Read pokoot WUWÖT 35 Bible Online

WUWÖT 35 - pokoot bible

WUWÖT 35

¹Kïkur Musa söpïch pö pipö Israel löwïr akïlenchï, “Achï ngal cho kamwa ECHOTYON lö mïchini aghakwa.

²Oghekwa ighisyö osis mut nko akonga, wölo asispa mut nko odeny kï Sapato nyo tïlil nyo kimuny ECHOTYON, chi anka tïkwïl nyo ighöy ighisyö asisoni ketïghöy kïma,

³möminye nyo le ompö ma nyo kinoghöy ompö korikwa asisoni.”

⁴Kïlenchï Musa söpïch pö pipö Israel löwïr, “Anyï kïgh nyo kamwa ECHOTYON.

⁵Achenga ompö kwenunkwa ropöw cho kitöni ECHOTYON. Nya kwipï chi anka tïkwïl nyo karam mu, tïkwïn cho ropchini ECHOTYON: koltin nko silpa nko taghoy

⁶nko anankis cho orusöch le akwa lamay nko cho pïröch nko cho pö katani nko puto ngaror

⁷nko sïro pö mökol cho kikïsïl kïpïröchitu nko sïro pö ngaror nko ket cho lata tilok

⁸nko mwaghpa orolwö nyo kipköngöy nko tïkwïn cho ngutoy cho onyïn cho pö mwagh nyo kiyiltoy nko mankoy cho kïpelöy cho ngutoy cho onyïn

⁹nko koghi walaka cho nyörilöch cho kïnöpchini epod* nko sïra anka nyo lata kalacha.

¹⁰“Nya kungwïn chi anka tïkwïl ompö akwa nyo tïng chïreryö kwigh löwïr cho kamwa ECHOTYON wölo kïtektoy Emenyi, kitöni:

¹¹pörköyeto Ema nko köröwonte nyo pö sany nko akodetiskachi nko pölöwechi nko pïrompurkö nko pchörinechi nko pïrïmpotkachi nko

¹²Santuku Muma* nko pölöwe nko köröwonte nko ananka nyo körtoy,

¹³mesa nko kelyechi nko karichi nko makatyan nyo kipöy tawu Echotyon

¹⁴nko ket nyo kikönoghöy kitömöwo nko karichi nko kitömöwechi nko mwagh nyo kinoghöy

¹⁵nko ato kïpelo tïkwïn cho ngutoy cho onyïn nko pölöwechi nko mwagh nyo kiyiltoy nko mankoy cho kïpelöy cho ngutoy cho onyïn nko ananka nyo pö kukat, ompö kuka Ema nyo mi ECHOTYON,

¹⁶ato kïpelo amöros nyo kïpelöy nko wölo lïtöy arenï nyo pö taghoy nko pölöwe nko kari nko otupe nko kelyechi nko

¹⁷anankis cho körtoy kasaruto kot nko pchörinechi nko pïrïmpoti nko ananka nyo körtoy kuke nyo pö sany nko

¹⁸nömöw nko pörköyikwa cho pö Ema nko kasarunyi

¹⁹nko sïro cho pö tïsï cho kikïnap nyo karam, cho kipöghisyegho Aron ompö Atay Tïlil nko cho pö werkachi.”

²⁰Kïpegha söpïch pö pipö Israel löwïr tawu Musa.

²¹Kwipï chi anka tïkwïl nyo kicham ompö mïkulöwunyi ropöwo ECHOTYON atökepöghisyeghö ompö Ema nyo mi ECHOTYON nko ighisyewutkachi löwïr nko sïro pö tïsï.

²²Kwipchï chi anka tïkwïl nyo le mïrön anta korka ECHOTYON tïkwïn cho kicham mïkulöwunyi, sïrïmtin nko kari yitïn nko kaymoris nko kari kat nko tïku walaka cho kikigha koltin.

²³Kipï chi anka tïkwïl nyo kitïng anankis cho orusöch le akwa lamay nko cho pïröch nko cho pö katani nko puto ngaror nko sïro pö mökol cho kikïsïl kïpïröchitu nko sïro pö ngaror.

²⁴Kikonï chi nyo kimuköy ropöwo silpa anta taghoy cho pö ECHOTYON, akipï chi nyo kitïng keti tilok cho pö ighisyö anka tïkwïl.

²⁵Kipï korï cho le tïngon tïkwïn cho kinapa chane morikwa: anankis cho orusöch le akwa lamay nko cho pïröch nko cho pö katani.

²⁶Kinap tïkwïl tasimayi puto ngaror.

²⁷Kipï poyï koghi oniks nko koghi walaka cho kïtotyini epod nko sïra takat

²⁸nko tïkwïn cho ngutoy cho onyïn nko mwagh nyo kinoghöy nko mwagh nyo kiyiltoy nko mankoy cho kïpelöy nyo ngutoy cho onyïn.

²⁹Kipï nyu pipö Israel cho le mïrön nko kor ropöw akutö ECHOTYON le ato kicham mïkuliskökwa ompö ighisyononi kimwochï ECHOTYON Musa.

³⁰Kïlenchï Musa pipö Israel, “Kakïl ECHOTYON Pesalel wero Uri, wero Ur nyo pö pipö ara Yuda.

³¹Kenyïghit Tororöt nyinte mïkulögh akutö kimukat nko ngöghomnyö nko chïreryö nko kinkïtöt nyo pö ighisyö anka tïkwïl nyo pö morïn.

³²Atökunkïtï ighisyo chïreryö akwigh koltin nko silpa nko taghoy,

³³akupat koghïn cho kïtötöy nko ket cho kipötöy nko ighisyö anka tïkwïl nyo pö morïn.

³⁴Ketö owesyö nyinte nko Olyap wero Aisamak nyo pö pipö ara Dan atökunet pikö walaka.

³⁵Kenyïghit ECHOTYON chane owesyö kwigh ighisyö anka tïkwïl nyo ighöy chi pö morïn nko nyo ighöy chi nyo kiröy koghïn anta nyo pö sïlinto tasimay cho orusöch le akwa lamay nko cho pïröch nko cho pö katani anta nöpinto sïro, chane cho ighöy ighisyö anka tïkwïl akunkït ighisyö nyo pö kikirata koghïn.