Read pokoot AYUPU 14 Bible Online

AYUPU 14 - pokoot bible

AYUPU 14

¹“Ngörï osiswo chi nyo kiyï korka akï chang kömpölelutkachi.

²Pitöy nyinte le tapïk akïyam rïpöy le rurwö akupot lö weng.

³Irosonenyi konyiku chi nyo lata nyoni aimïtanyi nyinte ka kirwok irwokyï?

⁴Ngo nyo muköy kwigh kïgh nyo tïlil kungwïna nyo le sïmnyon? Möminye chi nyo muköy.

⁵Ompöwölo kiketat osiswechi, ainkïtönyi wölo tenö oroyechi amemukönye nyinte ntökïtïl rotyotïn cho kitönönyi.

⁶Rosa kareran aipïstö nyinte onkït, atökïngarak ntökïtenö kuwany osiswechi le mötworin nyo kakikir.

⁷“Ompöwölo ato kïtör ket kïtö kïpitu ngat akï möminye kïgh nyo körtoy morichi mapit.

⁸Kïrkegh köyositu ighinkachi ompö nyïngwïny akïnïn mïsïkyenyi ompö ngwïny

⁹wölo nyini könguchï pögh kïpït akïsach morichi le ket nyo kötökïghyöghöy.

¹⁰Wölo meghöy chi aketïp akwotinö kakïma kïwetöy onö mïkulöwunyi?

¹¹Le wölo wonyegho pögh nanam, akïyomö lalwatïna,

¹²kïlenye nyoni chi, rïwöy amelö tökïngetöy ngat amöngetönye ntökïtenö kuwonyö yïmwöy, amotyeghonye rïwöntenyi.

¹³Opï kötö iwïnchaninyi ngwen kötö iwïnganinyi ntökïtenö kuwer nörekyengu, akwoto wonyö osiswö cho kinïkwaninyi inananïn.

¹⁴Ato ma chi kïtökïsöpöy ngat? Oköngisïyan ompö osiswechan löwïr cho pö woyöt ntökïtenö kwïtï kityakatenyan.

¹⁵Ntökekuraninyi kötongitönunyi kötömchininyi emö ighisyeto moriku.

¹⁶Nyo melö kötö ikïtotonenyi kelyechan cho katïkatan melö kötö inömonenyi kong ngokichan.

¹⁷Kötö kïrötyini lelutköchan mïlot aikartenyi ngokichan.

¹⁸“Wölo ngötöy kutïng akughumotö aketarenta ghat ompö wölo könömöy.

¹⁹Omöy pögh koghïn kuchutöy puser nyïngwïtyanta ngwïny lenye nyoni wölo kewurtenyi nyu kikönöto ptangengmöt.

²⁰Irïntonyi ptangengmöt kïwö kokay, iwöghökenyi tokochunyi achodenyi.

²¹Nyoru werkachi konyït akïmenkïtnye nyinte kïkany ato kitö chane arasï, kïmösïwïyinye.

²²Lïmöy kichïrto portanyi akïriröy kusyonchin kegh pat.”