Read pokoot AYUPU 41 Bible Online

AYUPU 41 - pokoot bible

AYUPU 41

¹ “Imukenyi tengwïsuna kïkïgh arokes pö karïn kïnömo kaghagh anta ikicha ngalyapunyi pörköyö?

²Imukenyi noghchine pörköyö sörunyi, anta irïtö arokes karenyakenyi?

³Soghinyi nyinte kïnyïl cho chang? Anta ngölonunyi ngal cho tölose?

⁴Ochomyonekwa nko nyinte chenga kïlïkwï mötworintengu kokay?

⁵Ayo ipirönchinenyi nyinte le tarit? Anta irötenyi iretotoy kïsïwa tipiku?

⁶Mortotoy nömi kaghagh nyinte? Poröy mïnchïrïschoni nyinte akwalta?

⁷Imukenyi tore menyontenyi kïpintita asipet anta ipïsïghö mötïnyi asipetina cho kïpïsïgho kaghagh?

⁸Name köny nyinte tesïwena poryot wölo lata amelïmenyinye ngat!

⁹Ay, poto sirmöy ptangengmöt akïma mu otinö makïnamnye nyinte, nyini katora chi kong kïman kowö.

¹⁰Möminye chi nyo le nyakan nyo lentöy owïku nyinte. Ngo nyu nyinte nyini lentöy oghyongtoy ompö tawunyan?

¹¹Ngo nyo kinya kïkonanïn kïgh toghokyan nyinte? Nyinyan kïgh anka tïkwïl nyo mi ngwïny kïmïkul.

¹²“Mosisanye mangalana wölo lata kelyechi anta wölo tenö owesyenyi anta wölo pïchighta wölo kikighta.

¹³Ngo nyo muköy kumpöl perkachi cho pö parak, anta pïsïk kurel karïn nyo kilokyï kegh takat?

¹⁴Ngo nyo muköy kïngösyömöy kutinyi, nyo kinyïghï kelat kuwit cho otyegho pich?

¹⁵Kikighchï patawunyi per cho töpölol cho kïnomnyö kïyam le kogh.

¹⁶Kïnomnyö nyo memukönye yomat tökïlït kwen.

¹⁷Kinomnyö chane kudap kegh akïlït kegh nyo memukisyotcha kepesyot.

¹⁸Ryonöy kïtïskayan le kiryal lenye konyichi pïrirïn pö yekon.

¹⁹Lïtuno kutinyi lyopötinö cho wutu ngeset cho nöghsot.

²⁰Lïtuno ighöt sörunöyichi le tör nyo wïchöy akilenye igho saw.

²¹Noghöy kimïnytanyi ngeset akïlïtuno lyopötö kutinyi.

²²Kirata katïngu ompö owesyö, nömöy chi mïghötö otini kechumchï.

²³Kina kegh tikitko portanyi kïnomnyö löwïr. Kirikisyö mökimukönye kenotegho.

²⁴Aghïgh mïkulöwunyi le kogh aghïgh le ghat nyo kïngogho pagh.

²⁵Otini kanget, kïmïghyö nyökon, akïmeghsot mutïnö ompö nyökoryö.

²⁶Kïrkegh kïnam rotwo chok, kïmedonye kïgh kwïle ngot akï kwïle kotï akï kwïle asipet.

²⁷Lenye karïna ompö nyinte suswon akïlenye kari taghoy ket cho kinïnö.

²⁸Memukönye kotï kwigh nyinte kurïp, lenye koghïn cho kïwiro nyinte morïr.

²⁹Lata runkunö ompö nyinte mopö, roröchini kighumöto ngot nyo kakïtorï.

³⁰Lenye muyenyi kerpes pö tören cho ngötipöch, körkoro norayon kukaryala le wölo kinyero pagh.

³¹Ighöy nanam kïwïch le tör nyo mi ma akwigh nanam kïwïr alapï le töwïtyo sakït.

³²Ripöy pïchan lötunyi nyo kitiskayan kïrelit tökunan chi lö manan kipit nanam karwal.

³³Möminye kïgh nyo karkegh tïkwïl ompö ngwïny kikigh nyinte kïpuryö kiwaghat.

³⁴Rosöy chane löwïr cho syolöy kegh le kwïle, pöytoghin nyinte nyo pö tïpö wudïn löwïr cho nyökeröch.”