Read pokoot WUWÖT 25 Bible Online

WUWÖT 25 - pokoot bible

WUWÖT 25

¹Kïlenchï ECHOTYON Musa,

²“Mwochinö pipö Israel kwipkanïn ropöw. Ichengwanïn ropöw cho tenö cho kacham mïkulis pö pich kïkonï.

³Chï kï ropöw cho koninyi chane: koltin nko silpa nko taghoy

⁴nko anankis cho orusöch nko cho lata akwa lamay nko cho pïröch nko cho pö katani nko puto ngaror

⁵nko sïro pö mökol cho kikïsïl kïpïröchitu nko sïro pö ngöror nko tilok

⁶nko mwaghpa orolwö nyo kipköngöy nko tïkwïn cho ngutoy cho onyïn cho pö mwagh nyo kiyiltoy nko mankoy cho kïpelöy cho ngutoy cho onyïn

⁷nko koghïn cho nyörilöch cho kïnöpchini sïra epod* nko sïre anka nyo lata kalacha.

⁸Nya kïtekwanïn chane wölo tïlil, ato töpan kwenungwa.

⁹Techa köyï le otini oporunyi wölo töptoy kot nko tïkwïn cho kitöni ori.

¹⁰“Kigho santuku tilak, tenö koghïntanyi sentimiten 110 töpesïntanyi kï sentimiten 66 akï sentimiten 66 kïwö parak.

¹¹Imala koltin cho pïchighöch sany nko ori aitö koltin kuwitwit söröm.

¹²Igh kaymoris angwan cho pö koltin aitö kelyechi kwangwan kaymoris odeny onkuntö anka odeny onkuntö anka.

¹³Igh pölöwo tilok aimala koltin.

¹⁴Ilut pölöwe kaymorischay mi wop odeny atesïtö.

¹⁵Tïpiyot pölöwe kaymorischï pö Santukï, melö kïngwïsöy.

¹⁶Atolapay itö kirurut cho okoninyi santukunoni.

¹⁷“Igh köröwon nyo pö koltin cho pïchighöch nyo teno koghïntanyi sentimiten 110, tenö töpesïntanyi sentimiten 66.

¹⁸Igh kerupimtin* odeny cho pö koltin ompö woptin odeny nyo pö köröwontonay.

¹⁹Itö kerupim akonga wop akonga itö anka woptö anka. Igh kerupimtin odeny kïnam kegh nko köröwonte.

²⁰Syolöy kerupimtine köpepokökwa parak atökïkarta köröwonte. Pörchini kegh mutïn kurosöy köröwonte.

²¹Itö köröwonte Santukï parak, atolapay itö kirurut cho okoninyi Santukï ori.

²²Onyoryenan nko nyi ompö atoni angalanan nko nyi otini omitan köröwontononi parak, ompö kwenu kerupimtinechay le odeny mi Santuku Muma amwowunyi kirurut pö pipö Israel.

²³“Igh mesa nyo pö tilak nyo tenö koghïntanyi sentimiten 88, töpesïntö kï sentimiten 44 akï sentimiten 66 kïwö parak.

²⁴Imala koltin cho pïchighöch aitö koltin kuwitwit.

²⁵Igh korope nyo tenö töpesïntanyi milimiten 75 aitö koltin kuwitwit koropetö.

²⁶Igh kaymoris angwan cho pö mesa aitö luchtine kwangwan, wölo ghyongo kelye kwangwan.

²⁷Ikany kïlekïtö kaymoriska koropetö tökïnam ketichay kïsïto mese.

²⁸Igha pölöw cho pö tilok aimala koltin aisïtö mesa.

²⁹Igh tïwanay nko mpalaway nko alepïtis nko otupöy cho kïpöghisyegho ompö kitötogh, kigho choni löwïr koltin cho pïchighöch.

³⁰Itöninyi mesa makatyan nyo kïroptegho tawunyan kïnomnyö.

³¹“Igha ket nyo kikönoghöy kitömöwon ompö koltin cho pïchighöch, aigh pchöri nko kelye ompö koltin cho kitongöy cho tïng tapïk kïnam kegh kïlïkwï akonga.

³²Akïtïng morïn cho le mut nko akonga, sömök ompö woptine kwodeny.

³³Kitïng morïna anka tïkwïl kikompen sömök cho lata tapïko pö mlosi cho ketar.

³⁴Kïtïng pchöri ket nyo kikönoghöy kitömöwon kikompen angwan cho lata tapïko pö mlosi cho ketar.

³⁵Mi tapïkyanta nyo tomönye kïnganya otini kasakegha morïna akong ompö chay le mut nko akonga.

³⁶Lïku akonga tapïk cho tomönye kïngongisyö nko morikwa nko pchöri akikitanga koltin cho pïchighöch.

³⁷Igh kitömöw cho le mut nko odeny ainagh, atökïlöpochï okumpö tagh.

³⁸Igha kitampine nko otupeni koltin cho pïchighöch.

³⁹Igha karichoni löwïr kilen 35 cho pö koltin cho pïchighöch.

⁴⁰Iros lö keghanyi le ato kyoporunyi ompö kutïng.