Read pokoot WUWÖT 24 Bible Online

WUWÖT 24 - pokoot bible

WUWÖT 24

¹Kïlenchï ECHOTYON Musa, “Pusuna wölo omitan nko Aron nko Nadap nko Apiu nko poyi Israel cho le 70. Kïkany ato tochikwa lowöch, asagh

²wölo ngwïnöy Musa onkït wölo omitan, mörikucha chona walaka. Amöpustocha pich nko nyinte.”

³Kïwö Musa kïmwochï pich ngala ECHOTYON löwïr nko kirurut, kuyokwï chane ompö kut akonga lö, “Kighecha kïgh anka tïkwïl nyo kamwa ECHOTYON.”

⁴Kukir Musa kïgh anka tïkwïl nyo kimwa ECHOTYON. Kïnget Musa tökwoghö asis nyo kirïpöy akïtek ato kïpelo amöros ompö kutïng ngwïny akïtek pchörin taman nko odeny cho pö koghïn kïkarkegh nko ortïna Israel.

⁵Akïyonta karachïna kïpa kïpel amöros akutötö eghin kïlïkwï ropöwo pöghisyö ompö ECHOTYON.

⁶Kïcheng Musa kisönkö kareran akutö otupöy akïcheng chinö walaka akwisö ato kïpelo amöros.

⁷Atolapay kïcheng kitapu muma akusomönchï pich. Kuyokwï pich lö, “Kighecha kïgh anka tïkwïl nyo kamwa ECHOTYON akekonyït.”

⁸ Kïcheng Musa kisön akwisö pich akïlö, “Chï kï kisön cho pö muma nyo kam ECHOTYON nko akwa ompö ngalechï.”

⁹Kïpusta Musa kutïngay nko Aron nko Nadap nko Apiu nko poyichay pö Israel le 70

¹⁰akïsïwa Tororöt pö Israel. Kimi ngwïnyi kelyechi kagh nyo chïtchït le kowo yïm.

¹¹Wölo melö kimuny Tororöt kintöghoghi Israel. Kïsïwa chane Tororöt, atolapay kwomisyö akïgheghsyö.

¹²Kïlenchï ECHOTYON Musa, “Nyonö mpurö kutïng parak wölï omitan, ato konïn koghïn cho töpölöl cho mi kirurut nko kinetut cho kyakiran.”

¹³Kïwö Musa nko Yoswö kingörokintenyi. Kïpusta Musa kutïng pö Tororöt.

¹⁴Kïlenchï Musa poyichay, “Akanyecha yete ntökemïlisyecha, mi Aron nko Ur nko akwa, ato mi chi nyo tïng ngölyon kïwö wölo mi chane.”

¹⁵Otini kiwö Musa kutïng parak, kulum polta kutïngay,

¹⁶kïnyïghï ororyo ECHOTYON kutïng pö Sinay. Akulum polta kutïngtö ompö osis mut nko akonga. Ato mi asispa mut nko odeny kïkur ECHOTYON Musa ompö poltonay ori.

¹⁷Kirumï ororyo ECHOTYON ompö pipö Israel le ma nyo kinöghöy ompö kutïng.

¹⁸Kïlït Musa poltonay otini kipustoy kutïng akïtöpö kutïng osis tömönut angwan pöghet nko nangat.