

²¹Kïlenchï ECHOTYON, “Röytenö ngwïny aichil pich atömötïlï rotyonay lö tökïsïwanïn, ato igh lenyoni kïmeghot cho chang.

²²Mïchini kutïlil kegh tïsï cho mököy kïrikanïn atömotönön chane sitöt.”

²³Kïlenchï Musa ECHOTYON, “Memuköcha pich kïpusï kutïngï pö Sinay, ompöwölo kichilechanyi ailenyi, ‘Otönö rotyot kuwit kutïngï ompöwölo tïlil.’ ”

²⁴Kuyokyï ECHOTYON lö, “Röytenö aimïtï Aron kungwïn nko nyi. Mekany kïtïlï rotyonay tïsï nko pich cho mököy kïpkonöy parak wölo omitan, atö mönyorï sitöt.”

²⁵Kïröytö Musa to akïmwochï pïchay ngala ECHOTYON.