Read pokoot AYUPU 1 Bible Online

AYUPU 1 - pokoot bible

AYUPU 1

¹Kimi chi nyo kimöngöy kor Us nyo kikïkuro Ayupu. Ki chi nyo tenate akikonyïtöy Tororöt akilowito kegh ghöyityö.

²Kitïng werkachi mut nko odeny nko tipïn sömök

³akitïng kechir 7,000 nko tamasay 3,000 nko tïch 1,000 nko sïkïröy 500 nko mötwor cho chang aki chi nyo kile sïkön nyinte kïtïl pich löwïr ompö wölini le Kongasis.

⁴Kirutochini kegh werkachi kïnomnyö kwomöy akortin ompö pösyö. Kipetöy nyu chane löwïr nko tipikwa kïtuyegho kayini mi akor atökwomisyö akïgheghsyö tïkwïl.

⁵Otini kiwonyö osisweko akortangwa, kïkur Ayupu chane atöketïlil, kingetöy nyinte nyini le kiwasan akïropta ropöw cho kïpelöy kïrïp kegh nko wölo kiteno chane, ompöwölo kinonöy nyinte lö, “Töptoy kikwigh ana werköchan ngokï akïchïp Tororöt ompö lelyot.” Kighöy Ayupu lenyoni kïnomnyö.

⁶Kimi nyu asis akong ato kipka malayken kughyongo tawu ECHOTYON. Kimi Onyötö atoni tïkwïl nko chane.

⁷Kïtep ECHOTYON Onyöt lö, “Ingwïnenyi onö?” Kuyokyï Onyötö ECHOTYON lö, “Komitan owestotoy orimotoy ngwïny.”

⁸Kïtep ECHOTYON lö, “Akesïwenyi mötworintenyan Ayupu nya? Möminye chitö anka nyo kikongityot nko nyinte ompö ngwïny, chi nyo tenate akï pö man, chi nyo konyïtanïn akïripöy kegh tömegh ngokï.”

⁹Kuyokyï Onyötö ECHOTYON lö, “Wöghöy so Ayupu Tororöt kwïle?

¹⁰Nyini kekartenyi nyinte nko pikachi nko kïgh anka tïkwïl nyo tïng nyinte aisoyönönyi kïgh anka tïkwïl nyo ighöy nyinte aitönönyi nyinte kyak cho chang kïghömï ngwïny.

¹¹Wölo ato ichenganyi kïgh anka tïkwïl nyo tïng nyinte, kïchïpinyi nyinte lokonyïn!”

¹²Kuyokyï ECHOTYON Onyöt lö, “Achona tïkuchi löwïr mi moriku, idena wölo kedoy, wölo meswanga ewungu nyinte.” Kïweghö nyu Onyötonay otini kimi ECHOTYON.

¹³Kimi nyu asis akonga ato kyomisïyi akïgheghöy dipay* werpö Ayupu nko tipikwa ompö koto werïngwa nyo wow

¹⁴kwitï mötworintö wölo mi Ayupu akïlenchï, “Kömi eghina kïngorsïyi, kwoketïyi sïkïröy ato lekïto chane.

¹⁵Kupokyï pipö Sapea panini akïrang. Kïpar chane mötworiku lömïs. Kachïwïtan onkït nka nyï kangwïnan omwowunyi.”

¹⁶Akwotini kitökïmi kïngölonöy, kwitï mötworinte anka akïlö, “Köyonï Tororöt ilat kwam kechiryeku nko mötwori lömïs, kachïwïtan onkït nkanyï kangwïnan omwowunyi.”

¹⁷Akwotini kitökïmi kïngölonöy, kwitï mötworinte anka akïlö, “Kösetï lïko Papilonia akïchagh kegh kïlïkwï söpïchis sömök, akupokyï tamasay akïrany lömïs akïpar mötwori löwïr. Kachïwïtan onkït nkanyï kangwïnan omwowunyi.”

¹⁸Akwotini kitökïmi kïngölonöy, kwitï mötworinte anka akïlö, “Kimi moneku kwomöy akortangwa ompö koto werïngwa nyo wow,

¹⁹kwitï chepkïrïri nyo kingwïno okumpö surkwen akurulto köyay kïtïgh chane lömïs. Kachïwïtan onkït nkanyï atangwïn kangwïnan omwowunyi.”

²⁰Kïnget nyu Ayupu akïkarer sïrokachi ompö nkwonïn akïrwach mötïnyi, atolapay kupïtyï ngwïny

²¹akïlö, “Kyangwïnan muyeto yonyu kïchïrut amïlonan lenyini kïchïrut. Kikonï ECHOTYON akakïcheng nyinte. Nya kïsala kaynenyi!”

²²Wölo kïrkegh kighisyö choni löwïr, kimelö kigh Ayupu ngokï anta gheghchï Tororöt.