Read pokoot AYUPU 23 Bible Online

AYUPU 23 - pokoot bible

AYUPU 23

¹Atolapay kuyokyï Ayupu lö,

²“Ngwan ompö asete ngwïrngwïrötenyan nïkis mungötenyan tya kïtïl kitïmötenyan.

³Opï konkïtön wölo omukan tonyorchï Tororöt kötomukan owö tarich ngacharunyi nyo töpo!

⁴Kötö okorkorchinan nyinte ngalechu atötyan nyinte lasiny wölo lata.

⁵Kötö onkïtunan kïgh nyo mölyöngwanïn nyinte akïpköchanïn kïgh nyo mwowanïn.

⁶Ayo, muköy so kumölenanïn wowïnto owesyenyi? Ewo, wölo kötö terwanïn.

⁷Kötemuköy chi pö man kumölöy kegh nko Kimuktoghin, akötetyokanïn mutinteto ngalechu kokay.

⁸“Arose lö kolan owö tagh, kïmöminye nyinte olan owö löt, kïmonyorchinanye nyinte wöloni

⁹Kolan ayar nyinte okumpö löt kïmosïwiyanye olan awaghaka okumpö tagh, kïmosïwïyanye nyinte.

¹⁰Wölo nkït nyinte or nyo owetan, otini katyamanïn achumwan nko pïchighyö, nyo lata nyo pö koltin.

¹¹Rïpöy kegh kelyechan kïlekïtöch nko chechi karïpan orenyi melö kamastan kömos.

¹²Mamasteghanye kirurutkachi kokomönchan ngalechi mïkulöwunyan.

¹³Wölo möwöghökonye nyinte, ekïngo nyu nyo muköy kïwöghököy? Ighöy kïgh anka tïkwïl nyo mököy nyinte kwïghöy.

¹⁴Ompöwölo puntoy nyinte kïgh nyo kötötwanïn akïmito kinonutkachi tïkwïn cho chang cho lata choni.

¹⁵Nka nyoni opotönan omïghöy ompö tawunyi, nyini kananan kïnamanïn nyökoryö.

¹⁶Keghanïn Tororöt kïmeghanïn mu, kotyeghenanïn Kimuktoghin,

¹⁷ompöwölo kelwakanïn tuwïn akulumanïn tuwïn nyo nïkis.”