Read pokoot AYUPU 30 Bible Online

AYUPU 30 - pokoot bible

AYUPU 30

¹“Wölo kangemanïn ye nyu pich, pich cho mïnkech ompö ani! Kyosösan papotïnekwa lö pich cho le kwïle, kimomukanye opïsiney chane kughyongchï kukïdin kïrip kechiryechan.

²Kinyiwut ne nyo kyomukan onyorchï owesyengwa, pich cho kikuwonyeghö owesyö?

³Ompö meywontön nko kömöy, kiyarata kïgh nyo omöy ompö wölo kiyam nko siriron.

⁴Ngurotoy mosolen nko söko keti wudïn akï palata akan kïlïkwï omisyengwa!

⁵Kikitulö chane wölo mi pich kiteghchini chane le ato kiteghchini chorin.

⁶Kingwangwan kïpa kïmang ngötutöy, akïmang pïrïmpot nko köpönot.

⁷Ghïtyegho wudin le kowow akïmolmolchï kegh sïkwïr ori.

⁸Torïrwoköy chane akï monïngo sölwöy kisowsowön pich chane akemuny kïpegha kor lömïs.

⁹“Kalïkwan nyo tumenanïn chane akwamenanïn kelat.

¹⁰Reyanïn chane akusïroro kegh wölo omitan, möpotöcha mösïngwïlchanïn tokoch.

¹¹Ompöwölo keghanïn Tororöt kïkwaghanïn kïgh, ighwanïn chane nyo gha kïpuryö otyogh nyonikïny.

¹²Köpusyanïn pich cho ghach kwipanïn kokwö yöröy kïkwötanïn apïtan akupokyanïn kupurpuranïn owonyan.

¹³Syepanïn chane or lö tömachïwïtan akïtas nyarïltanyan akï puryö chi nyo pöpeköy chane.

¹⁴Kipkonchanïn pich cho lïtuno ngötutöy, akïmïlï kegh kupapanïn.

¹⁵Kinamanïn mïghötö nyo wow köpot ororyenyan le nyo kakutïta yomat akuwer perur nyo kotïngetan le kapuret.

¹⁶“Möminye ye nyu ani söpon kikwityanïn osiswo nyarïl.

¹⁷Silyot koyechan lakaw oghö amostonye sömewonï nyöghanïn.

¹⁸Nömöy sïrenyan lö chïkwïnkwïn akïnanaghanïn le katïto sïrenyan.

¹⁹Köwirchanïn Tororöt noroyon, alatan terïtyon nko aryon.

²⁰“Orirchininyi, we Tororöt, wölo meternwanïnyinye, koghyongön asaghinyi, wölo meyongenyinye.

²¹Kerïpönyi iköromchanïn achopaninyi kong ompö owesyeto ewungu.

²²Kekörmönchaninyi yomöt aighanyi kwipanïn yomononi kerumrumenaninyi chepkïrïri nyo wow.

²³Ay, onkïtön lö imïtyinaninyi wölo mi meghat, kö nyo ryomo pich löwïr cho söpsot.

²⁴“Ayo kïchï monkoghtonye chi ewunyi nyo mi nyarïl kwen so anta ato mi tapan kïmösomönye kingörokut?

²⁵Kimolokanye so pich cho kimi nyarïl? Kimesyonchïnye so mïkulöwanyan pönon?

²⁶Wölo otini kyaran köromnyö, kungwïn ghöyityö, olan akany löpoyïn kungwïn tuwïn.

²⁷Soyöy mïkulöwunyan amösisönye, köpkonchanïn osiswo nyarïl.

²⁸Omitan osömsömöy or puryö ani asis oghyongonan nyoryo pich arir tökengarakan.

²⁹Ochan werto ompö chepkonöw alïkwan kongo cheptusonkol.

³⁰Korïsit portönyan akupokö, kiloyö koyechan ompö kichïr.

³¹Kötum pïkantinyan tumwöyi meghat, kïchögh pkurerunyan chöghöto lok.”