Read pokoot AYUPU 17 Bible Online

AYUPU 17 - pokoot bible

AYUPU 17

¹“Kingat ani söpon, kikuwonyö osiswechan, mito ngwen kïpsach kïnïkïwanïn.

²Kirikanïn pich cho roröchinanïn rosöy konyichan wölö lata nyïtatengwa.

³“Murtenö nyu kïgh ngwïny nyo kowolwolchan kegh nko nyi, ngo nyinte nyini mi okuntönyan kïsöröpkanïn?

⁴Le otini kimolulönyi mötöwekwa möpköchï kïgh, kïmekany nyu kïnyorï chane rïntagh.

⁵Köryot monïngo chi nyo wïchtoy kongotichi lö tonyorï kareranto tïkuchi.

⁶“Kakighanïn alïkwan chi pö kelat alïkwan chi nyo kingwïtïtoy.

⁷Kikuköryolisyö konyichan ompö sönönöt akuwilwilisyö ngichayayichan löwïr le rurwö.

⁸Töngönchini pipö man ngalechete, akusus kegh pich cho puryö lelut ompö pich cho ghach.

⁹Kïrkegh kïlenye nyoni kïkomönöy chi pö man arenyi tösöy tagh kwowesitu tya chi nyo möpïröchnye morichi.

¹⁰Wölo omïlisyene ngat löwïr, tasïwena lö monyorchinanye kwenunkwa chi nyo ngöghom.

¹¹Kikuwer osiswechan, kikunyorisyö tötutköchan, akïmeghanïn mu tïkwïl.

¹²Wöghököy chane oghö kïlïkwï pöghet, otini katuwit kïlö, ‘Karich kïlöpoyit.’

¹³Ato lïkwï pïrïm konyan nyo owetöy, ato oghïtochan pöröyunyu wöloni tuw.

¹⁴Ato olenchan pïrïm, ‘Ichinyi paponyan,’ aghan nkutyan, ‘Yonyu,’ anta, ‘Cheptönyo,’

¹⁵kïmi nyu onö kikönötenyan? Ngo nyo sïwïyi kikönötenyan?

¹⁶Röytoy kïwetöy ngwen? Kïröytocha tïkwïl kelïtöy terïtyon?”