Read pokoot AYUPU 36 Bible Online

AYUPU 36 - pokoot bible

AYUPU 36

¹Kïtas tagh ngat Eliu kïngalan lö,

²“Imïda kite omwowun ngölyon, nyo kötömwoghöy Tororöt.

³Opunenan chïreryenyan wölo low, atoyityan man Ighintenyan.

⁴Nyoman möpönye putintön ngalechan, mi tawungu chi nyo tïng chïreryö lasiny.

⁵“Rose, awes Tororöt, amösösönye chi. Wow owesyenyi pköchintanyi.

⁶Möpïsininye pich cho ghach kïsöpchöt wölo töni cho kichopöy kong mantangwa.

⁷Rosöy konyichi wölo mi pipö man osis lapay, ighöy chane kïpayta nko pöytoghï akwigh kïnyorï konyït kokay.

⁸Akwoto kïrata chane sïrïmtin akerata pörköyi kiwongunöt

⁹porchini nyu Tororöt chane ighisyengwa nko lelutkökwa, cho kigha menotön.

¹⁰Yotöy yitikwa kïlïm kinetut, akïmwochï kïwöghökisyeghö ghöyityö.

¹¹Ato ter akïpöghisyechï nyinte kïtïpisot ntökuwany osiswekwa ompö kalya akïpöyit könyiswekwa ngörekyö.

¹²Wölo ato matercha, kuwonyegho chane ngot akïmeghö chane kïpuryö chïreryö.

¹³“Chömo kegh pich cho mewöghöcha Tororöt nörekyö amöyörönye kingörokut otini mungöy Tororöt chane.

¹⁴Meghsot chane kïtökï naran akïmeghsot megha ptakalis.

¹⁵Söruno chi nyo kinyörilöy nyarïltanyi akwigh chane kïpköchï ngala kuwerï kuwongunöt.

¹⁶Ay, molinyi nyinte chïwïtena wölo mi nyarïl, töninyi wölo pöro, wölo puryö pïröto kegh akenyïghit mesengu omisyewut cho okwoghöch.

¹⁷“Wölo kenyorunyi sitöt le mwokïyiskö walaka. Nöminyi kirwokö nko man.

¹⁸Irip kegh tömelutïn nörekyö ngemöt amekany kulutïn asoya nyo wow wuw.

¹⁹Ayo, muköy so riratengu kïsörunoninyi nyarïl, anta owesye kïmïkul nyo itïngetö?

²⁰Mepïrchï lö tömökatuwit, ompöwölo kiwonyo pich kestonikwa.

²¹Irip kegh, megh ngokï, ompöwölo kïnyorunyi nyarïl techïwïtena ngokï.

²²Arose lö wow Tororöt ompö owesyenyi, ngo nyo pöytoy le nyinte?

²³Ngo nyo kitötyï nyinte arenyi anta ngo nyo muköy kïlenchï, ‘Keghanyi nyo gha?’

²⁴“Inan nyu ipïlil ighisyenyi nyo tumo pich.

²⁵Kisïwa pich löwïr sïwïyegho chi wölo low.

²⁶Rose lö wow Tororöt amökinkïtöchanye meyitisyotcha könyiswechi.

²⁷Kulöy nyinte pögho ngwïny kïpa yïm akïwaghach kïlïkwï rop,

²⁸nyo mïluno kegh poltoy akïropönchï ptangengmöt kuyinta.

²⁹Ngo nyo nkït wölo korkortoy kegh poltoy nko tïlöt nyo ngwïno möngenyi?

³⁰Arose lö ighöy kiryaltanyi kuwitwit nyinte akuyen nanam wölnö le to kïtuwït.

³¹Pöytoy nyinte pipö punton ompö tïkuchete konu omisyö nyo wow.

³²Nömo morichi kiryal akïmwochï kïwut otini kökeröy.

³³Kichoghötenyi kïmwowu wölo ngwan kïlïkwï nörekyenyi ompö ngokï.”