Read pokoot WUWÖT 9 Bible Online

WUWÖT 9 - pokoot bible

WUWÖT 9

¹Kïlenchï ECHOTYON Musa, “Wïyö wölo mi Parao ailenchï kölö ECHOTYON, Tororöt pö Eprania, ‘Nya kïpa piköchan atökïpöghisyeghwanïn.

²Ato itaghenyi chane kïpa,

³kuwongo ECHOTYON sömew nyo gha tukaku nko angoletineku nko sïkïröyiku nko tamasayiku nko kechiryeku nko neköku.

⁴Wölo töni ECHOTYON rotyot kwenu tupa Israel nko tupa Misri, atömömeghö cho pö pipö Israel.

⁵Kïlö ECHOTYON oghan asïyech lenyoni.’ ”

⁶Kwigh ECHOTYON lenyoni asisto odeny. Kïmeghö tupa Misri lömïs, wölo möminye ompö akong nyo kima ompö tupa pipö Israel.

⁷Kïyonta Parao pich kuros tupa Israel kïsïwa lö möminye ompö akong nyo kima, wölo kwaghïghit möt pö Parao amöchömchïnye pïchay kïpa. Tasusay

⁸Atolapay kïlenchï ECHOTYON Musa nko Aron, “Arama or ompö nökögh aikany kwistö Musa kutang yïm ompö tawu Parao.

⁹Atökïlïkwï terïtyon ompö koro Misri kïmïkul, atökwam tasusay pich nko kyak kïlïkwï moyoy.”

¹⁰Kiram chane or ompö nökögh akughyongö tawu Parao, kwistö Musa aren kutang yïm. Kwam tasusay pich nko kyak kïlïkwï moyoy.

¹¹Akimemïcha chepsoköytinechay kughyongö tawu Musa, ompöwölo kyam tasusay chane nko pipö Misri löwïr.

¹²Wölo kwigh ECHOTYON möt pö Parao kwaghïghit amöterchïnye chane, lenyini kimwochï ECHOTYON Musa. Takarïs

¹³Kïlenchï ECHOTYON Musa, “Ngeta asïyech tökwoghö aiwö ilenchï Parao, kölö ECHOTYON, Tororöt pö Eprania, ‘Nya kïpa piköchan atökïpöghisyeghwanïn.

¹⁴Melö tonyörilonan ye kichoput mötworiku nko piköku opïn, wölo onyörilinyi tïkwïl atenkïtunö lö möminye anka nyo karkegh nko ani ompö ngwïny.

¹⁵Ompö ye kötö koghïtan ewunyan alïweninyi nko piköku sömewut akötö kewonyenyi ompö ngwïny.

¹⁶Kopïstinyi söpö, ompöwölo omökan oporunyi owesyenyan, atökïrumtö kaynenyan ompö ngwïny kïmïkul.

¹⁷Temitenönyi kwole kegh ompö piköchan aitöghonyi chane kïpa.

¹⁸Wölo ato tenö nyete asïyech, oropönunan takarïs cho echön cho kimömicha cho lata choni kïngata otini kitor koro Misri nko ye.

¹⁹Yoktenö ye nyu kerongwï kyakiku löwïr cho mi achey kïpka kaw, ompöwölo ropönöy takarïs akïmeghöy kïgh anka löwïr nyo mi sany.’ ”

²⁰Kirang chi anka tïkwïl nyo kiter ngölyonto ECHOTYON ompö mötwori Parao tukachi akïkur sekeykachi kïpa kaw.

²¹Wölo pich walaka cho kimötercha ngölyonto ECHOTYON kï kipïsyï sekeykökwa nko twakwa wölnö le achey.

²²Kïlenchï ECHOTYON Musa, “Ghïtenö ewungu kutang yïm atökïropönchï takarïs koro Misri kïmïkul, ompö chi nko kyak nko onkïy nko pagh cho mi par.”

²³Kughïtö Musa lïkïnyi kutang yïm. Kiyonï ECHOTYON kighumöt nko takarïs akïrökwï ma kungwïn ngwïny.

²⁴Kiropan kïchïnu takarïs akuryal yïmö le ma. Kitomönye kïmito cho lata choni otini kitor koro Misri nko ye.

²⁵Kunyar takarïschay kïgh anka tïkwïl nyo kimi par ompö koro Misri kïmïkul: pich nko kyak nko onkïy nko pagh cho mi par akïrïng ket löwïr.

²⁶Kïpoto koro Kosyen, wölo kimi pipö Israel nyo kimömicha takarïs.

²⁷Kuyoktö Parao kekur Musa nko Aron akïlenchï chane, “Kaghan ngokï ye, wölo ECHOTYON nyo pö man. Wölo ani nyo kalel nko piköchan.

²⁸Asagha ECHOTYON, kïcheng kighumötonï nko takarïschï, ompöwölo kingwonchencha. Opïstenokwa ape, amelö totöpïyokwa nyo kogh.”

²⁹Kïlenchï Musa nyinte, “Otini katan kanasyantanï oghïtan ewunyan kutang wölo mi ECHOTYON. Wonyot nyu kighumötonï nko takarïschï, atenkïtunö lö pö ECHOTYON ngwïnya.

³⁰Wölo onkïtön lö melö kekonyïtönyi nko mötworiku ECHOTYON Tororöt.”

³¹Kilï takarïs kitani nko matay, ompöwölo kökiterempan matayï akïwö tapïk kitani.

³²Wölo kimenyorisyöcha nkanuna nko paghe walaka, ompöwölo kitomönye kuyin.

³³Kïweghö Musa tawu Parao kutang sanypa kanasyantanay, akughïtö ewunyi kutang wölo mi ECHOTYON tökuwonyö kighumötonay nko takarïschay, amelö kitökïropan ngat.

³⁴Wölo otini kisïwa Parao lö mökïminye rop nko takarïs nko kighumöt, kwigh ngokï ngat akwaghïghit möt nko mötworichi,

³⁵amöchömchïnye pipö Israel kïpa, lenyini kimwochï ECHOTYON Musa. Talam