Read pokoot AYUPU 40 Bible Online

AYUPU 40 - pokoot bible

AYUPU 40

¹Kuyokyï ECHOTYON Ayupu lö,

²“Muköy chi nyo tïng lelut kïnam kegh kut nko Kimuktoghin? Aso nyu, yokyïne Tororöt nyï kenamanyi kut.”

³Atolapay kuyokyï Ayupu ECHOTYON lö,

⁴“Rose, ochan kïgh nyo makes, oyokunyi ne? Kanaman kegh kut achïrïm.

⁵Kangalanan kïnyïl akonga amoyokunanye. Kyangalanan kïnyïl odeny, wölo motösanye.”

⁶Atolapay kuyokyï ECHOTYON Ayupu ompö chepkïrïri lö,

⁷“Körmönö kegh le mïrön otepinyi ngölyon, teyokwaninyi.

⁸Imökenyi ompö mwoghe lö otïngön lelut pö man? Irwokyinaninyi tökeyityinyi man?

⁹Itïngönyi owesyö le Tororöt? Imukenyi porore ompö kut le Tororöt?

¹⁰“Ywalena kegh wowïn nko töroryö! Minena kegh ororyö nko pïchighyö.

¹¹Mïluna nörekyengu kïmïkul airos chi anka tïkwïl nyo menöy igh kïwö mut.

¹²Rosa chi anka tïkwïl nyo le menotyon, tetyorunö nyinte kïrökwï. Tyokyïnö ngwïny mwokïyis ompö otini ghyongo.

¹³Itïpchï chane löwïr terïtyon airötyï tökochekwa ngwen.

¹⁴Oghönan nyu ngaleku tïkwïl lö, kinyorunyi rïntagh ompö owesyengu kegh.

¹⁵“Rose, moköw nyo kyaghan le nyi kyaghinyi. Omöy nyinte sus le egh.

¹⁶Rose owesyö nyo mi chotichi nko kimukatenyi nyo mi ariketiskachi.

¹⁷Köroröy töronkwenyi kughyö le törokwö kikïsopön tikitko chotichi kïnam kegh lö kïng.

¹⁸Lenye koyechi soghyen cho kikigha taghoy akïlenye kelyechi möröwo karïn.

¹⁹“Pö tagh nyinte nyo pö ighisyewut pö Tororöt, nya kïlïkwï ighintenyi onkït nyo pöro nyinte chokenyi.

²⁰Ompöwölo, pitöy kutïngkotï sus cho omöy nyinte akï wölini wölo tisonchegho tïpö wudïn.

²¹Rïwöy nyinte panyïrït ghït, lïtöy sampïl wölo le nyonyön.

²²Wuro nyinte rurwonoy pö panyïrit akuwach nyinte ketï cho kipita chakanay.

²³Rose lö kïrkegh kïnyïghï lalwa kïmotyonye, kolyönöy nyinte kïrkegh kïnyïghï pögho Yordan kïkar kat.

²⁴Ayo muköy chi tökïnama nyinte arokes pö karïn anta rït sörunyi kukodï?