Read pokoot AYUPU 31 Bible Online

AYUPU 31 - pokoot bible

AYUPU 31

¹“Kyaman muma nko konyichan, kyamwaghan lö mopïrchinanye työ.

²Kïgh ne nyu nyo osïkonan Tororöt nyo mi yïm akï ne mïlatenyan nyo ngwïno Kimuktoghin nyo töror?

³Momönye so meghat chane cho melö pö man akusekisyö cho ighöy ngokï?

⁴Mösïwïyinye so nyinte ortïnechan akuyit tïkutko kelyechan?

⁵“Kïkany ato kyotöpan ara putinön akukomchï keltönyan wölo mi lïsata,

⁶akany kepimenanïn kipimöwonto man atökunkïtï Tororöt lö ochan pöropchon,

⁷kïkany ato kakïmastegha keltönyan arawet akïrïp mïkulöwunyan pïrchin pö konyichan, anta ato kikwighanïn morichu agh ngokï,

⁸akany nyu akwam chitanka kighotichan, akengagh kïgh anka tïkwïl nyo kokötkötyan par.

⁹“Ato kipïrchï mïkulöwunyan koko chi arïmuman ompö kiror osyep kuketo pöröryenyu,

¹⁰akany kïchïlchï korkenyan pan chitanka akurïwotö chitö anka nyinte.

¹¹Ompöwölo lïku nyoni alomi, takalnan nyo nyoru sito muti ngal nyo mötïny.

¹²Kölïku alominoni ma nyo pelanïn owonyö, akïpel tïkuchan löwïr cho otïng.

¹³“Kïkany ato moghchinanye mötworichan man, ato kyolelchan chane,

¹⁴oghan ne nyu ato kïtepanïn Tororöt? Oghetan kegh lö ne ato rwokyanïn?

¹⁵Melö so Tororöt nyo kighanïn nyo kigh mötworintenyan? Melö so nyinte nyo kighecha ompö mutïneko yotïnecho?

¹⁶“Ayo, kyomulön so meywon tïkwïn cho kiyöröy anta agh mïsïk kïma mu?

¹⁷Anta kyomisyan onkït kurosu pönon amotö kïgh chane kwam.

¹⁸Wölo kïle papo, kyanaman nyinte kïngeta apuswan. Kïngeta ato kyochan mïnïng, kyoporchan or mïsïktin.

¹⁹Ato kyasïwan chi kïmeghöy ompöwölo möpochïnye sïro, anta meywon nyo kimötïngnye kïgh nyo yeno kegh,

²⁰amotönönye sampu kechenyan kulalanga kegh, akusoyönanïn nyinte ompö mïkulöwunyi,

²¹akwato kyoghchan nyo gha panan, ompöwölo onkïtön lö rulchini kokwö okuntönyan,

²²akanya kïparalanïn charut akïngata psilunyan tököghögh lö tïmsïr.

²³Ompöwölo kyowöghan nyarïl nyo yoku Tororöt, kimokönganye agh kïgh nyo lata nyoni ompö tawunyi.

²⁴“Kyamantan kegh so koltin kïlïkwï kikönötenyan, anta kyaghan koltin cho pïchighöch kïlïkwï longenyan?

²⁵Ayo, kyongörökyan so sïkönötenyan nyo wow, anta kyomenön lö könyorï ewunechan tïkwïn cho chang?

²⁶Ato kyotopönön asis kulïwu anta anama kong pïchinghïn pö arawa nyo wetöy,

²⁷akï kïnkïn mïkulöwunyan sison kïsagh tïkuchoni, achïchïn ewunyan totö tïkuchoni konyït,

²⁸kïlïku nyoni tïkwïl ngokï nyo nyoru sito muti ngal, ompöwölo kalïkwan putin ompö tawu Tororöt nyo mi yïm.

²⁹“Kyangarakan so otino kiwer kögh nyo gha punyontenyan anta ororöchan kegh takat otinö kinyorï nyinte ghöyityö.

³⁰Tomönye ochömchan kutinyu kwigh ngokï, lö ochïp nyinte kïma.

³¹Nyo pö nyoman kimwa piko konyan lö, ngo nyo kirutowï ka Ayupu akïwö kwïle möpïghyö?

³²Mayononanye ton katanyu kïrï kiror opönkosan kukotichu ompö rutoghot.

³³Kyawïngan so ngokichu le Adam, otïpchï ghöyityenyu mïkulöwunyu.

³⁴Kawaghan kutwo pich cho chang akwotyeghenanïn ngemöto kapor ntökwighanïn asï lasay ntömolït sany.

³⁵Kiwonö chi nya wey kïterwon ngalechu? Owolwolan lö omwoghan ngala man. Wöghökwonte ompö choni we Kimuktoghin! Ntekir punyontenyan ngalechinö gheghchineghenanïn,

³⁶kötolokyinan kat ompö anisa, arötyï mötïnyu le tenta.

³⁷Kötomwochinan nyinte wölo kowetïtan kötorikan nyinte le kintöghoghin nyo puryö choghïn.

³⁸“Ato kyachoran nyïngwïtyantanï ongoran ntökïlok wölo kikïkarer chempe,

³⁹antö kyaman omisyö pare kwïle amalanye, ntökwam kömöy piko kïpö pare,

⁴⁰kïmïchini nyu kïpita kato nyo kötöpito nkanun, akïpita wuw nyo kötöpito matay.” Köngötisyeghö yete ngala Ayupu.