Read pokoot AYUPU 10 Bible Online

AYUPU 10 - pokoot bible

AYUPU 10

¹“Kikïtödöghchanïn söpenyu kegh, tera ngwïrngwïrönötenyan. Ongölonan ompö ngwonïnto mïkulöwunyan.

²Olenchinan Tororöt, merwokwante porwanïn kïyï kïmoyocha nko nyi.

³Karam so ompö nyi otini imitenyi ireyanïn? Karam so otï imitenyi söse ompö nyini kighanyi, aingwangwan tötut pö mwokïyis?

⁴Itïngetenyi so konyïn cho lata cho pö ptangengmöt? Irosïtonenyi so le wölo rostoy ptangengmöt?

⁵Karkegh so osisweku nko cho pö ptangengmöt anta kongityote könyisweku nko könyiswo ptangengmöt?

⁶Nka nyï isyokenyi ngokichan aiyarayar,

⁷kïrkegh kenkïtönyi lö melö otïngetan lelut akï möminye chi nyo muköy kïsörwanïn ompö moriku?

⁸“Kimimïghanïn moriku akwighanïn anyï ye kewaghakenyi ainyaranïn.

⁹Nana lö kighenaninyi nyïngwïtyan iyokyinaninyi ye nyu nyïngwïtyan ngat?

¹⁰Kimïlwaninyi le chö aimamananinyi le kalutya.

¹¹Kikarteghenyi portönyan resyan nko peny ainapenaninyi ko nko tikit.

¹²Kikonaninyi söpon nko chomnyogh nyo pö kokay akïrip kamanatengu mïkulöwunyan.

¹³“Wölo kïrkegh kïlenyoni, onkïtön lö kiwïnchinyi ngalechoni mïkulöwungu ankïtön lö ki machatengu nyoni.

¹⁴Iminyi iköngöy tesïwena aghan ngokï, tetaghanyi lösteghwanïn lelutkachu.

¹⁵Heywey ani ato ochan mwokïyon! Kïkany ato ochan tenate, kïmosyolanye kegh ompöwölo otïngetan arasï nyo wow osïwïyan kiwongunötenyu.

¹⁶Kïkany ato osyolön kegh ilepaninyi le ngötïny aimughenaninyi töngönchinköku.

¹⁷Imitenyi tagh iyonu semï wölo omitan kïnomnyö aitasanyi nörekyengu ompö ani aipkanïn pung pöranïn kïnomnyö.

¹⁸“Ompö ne tekanyanyi olïtunenan muyeto yonyu? Kitö ngwangwa ameghan kïtomö kïsïwanïn kong,

¹⁹kitö olïkunan chi nyo kimökïyïnye kitö kïtïpanïn panini.

²⁰Kïchï möngörïcha osiswö cho pö söpenyanï? Pïswante oturön nyo mïnïng.

²¹Kïtomö owan wölo melö tomïlonan, koro sïngiryö nko tuwïn nyo tuw lömïs.

²²Koro tuwïn nko kwangkwangat kor nyo karkegh löpoyïntanyi nko tuwïn.”