Read pokoot AYUPU 16 Bible Online

AYUPU 16 - pokoot bible

AYUPU 16

¹Ompö atoni kuyokwï Ayupu lö,

²“Kyalïman ngal cho chang cho lata choni ochikwa löwïr soghsoghï cho otöswanïn nyarïl.

³Oyï ato wonyot ngalekwa chi puryö kinyiwut? Anta kïgh ne nyo keghinyi mölyöngunö?

⁴Ontökochikwa ani achan akwa, kötö omwoghan le akwa, ngal cho gheghchinokwa asïngwïltekwa.

⁵Kötö kilokwa ngaleko kutinyan akötö ostoy kichïrntönkwa ompö saghsaghateto ngalechan.

⁶“Ato angalanan, kïmostonye kichiratenyan, akwoto omïkukönön kwostoy nyu kitya?

⁷Ay, keghanïn ye, Tororöt awïran akïpar katanyan kïtuwit.

⁸Keghanïn nyinte achankwïlan, akï nyoni nyo mwotïtenanïn akangangtanïn kiyuyatenyu, akïsöwintönchï ngokichan.

⁹Kapalpalenanïn Tororöt nörekyenyi akureyanïn, ngwïryelanïn ompö kireyat punyontenyan.

¹⁰Kamïnanïn pich akïroröchanïn. Kegham kegh chane kurikanïn, akurapakanïn lalapka ompö arata.

¹¹Köpïsyanïn Tororöt pich cho ghach akïwirchanïn mori mwokïyis.

¹²Kyopöyösan, wölo kïryöpanïn Tororöt, kinamanïn sökörwö akunyaknyakanïn. Kighanïn alïkwan kemeryantenyi nyo keröy.

¹³Kerikanïn pikachi cho wutu kotï keröy nyinte söromoköchan, melö syonchinanïn akïmïlchï ngwanenyan ngwïny.

¹⁴Chïmpisanïn nyinte kïnomnyö pulchinanïn le nyakan.

¹⁵Konöpchan portanyu sarankwachtin apurpuran owesyenyu ngwïny.

¹⁶Soyöy tokochunyan ompö lok kelukisyö ontöyi konyichan kïtuwöchitu lömïs akwompö misata lok.

¹⁷Kïrkegh meghnye morichan kïgh nyo gha akutenate saghatenyan.

¹⁸“Nyï we ngwïny, metïp kisönköchan amekany kïnyorï lokechan wölo tököghöy.

¹⁹Mito nyete le ye söwintenyan yïm mi parak nyinte nyo ghyongtewanïn.

²⁰Ngörertonanïn kongotichu wölo olokyinan Tororöt kungarakanïn

²¹atö kupesyö nyinte ptangengmöt nko Tororöt le ato kipesyot chi nko pöröryenyi.

²²Ompöwölo ato wonyö könyiswechï ngörï owetan or nyo melö tomïlenan ngat.”