Read pokoot AYUPU 27 Bible Online

AYUPU 27 - pokoot bible

AYUPU 27

¹Atolapay kïngalan ngat Ayupu lö,

²“Owolwolan kegh ompö Tororöt nyo söpöy nyo kachengenanïn mantanyu, ompö Kimuktoghin nyo kichopanïn kong!

³Owolwolan lö, otini kïnye tochan satate akïtökïmi kimïny pö Tororöt sörunöyichan,

⁴kï melö ongölononan kutinyu ngala putintön amelö ngölonöy ngalyapunyan ngala lïs.

⁵Moyitanye lö opoyekwa man nyonikïny, amelö ocholan mantanyu tökïtenö ameghan!

⁶Oripan mantanyu lö opoyan man amopïstonanye. Merwokyinanïnye mïkulöwunyan ompö osisweko söpenyan.

⁷“Nya kïnyorï punyontenyan sitonini nyoru mwokïyon akïnyorï nyinte nyo ngetöy kïporyeghenanïn sito chi nyo melö pö man.

⁸Ompöwölo tïng kikönöt ne chi nyo mewöghöy Tororöt, ato mut Tororöt söpontanyi nyinte lö tïch?

⁹Ayo, lïmöy so Tororöt lokechi ato chumchï nyinte nyarïl?

¹⁰Ngörökyini nyinte Kimuktoghin? Kuröy nyinte Tororöt kïnomnyö?

¹¹“Onetokwa ye nyu wölo lata owesyo Tororöt, mowïnyonekwanye kïgh nyo mi kinonut pö Kimuktoghin.

¹²Kyasïwekwa kïyoni akwane löwïr, kwompö ne nyu tongölonekwa sölwontön?

¹³“Anyï kïgh nyo kirorchï Tororöt mwokïyon, kïgh nyo tötyini Kimuktoghin pich cho chopöy pich kong:

¹⁴Kïrkegh kïtosisyö monechi lö ne, kïlïku chane panya ngot amelö nyoru monechi omisyö nyo ghömöy.

¹⁵Tïpöy sömewut cho ngötu, amelö rwoköy möt mïsïktinekwa.

¹⁶Kïrkegh kukapos nyinte silpa le terïtyon akururuk sïro le nyïngwïtyanta mönö,

¹⁷nya nyi kururuk wölo chi pö man nyo loköy choni akupar karichi pö silpa chane cho puryö lelut.

¹⁸Karkegh konyi nyo teköy nko kö pö kapamporö akïlenye tunku nyo pö chi nyo ripsïyi.

¹⁹Sïkön ato wetöy kïrïwöy, wölo pö nyoni söröm, ngeto rïwön akïsïwa sïkönötenyi kipot lö weng!

²⁰Lepöy nyinte mïghötö le puseryon, armönöy nyinte chepkïrïri oghö akïsït.

²¹Ipöy nyinte yomo kongasis lö mïchïkïn, puktoy nyinte wölo low ompö katanyi.

²²Mirtoy nyinte yomononi mesyonchï, kïrkegh kïlentöy orïpöy lö tachïwït.

²³Roröchini yomöt nyinte akïngemöy kurïpöy, tuluno nyinte owesyenyi kïngetunö katanyi.