Read pokoot AYUPU 32 Bible Online

AYUPU 32 - pokoot bible

AYUPU 32

¹Kïsisyö nyu pïchoni kï sömök mökuyokyïcha Ayupu ngölyon, ompöwölo kïsïwa kegh Ayupu ompö kinonutkachi lö pö man nyinte.

²Wölo kïnarek Eliu wero Parakel, chi pö Pusi nyo pö ara Ram ompöwölo kigh kegh Ayupu lö opoyö man amelö Tororöt,

³akïnörekyï ngat kongoti Ayupu chay le sömök ompöwölo kimönyorïcha kïgh nyo kingaraka nyinte, kïrkegh kikimwa chane lö lelate Ayupu.

⁴Kïpïsï nyu Eliu pïchinö walaka kwam lökoy nko Ayupu ompöwölo ki poy chane kïtïl nyinte.

⁵Nyini kïsïwa Eliu lö kimötïngcha pïchay kï sömök kïgh nyo mwoghöy, kïnarek.

⁶Atolapay kutor Eliu wero Parakel nyo pö ara Pusi kïngalan. “Ochan karöchïnin, ochikwa poy, nyo kawaghan anyakoritwan omwowokwa wölo onontenan.

⁷Kolan, nya kïngalan poyï, nya kunet cho kikïngöghöm ngöghomnyö.

⁸Wölo mïkulöwunoni mi chi, kimïnynoni pö Kimuktoghin nyo ighöy chi kïpköchï kïgh.

⁹Melö tökelö pkarwal opïn cho ngöghomöch anta tökelö poy cho nkït kirwok.

¹⁰Kïlenyona kolan, ‘Ateranïn apïswanïn omwowan tïkwïl ngölyontenyu.’

¹¹“Arose lö kyopïswokwa angalana ngalekwo. Kyateran otini kyomitekwa oyöröy kïgh nyo omwoghöy.

¹²Kyateran ngalanatenkwa lasiny, asïwan lö manamcha ngalekwa Ayupu amöminye chi ompö akwa nyo keyokyï nyinte ngalechi.

¹³Orip kegh molö, ‘Kikenyorucha ngöghomnyö nyo Tororöt nyo rïntoy nyinte, melö ptangengmöt.’

¹⁴Melö kirörwanïn Ayupu ngalechi amongölonchinanye Ayupu le wölo kangalantekwa.

¹⁵“Kimeghö mutïnö chane amökïminye kïgh nyo tökïmwoghöy ngat, kikupotyeghö ngala cho mwoghöy.

¹⁶Oköngisyan pat, akwanyï kisisyö chane ghyongo otini amökïminye ngölyon nyo yoku.

¹⁷Okonunan tïkwïl ngölyontenyu omwowunan tïkwïl wölo osïwïytonan.

¹⁸Ompöwölo otïngetan ngal cho chang, konanïn sirmoy mïkulögh nyo mito orinyan.

¹⁹Arose lö kisikö mïkulöwunyan, le dipay* cho kikïkar kïkwililisyö, akïlenye tökolwo dipay cho le kutön cho lekït kuperisyö.

²⁰Nya angalanan tastan akanye ayatan kutinyu awaghakta.

²¹Moporunanye kïla nyonikïny amomwoghanye ngal lö tökïchan pich.

²²Ompöwölo monkïtönye okusöy chi, ntökönkïtön kötewonganïn Ighintenyan panini.