Read pokoot AYUPU 21 Bible Online

AYUPU 21 - pokoot bible

AYUPU 21

¹Atolapay kuyokyï Ayupu lö,

²“Atere ngalechan lasiny akany kïlïkwï nyoni kïgh nyo osoghsoghenanïkwa.

³Opïswante angalan tïkwïl, nyini kawanyan ororöchanïn tokomököy.

⁴“Ayo omitan so osyöle nko ptangengmöt? Kwompö ne tömomïkukönön?

⁵Arosanïn, achïrïm anam kut.

⁶Nyini kananan omïghön apotanan.

⁷“Ompö ne tökïtösöpsot mwokïyis ntökïyositu akïsïch sïkönöt nyo wow?

⁸Söwintönchini monekwa kusoyönisyot akïsïwa moneko monekwa kïpusu.

⁹Mito kalya korikwa, melö mi mïghötö amelö nyoru sito Tororöt.

¹⁰Yisot kyakikwa nyo mötïny, yisot tukakwa amelö toru mogh.

¹¹Döngonyotoy monekwa le wara kechir.

¹²Tumöy chane kulïwöy tokigh nko pïkantis akïngörökyï chöghöto kurerun.

¹³Möngöy chane osis löwïr nko mökosyö atolapay kïcholol kïpa ngwen ompö kalya.

¹⁴Mwochini Tororöt lö, ‘Pïstecha kepayasa! Mökïtïngetechanye machat kenkïtunö ortïneku.

¹⁵Ngo nyï le Kimuktoghin nya tökepöghisyechinecha? Akenyorchinecha nyinte tösunöt ne ato kïsaghacha?’

¹⁶Wölo melö chane mökosyö cho ketö kegh nka nyoni kolowitan kegh wölo rwoko mwokïyis.

¹⁷“Kimisöy kïnyïl ata kitömöwonto mwokïyon, otinö könyorï nyarïl, anta otinö ketö Tororöt sitöt ompö nörekyenyi?

¹⁸Anta kwip chane yomat le mopö akutoyö chepkïrïri le morïr.

¹⁹Omwoghekwa lö, ighöy Tororöt ngokikwa kïrïp monekwa. Kölö ne tömömuny nyinte chane kïpköchï.

²⁰Ne makïkany kutupï kong nyarïl ne makïkany kïchamcham nörekyo Kimuktoghin.

²¹Ompöwölo melö tökïmi yangata nyo yongöy monekwa otinö kewonyö osiswekwa.

²²Muköy ptangengmöt kunet Tororöt chïreryö, akwanyï Tororöt nyo rwokini ompö cho mi yïm?

²³Meghöy chi otini tökï wow mökosyenyi, akïpöghisïyi nyo karam akï puryö otyogh,

²⁴akudwarunate portanyi nyoman, akwongeröch koyechi.

²⁵Meghöy chitö anka ompö ngwonïn pö mïkulögh amelö kiwö tökïchamcham kïgh nyo karam nyonikïny.

²⁶Kïrkegh kölenye nyoni kïlïtöy tïkwïl nyïngwïn akïmïgh nkut chane kwodeny.

²⁷Onkïtön kinonutkökwa nko tötutkökwa cho ghach cho oyörekwa oghwanïn.

²⁸Ompöwölo otepekwa lö, ‘Nko ye kö pö yetïn nya? Akunko emen cho kimöngöy mwokïyis?’

²⁹Tomönye so atepakwa pich cho rutoy ngal? Maghanakwanye so ngalekwa?

³⁰Kituköy mwokïyis ompö asispa nyarïl akesöru nyinte ompö asispa nörekyö!

³¹Ngo nyo mwotïtoy ngalechi ompö tawunyi akï ngo nyo ghokyini nyinte kïgh nyo kigh?

³²Ato kïsït nyinte kepa ketïp ketö pich kïrip pïrïmpe.

³³Köromchini nyinte nyïngwïtyanta pïrïm rïpöy pich kïmïkul nyinte akikuntöghoghchï nyinte pich cho makïrar.

³⁴“Omukekwa nyu lö ne osoghsoghanïn ompö ngal cho le kwïle? Akwanyï putintön ngölyon löwïr nyo oyokunekwa!”