Read pokoot AYUPU 37 Bible Online

AYUPU 37 - pokoot bible

AYUPU 37

¹“Potönöy mïkulöwunyan ompö nyete tïkwïl akukomunö otini töpo.

²Atera tïlöteto kutinyi nko korïngring nyo ngwïno kutinyi.

³Chörtoy nyinte kiryaltanyi kïghömï mïröt kïmïkul akïyonta kïghömï söremwok pö ngwïny.

⁴Nyini kömuchuryö kïporor, kïtïl ompö ngalanateto wowïntanyi amösisönye kiryal otini mi kïngölonöy.

⁵Tïlöy Tororöt ompö töngönchin otini mi kïngölonöy ighöy tïkwïn cho echön cho möpköchinechanye.

⁶Ompöwölo mwochini takarïs, ‘Ochïnchinö ngwïny,’ akïmwochini pkopïs nko rop, ‘Ropana kïma tarit.’

⁷Nömöy ewu chi anka tïkwïl mengonngon, atökunkïtï pich tïkwïl cho kigh nyinte ighisyenyi.

⁸Kïpa nyu tïpö wudin wölo wïngo kegh akumpur köpönotikwa.

⁹Ngwïno chepkïrïri konyi kughumonu kungwïna pöwöy okumpö löt.

¹⁰Ighöy kimïny pö Tororöt pögh kïköghötyö, akïmamam pögho nanam kïlïkwï takarïs.

¹¹Nyïghitöy polta nyo nïkis kompughon akutoytoyö poltoyko kiryaltanyi.

¹²Petöy nyu chane wöl nko wöl kïrïp kegh nko kerötenyi atökupuntö tïkwïn löwïr cho kimwochï chane kwigh ompö ngwïny nyo möngöy pich.

¹³Kutö pich sitöt anta kïropönchï korenyi anta kuporï chomnyenyi.

¹⁴“Tere ngölyontonï, we Ayupu. Sisa ainan ighisyewut pö Tororöt cho pö töngönchin.

¹⁵Inkïtönyi wölo töntoy Tororöt kiyomisötenyi chane akwigh kiryal ompö poltoykachi kulïwï?

¹⁶Ayo inkïtönyi wölo reresöntoy poltoy ompö yïm, ighisyewut pö töngönchin cho Tororöt nyo tenate ompö ngöghomnyö?

¹⁷Kölö ne tökïlölönge sïroköku le nyï akwanyï kutuno yomat okumpö tagh?

¹⁸Imukenyi körkore yïm le Tororöt aigh kwangerit akuryal le kiyo nya?

¹⁹Netecha kïgh nyo kïmwochini nyinte, melö kïtïngöcha kïgh nyo kïmwoghöy, ompöwölo kïmitecha tuwïn.

²⁰Kïmwochini nyinte lö omökan ongöloney? Mi chi nyo kicham kenyïkwïda?

²¹“Akï ye melö muköy pich kïtopön asis, nyo lïwuno yïm kuköryol pich konyïn, otini kakupuktö yomat poltoy.

²²Ngwïno löpoyïn okumpö löt nyo karam, kiwit Tororöt ororyö nyo kiwöghöy.

²³Mökimukechanye ketyine Kimuktoghin, awes nyinte akï pö man, menyörilönye pich, tïlil nyinte tya.

²⁴Nka nyoni wöghöy pich nyinte möyongöynye nyinte chi anka tïkwïl nyo lentöy ochï ngöghom.”