Read pokoot WUWÖT 32 Bible Online

WUWÖT 32 - pokoot bible

WUWÖT 32

¹Otini kisöwï pich lö kimpur Musa kutïng nyo kogh, kïnyoryö pïchay akïpa wölo mi Aron akïlenchï, “Ighwecha tororöt nyo ntöghoghwecha, ompöwölo mökinkïtöchanye kïgh nyo kegha ompö Musa, chichay kimïtunenecha koro Misri.”

²Kïlenchï Aron, “Angwïsuna taghoyi koltin cho mi yitiko korukwa nko werkökwa nko tipikwa apï wölo omitan.”

³Kïngwïs pich löwïr taghoyi koltin akwipchï Aron.

⁴Kïcheng taghoyichay akïpel akwigh körkeyïn pö mogh. Kïlö pïchay, “Nyï kï tororötïncha, we Israel, nyo kimïtunenecha koro Misri!”

⁵Atolapay kïtek Aron ato kïpelo amöros ompö tawu moghay akïmwatïta lö, “Asïyech kï ichon nyo pö ECHOTYON.”

⁶Kïnget chane tökwoghö asïyech akutötö amöros nyo kïpelöy nko ropöwo pöghisyo, kïtïpïyö pich ngwïny akwomisyö akïgheghsyö akïpironchö akïruyö nko kor.

⁷Kïlenchï ECHOTYON Musa, “Röytenö to, ompöwölo kikwigh ngokï piköku chay kimïtunenyi koro Misri.

⁸Köwöghökisyö chane lawel kïpa kamas ompö aranay komwochan chane, keghchï kegh mogh nyo kakïpel akïsagh akutö amöros akïlö, ‘Nyï kï tororötïncha, we Israel, nyo kimïtunenecha koro Misri!’ ”

⁹Kïlenchï ECHOTYON Musa, “Kasïwan pïchï lö, pich cho oghïghe mötöwö.

¹⁰Kïlenyona pïstanïn, ompöwölo kanarekan tya ompö chane amöchan owonge chane, wölo oghinyi lïkuna papo pö pipö kor akonga nyo wow.”

¹¹Kïsagh Musa ECHOTYON Tororötïnyi akïlö, “We ECHOTYON, ompö ne tenarekanyi ompö piköku cho kimïtunenyi koro Misri ompö owesyengu nyo wow?

¹²Imökenyi tökïmwa pipö Misri lö, ‘Kimïtuna chane koro Misri atökwighchï ghöyityö, kïpar chane ompö kutïngkot akuwany ompö ngwïny?’ Waghakena ompö nörekyengu aipïstö ghöyityonï imöchenyi ighchine piköku.

¹³Nana mötworiku ompö Apraam nko Isak nko Yakopo cho kiwolwolchinyi chane lö, ‘Otösan yiyenkwa kïchangit le kokelya yïm akï otönan koronini kïmïkul koyomiswokwa yiyenkwa akïmïlöy chane kokay.’ ”

¹⁴Kïpïstö nyu ECHOTYON ghöyityö nyo kimököy kwighchini chane.

¹⁵Kïmïla Musa kïrökunö kutïng nko koghichay töpölöl le odeny pö kirurut kimi morichi cho kikikir woptine kwodeny.

¹⁶Kigh Tororöt koghichoni töpölöl akikikirchï kikirut.

¹⁷Otini kilïm Yoswö pölö nyo pö pich cho kiteghyö, kïlenchï nyinte Musa, “Mi pölötö nyo pö poryot möngot.”

¹⁸Wölo kïlö Musa, “Melö kut nyï olïman nyo pö kiteghat nyo pö rïntagh anta kiteghat nyo pö pich cho kakïrïnta, wölo pölö nyo pö tumöt.”

¹⁹Otini kirich Musa möngot akïsïwa moghay nko tumöt, kïnarek tya akïwirchï ngwïny koghichay töpölöl kömi morichi kïghyösyö ompö kutïng to.

²⁰Kïcheng moghay kigh chane akïpel akïnga ntökïlïkwï pïsya akïtankwara pögh akuchikyï pipö Israel kïgha.

²¹Kïlenchï Musa Aron, “Keghunyi ne pïchï tepchinönyi ngokï cho echön lechï?”

²²Kïlö Aron, “Menörekyante werïnyo, ompöwölo inkïtönyi lö ipchini kegh kïnomnyö pïchï ghöyityö.

²³Kilenchanïn chane, ‘Ighwecha tororöt nyo ntöghoghwecha, ompöwölo melö kinkïtöcha lö ne nyo kegha ompö Musa nyay kimïtunenecha koro Misri.’

²⁴Olenchan chane, ‘Nya kïngwïsï chi anka tïkwïl kari koltin cho tïng.’ Kïlenyona kïkonanïn chane karikwa, owirchan ma kungwïn moghï.”

²⁵Nyini kisïwa Musa lö, kipïsyï Aron pich kïtironchö atökïnyorï arasï ompö kwenu pungkökwa,

²⁶kughyongö kuka möngot akïtep lö, “Ngo nyo mi okumpö ECHOTYON? Nyonö wölo omitan.” Kïghamït kegh pipö Lawi akïpa wölo mi nyinte.

²⁷Kïlenchï chane, “Kölö ECHOTYON Tororöt pö Israel, ‘Chenga chi anka tïkwïl chokengu aiwö woptin löwïr ompö kukot löwïr cho pö möngot aipar chi anka tïkwïl werïngwo nko kongengu nko pöröryengu.’ ”

²⁸Kwigh pipö Lawi kïrïp kegh nko ngala Musa, kïmeghö pich asisoni cho ngata 3,000.

²⁹Kïlö Musa, “Kotïlilökwa kegh asete ompö ighisyo ECHOTYON, ompöwölo melö karïp chi ompö akwa werïnyi anta werïngwa, atökïkonokwa ECHOTYON perur asete.”

³⁰Kïlenchï Musa pich ato le asïyech, “Kaghakwa ngokï cho echön, owetan ye wölo mi ECHOTYON, töptoy oghan kinyoryogh ompö ngokikwa.”

³¹Kïmïla Musa wölo mi ECHOTYON akïlö, “We ECHOTYON kegh pïchï ngokï cho echön, keghchï kegh tororöt pö koltin.

³²Wölo ye nyu, löstoghchinö ngokikwa anta mölenyona, ingongoghtanïn ompö kitapungu nyay kikirchinyi piköku.”

³³Kïlenchï ECHOTYON Musa, “Chi anka tïkwïl nyo kighwanïn ngokï nyo ongongoghtenan ompö kitapunyan.

³⁴Wïyö ye nyu, ntöghoghchinö pich kïpa walay komwowunyi, wetöy malaykayantenyan tawungu. Wölo otöninan chane sitöt ato lekït ompö ngokikwa.”

³⁵Kïtorchï ECHOTYON pïchay sömew, ompöwölo kichikyï chane Aron kwigh mogh.