Read pokoot AYUPU 20 Bible Online

AYUPU 20 - pokoot bible

AYUPU 20

¹Atolapay kuyokyï Sopar Ayupu lö,

²“Keghanïn kinonutköchu omölyöngunyi, ompö ngölyonto kikuskusat nyo otïngetan.

³Kalïman chilat nyo lilanïn nyo kegh kinkïtöteto mïkulöwunyan omölyongu.

⁴“Menkïtönyinye so ngölyontonete su kïngeta otini kikigh chi aketö ngwïny,

⁵lö kwolöy kegh mwokïyon ompö osis cho ngörï akï tangogh ngörekyo pich cho mewöghöcha Tororöt?

⁶Kïrkegh kapusta koghïntanyi ntökwit yïm akïwö mötïnyi ntökulengö poltoy,

⁷kupotöy kokay le sïkökachi lentöy nyu chane cho kisïwa nyinte kunko chichay.

⁸Potöy le kirwotïtogh nyo melö tökenkïtu, kïyonöy nyinte le kirwotïtogh pö oghö

⁹melö tökïsïwïyi nyinte kong nyo kisïwa akïmökïsïwïyinye otanyi nyinte.

¹⁰Yöro monechi kisyonöt mey akuyodoy monechi mökosyenyi.

¹¹Kïrkegh kilïmchini kegh owesyo chumwaknan, wölo rïwöy nko nyinte terïtyon.

¹²“Kïrkegh konyïn ngokï le kumat ompö kutinyi kïrkegh köpïnchï ngalyapunyi to lö tökwonyïnchï nyinte nyo kogh

¹³kïrkegh möchömönye kïpïstoy akïpïrchï lïkwochuto kutinyi.

¹⁴Wölo wöghöko omisyenyi kïngwonitu ompö muyenyi lïku ngwono moroy ompö orinyi.

¹⁵Nyïkwïdoy mwokïyon sïkönöt akungungwï ngat, wöswösuno Tororöt muyenyi.

¹⁶Rerïyöy nyinte ngwono moroy pöröy nyinte moroya.

¹⁷Mötöponye ntökwam onyïnio kor anta sïwa kumot nko mwowöy kuyintoy le pulwatin.

¹⁸Yodoy nyinte tïkwïn cho kicheng, mönïkuwönye kïröytö sïghiny möngörökyininye tösöw cho kinyorunö mïnchïrïsnönenyi.

¹⁹Ompöwölo kichop kong pönon akïpïstö mey akïmas korïn cho melö kitek nyinte.

²⁰“Ompöwölo chemu möpïghyongönye kïmösörunye kïgh nyonikïny tïkuchoni ngörökyini nyinte.

²¹Möngötïnye ompö nyo le moryon otini kiwany kwomisïyi kïlenyona möngötunye perurtanyi.

²²Nyini könyorï mökosyö nyo köyöröy kuryam nko nyarïl, popöy nyinte nyarïl kupurpuröy.

²³Nya kwam kïpïghyö lö kïng, tyorchini Tororöt nyinte nörekyenyi nyo ngwan mïlchini Tororöt nörekyenyi kïlïkwï omisyenyi.

²⁴Ato lentöy orïpo ngot kïwut nyinte protwö kurel,

²⁵kïnam karor, kurel koghogh akuchumuna patagh kuryölonu, kïchïnchï nyinte mïghötö.

²⁶Kïrongchini tïkuchi wölo tuw lömïs pelöy nyinte ma nyo menagh ptangengmöt. Kïpelöy kïgh anka tïkwïl nyo ngötuno konyi.

²⁷Poru yïmwöy ngokichi, akugheghchï ngwïnya nyinte.

²⁸Chutöy puseryontö katanyi, ngïrirtoy ompö nörekyo Tororöt.

²⁹Nyoni kïgh nyo nyorchinegho mwokïyon wölo mi Tororöt akïnyoni nyo kikotyï Tororöt mwokïyon kïlïkwï nyenyi.”