Read pokoot WUWÖT 36 Bible Online

WUWÖT 36 - pokoot bible

WUWÖT 36

¹“Ighöy Pesalel nko Olyap nko chi anka tïkwïl nyo muköy nyo ketö ECHOTYON kimukat nko ngöghomnyö, kunkïtï ighisyö ompö teksyo Emanoni, lenyini kömwochï ECHOTYON chane kwigh.”

²Kïkur Musa Pesalel nko Olyap nko chi anka tïkwïl nyo kile tïngan nyo kitö ECHOTYON kimukat nko chi anka tïkwïl, nyo kicham ompö mïkulöwunyi kungwïn kwigh ighisyononi.

³Kutö Musa chane ropöwechay kökonï pipö Israel atöketeka Emanay tïlil, kïtas tagh pipö Israel kwipchï Musa ropöw tökwoghö chik.

⁴Atolapay kïpa pïchay kile tïngon kighöy ighisyonay pö Emanay tïlil

⁵wölo mi Musa akïlenchï, “Kepï pich tïkwïn cho chang kïtïl cho kikïmököy ompö ighisyonay kamwa ECHOTYON kegh.”

⁶Kutötö Musa kut kïghömï möngonay kïmïkul akïlenchï pich, “Möminye machata kwigh chi ighisyö nyo pö ropöwo Emanay tïlil.” Kïlenyona kemwochï pich tömökwipï ngat,

⁷ompöwölo kimïchï tïkuchini kitïng chane kuwany ighisye akïtïl.

⁸Kïtek pïchay kile tïngon ompö kwenu pïchay pö ighisyo Ema nyo mi ECHOTYON. Kïteka anankis taman cho kikïnap nyo karam ompö puto kech cho orusöch nko cho lata akwa lamay akï pïröch akïmina kerupimtin.*

⁹Ananke akonga kï miten taman nko odeny koghïntö akï miten odeny töpesïntö. Karkegh anankiska löwïr.

¹⁰Kïnap anankiska cho le mut kïlïkwï akonga. Kïnap chinö walaka lenyoni.

¹¹Akwighchï yitïn cho orusöch sörömuto anankiska akwigh chinö walaka lenyoni.

¹²Kwighchï yitïn tömönut mut ananka akonga. Akwigh chinö walaka lenyoni. Akwigh kïtopön kegh yiti.

¹³Kwigh akodetis cho le tömönut mut cho pö koltin, akunyoryö anankiska ompö akodetischoni atökïlïkwï kïgh akonga.

¹⁴Kïnap anankis taman nko akonga ompö puto ngaror atökïlïkwï pörköyeto Emanoni.

¹⁵Kwigh cho karkegh, kïlïkwï koghïntö miten taman nko sömök kïlïkwï töpesïntö miten odeny.

¹⁶Kïnap anankiska mut kïnyoryö akutuyö tïkwïl chinö le mut nko akonga.

¹⁷Kwighchï yitïn tömönut mut sörömu chay kikïnapta akonga akwighchï chinö walaka lenyoni.

¹⁸Akwigh akodetispa taghoy tömönut mut akutö yitichay tökunyoryö Eme kïlïkwï akonga.

¹⁹Kïnap sïro pö mökol cho kikïsïl kïpïröchitu nko cho pö ngaror cho kilumo Eme.

²⁰Kïtekta tilok kïlïkwï pölöweko Emanoni.

²¹Kïlïkwï pölöwontö akong miten angwan koghïntanyi, kïlïkwï töpesïntanyi sentimiten 66.

²²Kitïng pölöwontö anka tïkwïl wölo lïtate, wölo kinyoryegho. Kikigh lenyoni pölöwe löwïr cho pö Emanoni.

²³Kwigh pölöwo Ema cho le tömönut odeny ompö okumpö tagh,

²⁴akwigh pïrïmpoti silpa cho le tömönut angwan cho kilutöy pölöwe, kikitö pïrïmpot odeny ompö ngwïnyi pölöwon akonga, atökïnam pölöwe wölay lïtote.

²⁵Kwigh pölöwo Ema cho le tömönut odeny okumpö löt

²⁶nko pïrïmpot 40 cho pö silpa, kikitö pïrïmpot odeny ompö ngwïnyi ket akonga kitoröw odeny ompö pölöwon akonga.

²⁷Kwigh pölöwe mut nko akonga ompö Emanoni wölo le löt okumpö ta.

²⁸Kutö pölöw odeny ompö luchtine.

²⁹Chöghote ompö okumpö ngwïny wölo nömote ompö parak, ompö kiwitate nyo pö tagh Lata choni kwodeny, choni cho nyoryot luchtine kwodeny.

³⁰Kïlïkwï pölöw cho le mut nko sömök nko pïrïmpotikwa cho pö silpa cho le 16, kikitö pïrïmpot odeny ompö ngwïnyi pölöwon akonga.

³¹Kwigh pïrompur cho pö tilok mut ompö wop akonga nyo pö Emanoni

³²nko pïrompur mut ompö woptö anka nko pïrompur mut ompö wölnö le löt okumpö ta.

³³Wölo weröy pïrompuryonta nyo mi kwenu pölöw kïngata söröm ntökwit söröm.

³⁴Akïmala pölöwe koltin akwigha koropetine koltin cho nömöy pïrompurkö cho kïmolo koltin tïkwïl.

³⁵Kïnapa ananka katani puto kech cho kikïsïl cho orusöch nko cho lata akwa lamay nko cho pïröch akïnöpchï kerupimtin.

³⁶Kutö kïyösyeghö pchörin angwan cho pö tilok akikïmala koltin nko akodetispa koltin ompö pïrïmpot angwan cho pö silpa.

³⁷Kïnöpchï ananka katani kuketo Ema nyo kikïsïl nyo orus nko nyo lata akwa lamay nko nyo pïrir nko nyo pö puto kech.

³⁸Kwighchï anankanay pchörin mut cho pö tilok akïmala koltin. Kïlïkwï akodetiskökwa cho pö koltin akwighchï pïrïmpot cho le mut cho pö taghoy.