Read pokoot AYUPU 39 Bible Online

AYUPU 39 - pokoot bible

AYUPU 39

¹“Inkïtönyi aro cho yisot korinyoy? Kisïwenyi chemïl kughomsïyi?

²Ayo, inkïtönyi aro cho tïsyöritu korinyoy ainkïtönyi ato yisotï?

³Anta inkïtönyi otinö chörorisot kïyï warekwa nya?

⁴Yetu warekwa akïtisonchö, yetuno chane wölo le wuw, akïpesyö nko kamati otini kölïkuyö, akïpechï kegh nyo melö tökïpkonöy ngat.

⁵“Ngo nyo kigh chemarmar kutwomotö ngo nyo kityak porköy kumï kïwechï kegh?

⁶Ngo nyo kitö kor nyo le kïmang akïlïkwï möngenyi koro partin?

⁷Roröchini nyinte kighumöt nyo mi kanasyan amölïmönye kiteghata rongin.

⁸Remotoy kutïngkot wölo le acheytanyi kïyörotoy kïgh kïtïkon nyo nyaril.

⁹“Muköy kïrpö so kïcham kïpöghisyewunyi? Anta muköy kïrï pidangu kïyech?

¹⁰Imukenyi rötine so mchoki aingorta anta muköy netonenyi kïngorunyi par?

¹¹Imontonenyi kegh nyinte ompöwölo awes tya, anta ipïsyinenyi nyinte ighisyengu kwigh?

¹²Ighönenyi lö kungwïnöy kaw akwipunyi pagheku kïpka rökor?

¹³“Ngongöy cheptusonkol köpepoy le tepiltoy wölo melö muköy kupiltoy le kachïlïkoköch.

¹⁴Ompöwölo pökokyini adöstinechi korïron akïpïsyï kulalang ngwïnya

¹⁵akïwutyeghö lö muköy kïtyak kel anta tyak tyompö wuw.

¹⁶Ghöchini warechi le ato melö chechi kïrkegh kunyara ighisyenyi, kïmetimönye,

¹⁷ompöwölo kitagha Tororöt nyinte ngöghomnyö amömïchïrchïnye nyinte pköchin.

¹⁸Wölo otini kenget kurïp, kïroröchï angole nko kötintenyi.

¹⁹“Ayo Ayupu, nyi so nyo itöni angole owesyenyi aitö sulul katïnyi?

²⁰Nyi nyo kigh angole kukomtö le talïmnya, akwotyeghö pich sörunechi cho twolisot ompö anisa?

²¹Kurkuröy mpöghoghyö kïngörökyini owesyenyi akïwö kïsor wölo mi lïk.

²²Roröchini nyökoryö, amelö kyotyegho nyinte amewöghönye ngot.

²³Chöghyotoy möronkitkachi ato ipöy akuryölsot ngötwechi.

²⁴Rïpöy ompö köromnyö nko nörekyö kïrot ngwïnya ameghyongönye kalïm kekutöy kontï.

²⁵Otini köchögh kontin, kïlö, ‘Köro!’ Nguchini nyinte poryot ompöwölo low, lïmöy kuti yetïntino lïk kïtötöy ngala poryengwa.

²⁶“Piltoy sirörö ompö ngöghomnyengu akughïtö köpepokachi kupil kutang okumpö tagh?

²⁷Nyi nyo kinet sich kupil akïtek konyi wölnö le parak?

²⁸Möngöy köpön kïlïkwï konyi akwigh renkeröy wölo gheto kegh.

²⁹Möröro atoni kïgh nyo omöy. Topönöy konyichi wöl low.

³⁰ Omöy warechi nayket wetöy nyinte wölo mi pörchö.”